Read CHUYA QELLQA La Biblia en Quechua de Ayacucho 2012 Jeremías 36 Bible Online

Jeremías 36 - CHUYA QELLQA La Biblia en Quechua de Ayacucho 2012 bible

Jeremías 36

¹Judá nacionpi Josiaspa churin rey Joacim tawa wataña munaychakuchkaptinmi Jeremiasta Tayta Dios nirqa:

²Josías rey kasqanmanta kunan punchawkama Israelpa, Judapa chaynataq lliw nacionkunapa contranpi nisqayta rollopi qellqay.

³Icharaqpas Judapa mirayninkunaqa tukuy ima castigokuna kachariy munasqayta uyarispanku mana allin kawsayninkumanta wanakunmanku, hinaptinqa mana allinkuna ruwasqankutawan huchankutam pampachaykusaq, nispa.

⁴Chaymi Jeremiasqa Neriaspa churin Baructa qayarachimuspan Tayta Diospa tukuy rimapayasqanta willarqa, hinaptinmi Barucñataq rollopi qellqarqa.

⁵Chaymantam Baructa Jeremías kaynata kamachirqa: Preso kasqayraykum Tayta Diospa templonmanqa mana riyta atinichu.

⁶Chaynaqa, ayuno punchawpim temploman yaykuspayki qellqachisqay rollota leemunki, chaynapi llapa runakunawan Judá nacionpi llaqtakunamanta hamuqkunapas Tayta Diospa nisqanta uyarinankupaq.

⁷Icharaqpas Tayta Diosta mañakuspanku mana allin kawsayninkumanta wanakunmanku. Tayta Diosqa llumpayta piñakuspanmi kay runakunata amenazachkan, nispa.

⁸Chaymi Neriaspa churin Barucqa profeta Jeremiaspa kamachisqanman hina, rollopi qellqasqanta Tayta Diospa templonpi leerqa.

⁹Judá nacionpi Josiaspa churin rey Joacim pichqa wataña munaychakuchkaptinmi, chay watapa isqon kaq killanpi qayachirqaku, Jerusalén llaqtapi chaynataq Judá nacionpi kaq llaqtakunapi yachaqkunata, Jerusalenman hamuspanku Tayta Diospa qayllanpi ayunanankupaq.

¹⁰Hinaptinmi Jeremiaspa qellqachisqanta Baruc leerqa llapallan runakuna uyarisqanta. Payqa leerqa secretario Safanpa churin Gemariaspa cuartonmantam. Chay cuartoqa karqa hanay law patiopim, temploman yaykuna musoq punkupim.

¹¹Safanpa willkan otaq Gemariaspa churin Micaiasmi, Barucpa leesqan Tayta Diospa palabrankunata uyarirurqa,

¹²hinaspanmi reypa palacionpi secretariopa cuartonman uraykurqa, chaypim kay kamachikuqkuna kachkarqaku: Secretario Elisama, Semaiaspa churin Delaía, Acborpa churin Elnatán, Safanpa churin Gemarías, Ananiaspa churin Sedequías chaynataq wakin kamachikuqkunapas.

¹³Paykunamanmi runakunapa qayllanpi Barucpa leesqan palabrakuna uyarisqanta Micaías willarqa.

¹⁴Hinaptinmi llapa kamachikuqkuna Netaniaspa churin Jehudita kacharqaku Baructa kaynata nimunankupaq: Runakuna uyarinanpaq leesqayki rollota aparikuspa hamuy, nispa. Netaniasqa karqa Selemiaspa churinmi, Selemiasñataqmi Cusipa churin. Hinaptinmi Neriaspa churin Barucqa rollota aparikuspan kamachikuqkunapa qayllanman rirqa.

¹⁵Paykunam Baructa nirqaku: Tiyaykuspayki ñoqaykupaqpas chay rollota leepuwayku, nispanku. Chaymi Barucqa paykunapaqpas leepurqa.

¹⁶Leesqan palabrakunata uyariruspankum mancharisqallaña qawanakurqaku, hinaspam Baructa nirqaku: Cheqaptapunipas kay uyarisqanchik palabrakunataqa reymanmi willananchik, nispanku.

