Read CHUYA QELLQA La Biblia en Quechua de Ayacucho 2012 Jeremías 16 Bible Online

Jeremías 16 - CHUYA QELLQA La Biblia en Quechua de Ayacucho 2012 bible

Jeremías 16

¹Tayta Diosmi kaynata niwarqa:

²Kay nacionpiqa amam casarakunkichu nitaqmi churikikunapas kanqachu.

³Ñoqa Tayta Diosmi nisqayki, kay nacionpi naceq wawa-churikunatawan tayta-mamanta imam pasananmanta.

⁴Paykunaqa ñakarichikuq onqoykunawanmi wañunqaku, paykunamantaqa manam pipas waqanqachu nitaqmi pipas pampanqachu. Hatun ispay hinam pampapi wischurayanqaku. Guerrawan yarqaywanmi paykunataqa tukurunqa, ayankutapas alton pawaq animalkunawan purun animalkunam mikunqa, nispa.

⁵Tayta Diosqa kaytapas niwarqataqmi: Wañuqpa wasinmanqa amam yaykunkichu, amam waqaysinkichu nitaqmi llakiysinkichu. Kay llaqtamantam qechuruni, hawkayay, kuyakuy hinaspa llakipayakuy qosqayta. Ñoqa Tayta Diosmi chaynata nini.

⁶Warmakunawan yuyayniyuqkunam kay nacionpi wañunqa, manam pipas paykunataqa pampanqachu nitaqmi waqanqakuchu, cuerponkutapas manam kuchukunqakuchu nitaqmi chukchankutapas rutukunqakuchu.

⁷Wañukuqpa ayllunkunata consuelanankupaqpas manam convidotaqa ruwanqakuchu. Tayta-mamanña wañuptinpas manam consuelanqakuchu.

⁸Amataqmi convidopa kasqan wasi-manpas yaykunkichu, paykunawan mikuspa vinota upyanaykipaqqa.

⁹Ñoqa Israelpa yupaychasqan Tukuy Atiyniyuq Tayta Diosmi kaynata nini: Kay llaqtapim takiyninkuta, kusikuyninkuta, casarakuy fiestapi takinkuta qayllankumanta qollurachisaq. Chaykuna ruwasqaytaqa ñawikichikwanmi rikunkichik.

¹⁰Llapa runakunaman kayta willaptikim paykuna kaynata tapusunki: ¿Imanasqataq Tayta Diosqa kay hatun castigokunata rimachisuchkanki? ¿Ima mana allintataq ruwaruniku? ¿Imapitaq Tayta Diospa contranpi huchallikuruniku? nispanku.

¹¹Chaymi ñoqa Tayta Diospa nisqayta kaynata ninki: Ñawpaq taytaykichikkunam saqeruwaspanku idolokunataña qatirqaku, chaykunatam qayllanpi qonqoraspanku yupaycharqaku. Ñoqata saqeruwaspankum kamachikuyniykunatapas mana kasukurqakuchu.

¹²Qamkunam ichaqa taytaykichikkunamantapas aswantaraq huchallikurunkichik. Sapakamam sonqoykichikpa munasqanman hina kaw-saspa mana kasuwarqankichikchu.

¹³Chayraykum kay nacionmanta wis-chusqaykichik, qamkunapapas nitaq taytaykichikkunapapas mana reqsisqan nacionman. Chaypim huk dioskunataña tuta punchaw servimunkichik. Qamkunataqa manam llakipayasqaykichikchu, nispa.

¹⁴Ñoqa Tayta Diosmi nini: Chaywanpas hamuchkanmi punchaw, Israelpa mirayninkunata Egiptomanta hurqomuq ñoqa Tayta Diospa sutiypi manaña juranankupaq.

¹⁵Juraspaqa juranqaku: “Israelpa mirayninkunata norte law nacionkunamanta chaynataq qarqosqan wakin nacionkunamanta kutichimuq Tayta Diospa sutinpim jurani” nispañam. Ñoqam kutichimusqaykichik taytaykichikkunaman qosqay allpaman, nispa.

¹⁶Ñoqa Tayta Diosmi kaynata nini: Challwaqkunatam challwasunaykichikpaq kachamusaq. Chaymantam purun animal hapiqkunata kachamusaq, paykunam montekunapi, orqokunapi, moqokunapi, qaqakunapi, uchkukunapi maskaspa hapimusunkichik.

¹⁷Paykunapa imaynam kawsasqantaqa qawachkanim. Paykunapa mana allinkuna ruwasqankuqa qayllaypim kachkan, mana allinkuna ruwasqankuqa manam ñawiymantaqa pakasqachu kachkan.

¹⁸Puntataqa mana allinkunata ruwaspa huchallikusqankumantam mirayniyuqta pagapusaq. Paykunaqa wañusqa idolokunawanmi allpayta millakuypaqta ruwarunku, millakuypaqta huchallikusqankuwanmi herenciankupaq qosqay allpata qanracharunku, nispay.

¹⁹Dios taytalláy, kallpanchaqniymi qamqa kanki, sasachakuypi harkaykuqniymi qamqa kanki. Kay pachapa patankunamantam nacionkuna hamuspanku nisunki: Cheqaptapunipas ñawpaq taytaykuqa, mana valeq idolokunatam herenciata hina chaskirqaku.

²⁰¿Runaqa yaqachu diosninta ruwakurunman? Ruwakurunmanmi, ichaqa manam chayqa dioschu, nispanku.

²¹Chayraykum kunanqa atiyniyuq kasqayta paykunaman reqsichisaq, chaynapim yachanqaku sutiyqa Tayta Dios kasqanta.