Read CHUYA QELLQA La Biblia en Quechua de Ayacucho 2012 Jeremías 19 Bible Online

Jeremías 19 - CHUYA QELLQA La Biblia en Quechua de Ayacucho 2012 bible

Jeremías 19

¹Tayta Diosmi kaynata niwarqa: Manka ruwaqpata rispaykim allpamanta aysakuta rantimunki, hinaspam qamkuna ukupi ancianokunatawan, sacerdotekunamanta anciano kaqkunata pusaspa

²Ben-hinom wayqoman lloqsinki. Chay wayqoqa kachkan intipa qespimunan lawpi punkupa chimpanpim. Chaypim ñoqapa nisqayta kallpawan

³kaynata nimunki: Judá nacionpi reykuna, Jerusalén llaqtapi yachaqkuna, Tukuy Atiyniyuq Tayta Diospa nisqanta uyariychik: Israelpa yupaychasqan Tayta Diosmi kayna nin: Kay sitiopa contranpim hatun castigota kacharimusaq, pipas chayta uyariqkunaqa muspaypi hinaraqmi rikurinqaku.

⁴Qamkunaqa ñoqata saqeruwas-paykichikmi kay sitiotapas mana-ña asuykunaypaq hina ruwarunkichik, qamkunapapas, ñawpaq taytaykichik-kunapapas chaynataq Judá nacionpi reykunapapas mana reqsisqaykichik idolokunamanña inciensota kañaspaykichikmi, kay sitiopi inocente runakunata wañuchinkichik.

⁵Qamkunam Baal idolokunapaq altarkunata ruwarqankichik, chay altarkunapim churikichikkunata kañaspa Baalman ofrecerqankichik. Chaykuna ruwaytaqa manam kamachirqaykichikchu, nitaqmi piensarqanichu.

⁶Chayraykum punchawkuna hamunqa kay sitiota manaña Tofetwan otaq Ben-hinomwan sutichanankupaq, aswanqa “Nakana Qechwa” nispañam sutichanqaku.

⁷Kay qechwapim Judá nacionpi runakunapa chaynataq Jerusalén llaqtayuq runakunapa rimanakusqankuta yanqachasaq. Enemigonkuman qoykuptiymi guerrapi wañunqaku, hinaptinmi ayankutapas alton pawaq animalkunawan purun animalkunaña mikunqaku.

⁸Kay llaqtatam manchakunanku hinaspa burlakunanku sitiomanña tikrarusaq. Chaynin pasaq runaku-napas pasaypaq tuñisqata qawaykuspankum admirakusparaq asikunqaku.

⁹Churi-wawankutapas taytamama-llankuwanmi mikuchisaq, chayna-taqmi kikinkupas sapakama mikunakunqaku, chaynataqa ruwanqaku enemigonku atacaspa pasaypaq muyuriruptinku yarqaymanta kasqankuraykum.

¹⁰Chaynata niruspaykim, riqmasiki runakunapa qayllanpi aysakuta pakiparunki,

¹¹hinaspam ñoqa Tukuy Atiyniyuq Tayta Diospa nisqayta kaynata ninki: Manaña pipapas allichay atinankama pakipasqa aysakuta hinam kay runakunatawan kay llaqtata tukusaq. Ayakunatapas manaña maypipas pampanankupaq kaptinmi Tofet wayqopiña pampanqaku.

¹²Chaynatam kay llaqtatawan runankunata ruwasaq. Tofet qechwata hinam kay llaqtata saqesaq. Ñoqa Tayta Diosmi chaynata nini.

¹³Jerusalén llaqtapi wasikunawan Judá nacionpi reykunapa palacionkunapas, Tofet qechwa hina millakuypaqñam kanqa. Chay wasikunapa altosninpim chaskakunaman inciensota kañapurqaku, chaypim llapa idolokunamanpas vino ofrendata tallipurqaku, nispa.

¹⁴Tofet wayqopi profetizamunanpaq Tayta Diospa kachasqanmanta Jeremías kutiramuspanmi, templopa pationpi sayaykuspan llapa runakunata nirqa:

¹⁵Israelpa yupaychasqan Tukuy Atiyniyuq Tayta Diosmi kaynata nin: Sonqoykichikta rumiyarachispa nisqaykunata mana kasukusqaykichikraykum, kay llaqtapa chaynataq muyuriqninpi llaqtakunapa contranpi rimasqay sasachakuykunata kachamusaq, nispa.