Read CHUYA QELLQA La Biblia en Quechua de Ayacucho 2012 Jeremías 15 Bible Online

Jeremías 15 - CHUYA QELLQA La Biblia en Quechua de Ayacucho 2012 bible

Jeremías 15

¹ Tayta Diosmi kaynata niwarqa: Moiseswan Samuelña ñawpaqniyman hamuptinkupas, manam kay runakunataqa llakipayarisaqchu. ¡Kaymanta qarqoy, qayllaymanta lloqsichunku!

²Sichum paykuna nisunki: ¿Maymantaq risaqku? nispa, hinaptinqa ñoqapa sutiypim kaynata ninki: Onqoywan wañunanpaq kaqkunaqa onqoywanyá wañuchunku; guerrapi wañunanpaq kaqkunaqa guerrapiyá wañuchunku; yarqaymanta wañunanpaq kaqkunaqa yarqaymantayá wañuchunku; preso apasqa kanankupaq kaqkunaqa preso apasqayá kachunku, nispayki.

³Ñoqa Tayta Diosmi kaynata nini: Tawa castigokunatam paykunaman kachamusaq: Guerrawanmi wañuchisqa kanqaku, allqokunam paykunata llikipanqa, alton pawaq animalkunam paykunata mikunqa, purun animalkunam paykunata tisapanqa.

⁴Ezequiaspa churin rey Manasespa Jerusalén llaqtapi mana allinkunata ruwasqanrayku paykunata castigaptiymi, kay pachapi llapallan nacionkunapas manchakuymanta katkatatanqaku.

⁵Jerusalén llaqta, ¿pitaq qanmanta llakipayarikunqa? ¿Pitaq qanmanta waqanqa? ¿Pitaq qanmanta “hawkallachu kachkan” nispa tapurikunqa?

⁶Ñoqa Tayta Diostam saqeruwarqanki, ñoqatam qepanchakuruwarqanki; chayraykum contraykipi makiyta hoqarispay chinkarachisqayki, llakipayaytapas amiruykiñam.

⁷Horquetawan wayrachichkaq hinam kay pachapa patankunakama wikaparqaykichik, mana churiyuqtañam saqerurqaykichik, ichaqa mana allin ruwaynikichikmanta mana wanakusqaykichikraykum chinkarachisqaykichik.

⁸Lamar qochapi aqomantapas masraqmi viudakunapas kanqa, chawpi punchawtam mamanmanwan wawankunamanpas wañuchiqta kachamusaq, qonqaymantam paykunaman ñakariytawan manchakuyta kacharimusaq.

⁹Qanchis wawayuq warmikunam wañunayanqaku, almankumanmi nanay huntaykunqa, punchawpas paykunapaqqa tutayaymi kanqa, penqaypi kaspankum muspaypi hina rikurinqaku. Paykunamanta puchuqkunatam enemigonkuman guerrapi wañuchinanpaq qoykusaq. Ñoqa Tayta Diosmi chaynata nini.

¹⁰¡Ay mamalláy! ¿Imapaqtaq wachakuwarqanki llapallan runakunawan piñanakuspay atipanakunaypaq? Manam pimanpas qollqetaqa prestarqanichu nitaqmi ñoqapas prestakurqanichu, chaywanpas llapallankum ñakawanku.

¹¹¡Dios Taytalláy, chaynayá kachun! Sichum paykunarayku mana mañakurqaykichu, hinaptinqa enemigoykuna sasachakuypi llakikuypi kachkaptinku mana qayakurqaykichu, hinaptinqa ñakawasqankuyá chayawachun.

¹²¿Yaqachum pipas pakiyta atirunman norte law fierrotawan bronceta?

¹³Llapa huchaykichikmantam qori-qollqekichiktapas mana imallapaq qechukuqkunaman qoykusaq.

¹⁴Mana reqsisqaykichik llaqtapim enemigoykichikta servichimusqaykichik. Piñakuyniymi nina hinaraq tukusun-kichik.

¹⁵Dios Taytalláy, qamqa lliwtam yachanki, yuyariwaspaykiyá qawariway, cheqniwaqniykunata vengakuruy. Amayá paykunataqa llakipayaychu, amayá cheqniwaqniykuna wañuchiwanantaqa munaychu, yachankim qamrayku insultasqa kasqaytaqa.

¹⁶Tukuy Atiyniyuq Dios Taytalláy rimapayawasqaykiman hinam palabraykita mikurqani. Chay palabraykikunaraykum sonqoypi anchallataña kusikurqani, ñoqaqa qampam kallani.

¹⁷Aychan kusichiqkunawanqa manam hukllawakurqanichu, akllawasqayki punchawmantam sapallayña karqani, piñakuynikiwan huntaykuwasqaykimantam mana piwanpas hukllawakurqanichu.

¹⁸¿Imanasqataq kay nanayniyqa manaña tukuq? ¿Imanasqataq kay heridaykunaqa manaña hampiy atina? ¿Chakiruqlla yaku hinachu ñoqapaq rikurirunki? ¿Mana yakuyuq pukyu hinachu ñoqapaq rikurirunki? nispa.

¹⁹Chayraykum Tayta Dios niwarqa: Kutirikamuwaptikiqa huktawanmi chaskisqayki, hinaptinmi kaqllamanta serviwanki. Yanqakuna rimaymanta wanakuspa imam kaqllata rimaspaykiqa ñoqapa rantiypim rimanki. Paykunam qanmanqa kutirikamunanku, manam qamchu paykunamanqa kutirikunayki.

²⁰Kay runakunapaqmi qamta churayki broncemanta perqata hina, contraykipim peleanqaku, ichaqa manam vencesunkichu, ñoqam qanwan kachkani salvanaypaq hinaspa libranaypaq. Ñoqa Tayta Diosmi chaynata nini.

²¹Mana allin runakunamantam lluptichisqayki, mana llakipayakuq runakunamantam librasqayki, nispa.