Read CHUYA QELLQA La Biblia en Quechua de Ayacucho 2012 Jeremías 18 Bible Online

Jeremías 18 - CHUYA QELLQA La Biblia en Quechua de Ayacucho 2012 bible

Jeremías 18

¹Tayta Diosmi ñoqa Jeremiasta niwarqa:

²Hatarispayki manka ruwaqpa wasinta riy, chaypim rimapayasqayki, nispa.

³Chaymi manka ruwaqpa wasinman chayaruspay, chay runata tariykurqani ruedapa hawanpi manka ruwachkaqta.

⁴Ichaqa chay manka ruwasqanmi hukman lloqsirurqa, chaymi musoqmanta munasqanman hina hukta ruwarqa.

⁵Hinaptinmi Tayta Dios kaynata niwarqa:

⁶Israelpa mirayninkuna, ¿manachum kay manka ruwaq hina qamkunawanpas munasqayta ruwayman? Manka ruwaqpa makinpi mitu hinam qamkunapas makiypi kankichik. Ñoqa Tayta Diosmi chaynata nini.

⁷Munasqay horapim mayqan nacionpa, mayqan munaychakuypa contranpipas pelarunaypaq, tuñichinaypaq hinaspa chinkachinaypaqpas rimarisaq.

⁸Chaywanpas sichum chay nacionkuna mana allinkuna ruwasqankumanta wanakuptinkuqa, chay tanteasqay castigotaqa manañam chayachisaqñachu.

⁹Munasqay horapitaqmi rimarisaq mayqan naciontapas, mayqan munaychakuytapas hatarichinaypaq chaynataq takyachinaypaqpas.

¹⁰Chaywanpas sichum chay nacionkuna mana allinkunata ruwaspanku mana kasuwaptinkuqa, allinninkupaq tanteasqay kaqkunawanqa manam yanapasaqñachu.

¹¹Chaynaqa, Judá runakunatawan Jerusalenpi yachaqkunata kaynata nimuy: Ñoqa Tayta Diosmi qamkunata castiganaypaq tanteachkani. Chaynaqa, mana allin kawsasqaykichikmanta wanakuspa vidaykichiktawan ruwaynikichikta allichaychik, nispa.

¹²Chaywanpas paykunaqa kaynatam nisunki: Yanqañam chay niwasqaykikuqa, ñoqaykuqa munasqaykuman hinam kawsakusaqku, sonqoykupa munasqantam sapakama ruwakusaqku, nispanku.

¹³Chayraykum ñoqa Tayta Dios kaynata nini: Nacionkunapiyá tapukamuychik, ¿yaqachu pipas chaykunata uyarinman karqa? Israel runakunam manchakuypaq kaqkunata ruwarunku.

¹⁴¿Yaqachu huk kutillatapas Líbano orqopi riti chullururqa? ¿Yaqachu huk kutillatapas orqokunamanta kallpamuq chiri yaku chakirurqa?

¹⁵Runaykunam ichaqa ñoqata qonqaruwanku, idolokunamanña inciensota kañaspanku. Ñawpaq kawsayninkuman kutiruspam mitkarunku, mana purinanku ñankunapiñam purichkanku.

¹⁶Chaynapim allpankutapas chunnirachinku, runakunapa asipayanantañam ruwarunku. Chayninta puriqkunapas admirakuspam umankutaraq aywinqaku.

¹⁷Israel runakunataqa, Intipa qespimunan lawmanta pukumuq wayra hinam, enemigonkunapa qayllanpi cheqerachisaq. Sasachakuypi kaptinkupas manaña qawarispaymi qepanchakurusaq.

¹⁸Chay runakunam ninakurqaku: Hamuychik, Jeremiaspa contranpi tanteanakusun. Yachachiqninchik sacer-dotekunapas, yachayniyuq consejaqninchikkunapas, Tayta Diospa nisqanta willawaqninchik profetakunapas, manam faltanqachu. Tumpaykusunchik wañurachinankupaq, ima rimasqantapas ama kasusunchikchu, nispanku.

¹⁹¡Dios Taytalláy, qawariykamullaway! Cheqniwaqniykunapa imam rimanakusqanta uyariy.

²⁰¿Paykunapaq allin ruwasqaymantachu mana allinwan pagawanqaku? Sepulturaytapas toqorunkuñam, paykunapa allinninpaq rimasqaytayá yuyariy, paykunamanta piñakuynikita suchuchinaykipaq mañakusqaytayá yuyariy.

²¹Chaynaqa, churinkunatayá yarqaymanta wañuchiy, espadawanyá paykunata wañuchiy; warminkupas viudayaspa manaña wawayuq qepachun. Qosankutapas peste onqoy wañuchichun, jovenkunapas guerrapi wañuchunku.

²²Suwakunata qonqaymanta paykunaman kachaykuy, wasinkupipas manchakuymanta qaparichunku. Paykunaqa wichichiwanankupaqmi uchkuta toqorurqaku, purinaymanmi trampata churarurqaku.

²³Dios Taytalláy, qamqa yachankim wañuchiwanankupaq tukuy ima rimanakusqankutapas, mana allinkunata ruwaspa qayllaykipi huchallikusqankutaqa amayá pampachaychu, qayllaykimanta paykunata wichichiy, piñakuynikiwan castigay.