Read CHUYA QELLQA La Biblia en Quechua de Ayacucho 2012 Jeremías 40 Bible Online

Jeremías 40 - CHUYA QELLQA La Biblia en Quechua de Ayacucho 2012 bible

Jeremías 40

¹Rey waqaychaq soldadokunapa kamachiqnin Nabuzaradanmi, Jeremiasta preso kasqanmanta Ramá llaqtapi kachaykurqa. Nabuzaradanmi Jeremiasta tarirurqa Jerusalenmanta chaynataq Judamanta Babiloniaman preso apasqakunawan kuska cadenasqa richkaqta. Chaypa qepallantam Jeremiasta Tayta Dios rimapayarqa.

²Jeremiasta sapaqman pusaruspanmi Nabuzaradán kaynata nirqa: Yupaychasqayki Tayta Diosmi kay sasachakuykunawan kay nacionta castigananpaq rimarqa.

³Chay rimasqankunatam Tayta Dios kunan cumplirun. Kaykunaqa pasasuchkankichik paypa contranpi huchallikuspa mana kasusqaykichikraykum.

⁴Kunanmi kay cadenakunata makikimanta kachaykuni, munaptikiqa Babiloniaman hakuchik, wakpiqa ñoqam nanachikusqayki. Mana riyta munaspaykiqa hinapiyá qepakuy, kay nacionpi allpaqa makikipim kachkan, maylawmanpas rispa chaypi yachakunaykipaq.

⁵Kutiyta munaspaqa, Safanpa willkanpa otaq Ahicampa churin Gedaliaspaman kutikuy. Paytam Babilonia nacionpa reynin churarun Judá law llaqtakunapi gobernador kananpaq. Paywanyá hina llaqtaykipi yachamuy. Maypipas yachayta munasqaykimanyá ripukuy, nispa. Chaynata niykuspanmi Jeremiasta regalokunatawan mikuyta qoykuspan aviarurqa.

⁶Chaymi Jeremiasqa Mizpa llaqtapi yachaq Ahicampa churin Gedaliaspaman ripukurqa, hinaspam chaylawpi puchuq runakunawan kuska yacharqa.

⁷Judá law campokunapi puchuq soldadokunapa capitanninkunam yacharurqaku, Babiloniaman preso apasqa kanankumanta puchuq qarikunata, warmikunata, warmakunata hinaspa wakcha runakunata nanachikunanpaq chaynataq Judá nacionpi gobernador kananpaq Ahicampa churin Gedaliasta Babilonia nacionpa reynin churarusqanta.

⁸Chay runakunam karqa: Netaniaspa churin Ismael, Careapa churin Johananwan Jonatán, Tanhumetpa churin Seraías, Netofa llaqtayuq Efaipa churinkuna hinaspa Maacat llaqtayuq runapa churin Jezanías. Paykunam runankunawan kuska rirqaku Mizpa llaqtapi yachaq Gedaliaspata.

⁹Chaymi Gedalías juraspan kaynata nirqa: Caldea runakuna serviytaqa ama manchakuychikchu. Kay allpapi yachaspa Babilonia nacionpa reyninta servispaqa allinmi kankichik.

¹⁰Ñoqam kay Mizpa llaqtapi yachaspay Caldea lawmanta hamuq runakunata atiendesaq. Qamkunaqa vinotawan aceiteta ruwaspayá frutakunatawan tukuy imata huñukuychik, hinaspayá hapikusqaykichik llaqtakunapi yachamuychik, nispa.

¹¹Moab, Amón, Edom hinaspa wakin nacionkunapi yachaq Judá casta runakunapas yacharurqakum Safanpa willkan otaq Ahicampa churin Gedaliasta, Ba-bilonia nacionpa reynin, Judá nacionpi puchuq runakunapi kamachikunanpaq churarusqanta.

¹²Chaymi cheqesqanku nacionkunamanta Judaman kutimuspanku Mizpa llaqtapi yachaq Gedaliasman huñukuykurqaku. Hinaspam vinotawan tukuy rikchaq frutakunata achkallataña huñukururqaku.

¹³Careapa churin Johananmi campopi kaq tropakunapa capitanninkunawan kuska Mizpa llaqtapi yachaq Gedaliaspaman rirqaku,

¹⁴hinaspam nirqaku: Amonpa mirayninkunapa reynin Baalismi, Netaniaspa churin Ismaelta wañuchisunaykipaq kacharamun, nis-panku. Ichaqa Ahicampa churin Gedaliasmi mana paykunata creerqachu.

¹⁵Hinap-tinmi Careapa churin Johananqa Gedaliasta pakasqallapi nirqa: Netaniaspa churin Ismaelta wañurachimunaypaq saqeykuway. Manam pipas yachanqachu pim wañuchisqantaqa. ¿Imaynataq wañurachisunkimanqa? Wañurachisuptikiqa qanman huñukamuq Judá runakunam cheqerunqaku, hinaptinmi Judá nacionpi puchuq runakunapas chinkarunqaku, nispa.

¹⁶Ichaqa Careapa churin Johanantam Ahicampa churin Gedalías nirqa: Amayá chaytaqa ruwaychu. Ismaelmanta willawasqaykiqa llullam, nispa.