Read CHUYA QELLQA La Biblia en Quechua de Ayacucho 2012 Jeremías 2 Bible Online

Jeremías 2 - CHUYA QELLQA La Biblia en Quechua de Ayacucho 2012 bible

Jeremías 2

¹Tayta Diosmi kaynata niwarqa:

²Jerusalenpi runakunaman rispayki, allinta uyarinankupaq qaparispa kaynata nimuy, Tayta Diosmi kaynata nin: Sipas kaspa kuyawasqaykitam yuyarini, casararuptiy kuyawasqaykitam yuyarini, mana imapa kanan chunniqninta qatiwasqaykitam yuyarini.

³Israel runakunaqa sapaqchakusqaymi karqankichik, cosechaypa punta kaq rurunmi karqankichik. Pipas dañasuqnikikunataqa, hatun sasachakuykunawanmi ñakarichirqani, nispa. Ñoqa Tayta Diosmi chaynata nini.

⁴Jacobpa mirayninkuna, Israelpi llapallan ayllukuna, Tayta Diospa nisqanta uyariychik.

⁵Paymi qamkunata kaynata nisunkichik: ¿Taytaykichikkunaqa ima mana allintataq ñoqapi tarirurqaku, chaynapi ñoqamanta karunchakunankupaq? Paykunaqa millakuypaq dioskunamanña qokuruspankum chayna millakuypaqña rikurirurqaku.

⁶Paykunaqa manam tapukurqakuchu: ¿Maytaq Egiptomanta hurqomuwaqninchik Tayta Diosqa? nispallapas. ¿Maytaq mana imapa kanan chunniqninta pusamuwaqninchikqa? nispallapas ¿Maytaq wañuypa kanan sinchi tutayay chaki allpanta pusamuwaqninchikqa? nispallapas. ¿Maytaq runapa mana yachanan allpankunata pusamuwaqninchikqa? nispallapas.

⁷Tukuy imakunapa wiñanan allpamanmi pusamurqaykichik, chay allpapa allinnin rurunta mikukunaykichikpaqmi pusamurqaykichik; qamkunam ichaqa yaykuruspa qachacharunkichik, allpaytam millakuypaqta ruwarunkichik.

⁸Sacerdotekunapas manam tapukurqakuchu: ¿Maytaq Tayta Diosqa? nispallapas. Kamachikuyniykunata yachachiqkunapas, manam reqsiwarqakuchu; kamachiqninkunapas contraypim hatarirqaku, profetakunapas Baal idolopa sutinpim profetizarqaku, hinaspam millakuypaq idolokunaman qokururqaku.

⁹Chayraykum ñoqa Tayta Dios kaynata nini: Qamkunatawan willkaykichikkunatam juicioman apasqaykichik.

¹⁰Quitim lawman rispa qawamuychik, Cedar lawpi runakunata tapuchimuychik, yaqachus kayna ruwaykuna pasakunman kasqa.

¹¹¿Yaqachu mayqan nacionpas diosninkunata saqerurqaku chaykuna mana cheqap dios kachkaptinpas? manam. Runaykunam ichaqa ñoqata saqeruwanku, yupaychasqanku Diosninkuta saqeruwaspankum millay idolokunamanña qokururqaku.

¹²¡Cielokuna mancharikuychik, kay ruwasqankumanta katkatataychik! nispa Ñoqa Tayta Diosmi chaynata nini.

¹³Llaqtaymi iskay mana allin huchata ruwarun: Kawsachiqninku yaku kachkaptiypas saqeruwankum kikinkuñam pozonkuta toqokurunku, yakuta mana takyachiq raqra pozokunatañam ruwakurunku.

¹⁴Israelqa manam esclavochu karqa, nacerqapas manam esclavo kananpaqchu, chaynaqa ¿imanasqataq saqueasqa kachkan?

¹⁵Malta leonkunam paykunapa contranpi qaparkachanku, manchakuypaqta qaparispam allpankutapas chunnirachinku; llaqtankutapas kañarunkum, manañam pipas yachanñachu.

¹⁶Menfis llaqtayuqkunam, Tafnes llaqtayuqkunam, umaykita pakirunku.

¹⁷Ñoqa Tayta Diosta saqeruwasqaykichikraykum, allin ñanninta pusamusuqnikichikta saqeruwasqaykichikraykum, kaykunaqa pasasurqankichik.

¹⁸Kunanqa, ¿imatataq hurqokunki, Egipto nacionman rispa Nilo mayupa yakunta tomaspaykiqa? ¿Imatataq hurqokunki, Asiria nacionman rispa Eufrates mayupa yakunta tomaspaykiqa?

¹⁹Millakuypaq kaqkuna ruwasqaykikunam castigasunki, mana kasukuynikikunam condenasunki; tantearispayá sumaqta yuyaymanariy, mayna sasam hinaspa mayna manchakuypaqmi yupaychasqayki Tayta Diosta saqeruwaspa mana kasukuyqa. Ñoqa Tayta Diosmi chaynata nini.

