Read CHUYA QELLQA La Biblia en Quechua de Ayacucho 2012 Jeremías 30 Bible Online

Jeremías 30 - CHUYA QELLQA La Biblia en Quechua de Ayacucho 2012 bible

Jeremías 30

¹Jeremiastam Tayta Dios nirqa:

²Ñoqa Israelpa yupaychasqan Tayta Diosmi kaynata nini: Kay rima-payasqay palabrakunata libropi qellqay.

³Hamuchkanmi punchaw Israel llaqtaymantawan Judá llaqtaymanta preso apasqa kaqkunata kutichimunaypaq. Ñoqa Tayta Diosmi nini: Paykunatam ñawpaq taytankuman qosqay allpaman kutichimusaq chaypi yachanankupaq, nispa.

⁴Israelman chaynataq Judaman Tayta Diospa rimapayasqan palabrakunam kaykuna.

⁵Ñoqa Tayta Diosmi kaynata nini: Manchakuymanta qapariykunam uyarikuchkan, manam hawkayayqa kanñachu, aswanqa manchakuyllañam.

⁶Tapukamuspa sumaqta yachamuychik: ¿Yaqachu qarikuna wawata wachakurunmanku? ¿Imanasqataq qarikunata wachakuq warmi hina nanaywan qewipakuchkaqta qawani? ¿Imanasqataq uyankupas ayayarun?

⁷¡Mancharikuypaq punchawkunam hamuchkan! Manam chay punchaw hinaqa haykapas karqachu. Jacobpa mirayninkunapaqmi sasachakuy punchawkuna hamuchkan, chaywanpas paykunataqa ñoqam librasaq.

⁸Ñoqa Tukuy Atiyniyuq Tayta Diosmi nini: Chay punchawpim matankankupi yugota pakirusaq, coyundatapas tipirusaqmi, chaynapim huklaw nacionniyuq runakunaqa manaña servichikunqakuñachu.

⁹Aswanqa ñoqa Tayta Diostawan reyninkupaq churasqay Davidtañam serviwanqaku.

¹⁰Ñoqa Tayta Diosmi kaynata nini: Serviqniy Jacobpa mirayninkuna ama manchakuychikchu, Israelpa mirayninkuna ama hukmanyaychikchu; ñoqam preso risqaykichik karu nacionmanta qamkunatapas miraynikichikkunatapas libramusqaykichik, kutimuspaykichikmi mana pipa manchachisqan hawkaña kawsakunkichik.

¹¹Ñoqa Tayta Diosmi nini: Qanwanmi kachkani salvanaypaq, preso kasqayki nacionkunatapas llapallantam purmarachisaq, qamtam ichaqa mana purmachisqaykichu, chaywanpas huchaykimantaqa castigasqaykipunim.

¹²Ñoqa Tayta Diosmi kaynata nini: Heridaykiqa mana hampiy atinam, onqoynikipaqqa manam hampi kanchu.

¹³Nanachikusuqnikipas manam kanñachu, heridaykikuna hampiykuqpas manam kanñachu, onqoynikipas mana hampiy atinam.

¹⁴Waynaykikunapas qonqarusunkiñam, manañam yuyasunkiñachu, enemigoyki hinam ñakarichirqayki, huchaykikuna llumpay kasqanraykum llumpayta ñakarichirqayki.

¹⁵¿Imanasqataq heridaykirayku qaparinki? Onqoynikiqa mana hampiy atinam. Mana allinkuna ruwasqaykiraykum, llumpay huchaykiraykum chaynataqa ruwarqayki.

¹⁶Mikuchkaq hina tukusuqnikikunapas tukusqam kanqaku, llapallan enemigoykikunapas preso apasqam kanqaku, sarutyasuqnikikunapas sarutyasqam kanqaku, llapa kapuqnikikuna suwasuqnikikunapas suwasqam kanqaku.

¹⁷Ñoqa Tayta Diosmi kaynata nini: “Sión moqopi llaqtaqa wischusqañam, manañam pipas nanachikunñachu” niptinkupas ñoqam heridaykikunamanta hampisqayki, onqoynikitapas ñoqam sanoyachisqayki, nispa.

¹⁸Tayta Diosmi kaynata nin: Jacobpa mirayninkunatam preso risqankumanta kutichimusaq, maymi yachanankunamantam llakipayarikusaq, llaqtanpas maymi tuñisqanpim kaqmanta hatarichisqa kanqa, palaciopas maymi kasqanpim hatarichisqa kanqa.

¹⁹Chaypi yachaqkunam graciasta qowanqaku, takispankum kusikuymanta qaparinqaku. Mirachiptiymi paykunaqa achkallaña kanqaku, ancha reqsisqata ruwaptiymi manaña pipas uchuychasunkichikñachu.

²⁰Mirayninkupas ñawpaq watakunapi hinam kanqaku, llaqtanpas qayllaypim allin takyachisqa kanqa, ñakarichiqninkunatapas ñoqam castigasaq.

²¹Ñoqa Tayta Diosmi kaynata nini: Paykunamantam kamachiqninku lloqsinqa, paykuna ukumantam reyninku lloqsinqa, payqa ñoqaman asuykachiptiymi qayllaypi kanqa. ¿Pitaq kikillanmanta ñoqaman asuykamuwanman?

²²Qamkunam llaqtayña kankichik, ñoqañataqmi Diosnikichik kasaq, ñoqa Tayta Diosmi chaynata nini.

²³Tayta Diospa piñakuyninqa sinchi wayra hinaraqmi, muyuq wayra hinaraqmi mana allin ruwaqkunapa contranpi hatarinqa.

²⁴Tayta Diospa piñakuyninqa ruwananta tukunankamam mana taninqachu, Tayta Diospa ruway tanteasqanqa tukunankamam mana taninqachu. Chaykunataqa hamuq punchawkunapiñam sumaqta entiendenkichik. Ñoqa tayta Diosmi chaynata nini.