¹⁷Chaymi Baructa tapurqaku: Willaykuwaykuyá, ¿Maymanta hurqospataq kaykunata qellqaramunki? ¿Icha Jeremiaschu qellqachisurqanki? nispanku.

¹⁸Chaymi Baruc nirqa: Kay palabrakunataqa Jeremiasmi qellqachiwarqa hinaptinmi ñoqaqa tintawan kay rollopi qellqarqani, nispa.

¹⁹Hinaptinmi llapa kamachikuqkunañataq nirqaku: Rispayki Jeremiaspiwan kuska pakakamuychik, maypim kasqaykichiktaqa amam pipas yachanqachu, nispanku.

²⁰Chaymantam llapa kamachikuq-kunaqa, rollota secretario Elisamapa cuartonpi saqeykuspanku, reypa palacionpa pationman yaykurqaku, hinaspam tukuy chay palabrakunata reyman willarqaku.

²¹Chaymi reyñataq Jehudita kacharqa Elisamapa cuartonmanta chay rollota apamunanpaq. Chayarachimuspanmi Jehudiqa leerqa reypas hinaspa chaypi kaq kamachikuqkunapas uyarinankupaq.

²²Isqon kaq killa kasqanraykum reyqa qasa tiempopaq ruwachisqan cuartopi tiyachkarqa, qonichikunan sansapa ñawpaqninpi.

²³Rollopi qellqasqa palabrakunata iskay-kimsa rayata Jehudí leeruptinmi reyqa cuchillowan kuchuparurqa, hinaspanmi qonikusqan sansaman wischuykurqa. Chaynata ruwaspanmi tukunankama chay rollota kañarurqa.

²⁴Chay palabrakunata uyarichkaspapas manam reypas nitaq serviqninkunapas manchayllapas mancharikurqakuchu, nitaqmi pachankutapas llikiparqakuchu.

²⁵Elnatanwan Delaía hinaspa Gema-riasmi reyta mañakurqaku rollota ama kañananpaq. Chaywanpas reyqa manam kasurqachu.

²⁶Aswanmi reyqa kamachirqa Hamelecpa churin Jerameeltawan, Azrielpa churin Seraiasta hinaspa Abdeelpa churin Selemiasta, chaynapi secretario Baructawan profeta Jeremiasta presochamunankupaq, ichaqa Tayta Diosmi paykunata pakarurqa.

²⁷Jeremiaspa Barucwan qellqachisqan rollota rey kañaruptinmi, Jeremiasta Tayta Dios kaynata nirqa:

²⁸Judá nacionpa reynin Joacimpa kañarusqan rollopi qellqachisqay palabrakunatayá huk rollopiña musoqmanta qellqay.

²⁹Ñoqa Tayta Diospa nisqaytam rey Joacinman kaynata ninki: Qanmi chay rollota kañaspayki, Jeremiasta qaqcharqanki, “cheqaptapunim Babilonia nacionpa reynin hamuspan kay nacionta tukunqa manaña runayuq nitaq animalniyuq kanankama”, nisqanmanta.

³⁰Chayraykum ñoqa Tayta Dios kaynata niki: Judá nacionpa reynin Joacim, miraynikimantaqa manam pipas kanqachu rey Davidpa rantinpi munaychakuqqa. Ayaykipas punchaw rupaypi hinaspa tuta qasapim wischurayanqa.

³¹Mana allinkuna ruwasqaykichikraykum qamtapas, miraynikitapas chaynataq serviqnikikunatapas castigasqaykichik. Jerusalenpa chaynataq Judá nacionpa contranpi rimasqay castigokunatam kachamusaq. Mana kasukusqaykichikmantam chaykuna pasasunkichik, nispa.

³²Neriaspa churin secretario Barucman musoq rollota Jeremías qoykuptinmi, Joacimpa kañasqan rollopi kaq palabrakunata Baruc qellqarqa, chay qellqamanmi Jeremiasqa chayman rikchakuq palabrakunata yapachirqa.