²⁰Unayñam contraypi hoqarikuruspa manaña kasuwankichu hinaspam niwankiraq: Manam servisqaykichu, nispa. Llapa alto moqokunapim, rapisapa sachakunapa sikinkunapim, chuchumika warmi hina qanrakurqanki.

²¹Allinnin akllasqa uvasta hinam plantarqayki, miski uvaspa kallmanta hinam tarpurqayki, ¿imanasqataq purun uvasmanqa tikrakurunki? ¿Imanasqataq manaña reqsipay uvas plantaqa rikurirunki?

²²Lejiawanña mayllakuptikipas, maynataña jabonakuptikipas, huchaykiqa hinallam qayllaypi kachkan. Ñoqa Tayta Diosmi chaynata nini.

²³¿Imaynataq niwaq manam qanrakurqanichu, nitaqmi Baal idolokunatapas qatirqanichu nispaykiqa? Qechwapi imakunam ruwasqaykita yuyarispa reqsikuy, qamqa mana qasillalla kaspa kayman chayman kallpakachaq china camello hinam kanki;

²⁴Qanrakuyninpi altokunaman muskiykachaq chunniqman amañasqa china asno hinam kanki. Qanrakuynin hapiruptin ¿pitaq hapirunman? Orqo asnoqa mana pisipaspallam chaylla tariykun, qanrakuynin hapiruptinqa chayllam tariykun.

²⁵Israelpa mirayninkuna, ama qala chakilla kallpakachaychikchu, kunkaykichiktapas ama yakumanta chakichiychikchu nichkaptiypas, qamkunam ichaqa nirqankichik: Manam atiymankuchu, mana reqsisqa dioskunatañam kuyaniku, paykunatañam qatikusaqku, nispa.

²⁶Imaynam suwa tarirachikuspan hatun penqaypi rikurirun, chaynam Israel runakunapas hatun penqaypi tarikunqaku, reyninkunawan kamachiqninkunapas, sacerdotenkunawan profetankunapas, penqaypim tarikunqaku.

²⁷Qamkunaqa kullutam ninkichik: Taytaymi kanki, nispa; rumitam ninkichik: Churyaqniymi kanki, nispa. Ñoqatañataqmi qepancharuwaspaykichik uyaykichiktapas huklawmanraq muyuchinkichik, ñakarisqaykichik punchawmi ichaqa niwankichik: “Hatarispa salvaykuwayku”, nispa.

²⁸Judá runakuna, ¿maytaq idolokuna ruwakusqaykichik? Llaqtakunata hinañam achkallataña ruwakurunkichik, chaynaqa paykunayá kallpamuchunku, yaqachus ñakariynikichik punchawpi salvarusunkichik.

²⁹¿Imanasqataq ñoqawan atipanakunkichik? Llapallaykichikmi mana kasuwankichikchu. Ñoqa Tayta Diosmi chaynata nini.

³⁰Yanqapaqmi miraynikichikkunatapas castigarqani, paykunaqa manam corregikuyta munarqakuchu. Imaynam león wañuchin runakunata, chaynam profetaykunata espadawan wañuchirqankichik.

³¹¡Yaw, kunan miraykuna! Ñoqa Tayta Diospa nisqayta uyariychik: ¿Chunniq allpachu qamkunapaq karqani? ¿Mana imapa kanan tutayaq allpachu qamkunapaq karqani? ¿Imanasqataq niwankichik: Manam qanmanqa asuykamusaykikuñachu, munasqaykuman hinañam kawsakusaqku, nispaqa?

³²¿Yaqachu alhajankunata huk sipas qonqarunman? ¿Yaqachu casarakusqan alhajankunata novia qonqarunman? Llaqtaymi ichaqa unayña ñoqata qonqaruwan.

³³Waynaykikuna maskaytaqa sumaqtam yachanki, mana allin warmikunapas qampa mana allin ruwaynikikunatam qatipakunku.

³⁴Wakchakunapa, inocente runakunapa yawarninwanmi pachaykita qanracharunki, huchankuta mana tarichkaspam wañurachinki, chaywanpas ninkiraqmi:

³⁵Ñoqaqa mana huchayuqmi kani, Diosqa manam ñoqapaq piñasqañachu kachkan, nisparaq. Chaynaqa, mana huchayuqmi kani nisqaykimantam juezpa qayllanman aysasqayki.

³⁶¿Imanasqataq kaypi chaypi yanapakuyta maskanki? Asiria nacionpa penqayman churasusqaykita hinam, Egipto nacionpas penqayman churasunki.

³⁷Egiptomantaqa penqakuymantam umaykita hapikuykuspa lloqsimunki, hapipakusqayki runakunataqa ñoqa Tayta Diosmi qepanchakuruni, paykunaqa manam yanapasunkimanchu.