Read CHUYA QELLQA La Biblia en Quechua de Ayacucho 2012 Jeremías 43 Bible Online

Jeremías 43 - CHUYA QELLQA La Biblia en Quechua de Ayacucho 2012 bible

Jeremías 43

¹Yupaychasqanku Tayta Diospa tukuy ima nimusqanta llapa runakunaman Jeremías willayta tukuruptinmi,

²Osaiaspa churin Azariaswan, Careapa churin Johanán hinaspa wakin hatun tukuq runakuna, Jeremiasta nirqaku: Chay niwasqaykikuqa llullam, yupay-chasqanchik Tayta Diosqa manam nisunkimanchu karqa: “Egipto nacionmanqa ama riychikchu”, nispaqa.

³Qamtaqa Neriaspa churin Barucmi contraykupi umacharusunki Caldea runakunaman entregasqa kanaykupaq, chaynapi wañurachiwanankupaq otaq Babilonia lawman presota apawanankupaqpas, nispanku.

⁴Chaynapim Careapa churin Johananpas, tropankunapa capitannin-kunapas, lliw runakunapas, Judá nacion-pi yachaqkunapas Tayta Diospa kamachisqantaqa mana kasukurqakuchu.

⁵Aswanraqmi Careapa churin Johananwan tropankunapa llapallan capitanninkunaqa, huklaw nacionkunaman cheqechisqa kasqankumanta Judá allpapi yachanankupaq kutimuqkunatapas,

⁶qarikunata, warmikunata, warmachakunata, reypa warmi churinkunata hinaspa wakin runakunatapas huñururqaku. Paykunatam Safanpa willkan otaq Ahicampa churin Gedalías nanachikunanpaq, reyta waqaychaq soldadokunapa capitannin Nabuzaradán saqerqa. Profeta Jeremiastawan Neriaspa churin Barucmantapas Gedaliasqa nanachikurqam.

⁷Hinaspankum Tayta Diospa nisqanta mana kasukuspanku, Egipto nacionman rispanku Tafnes llaqtaman chayarurqaku.

⁸Tafnes llaqtapim Jeremiasta Tayta Dios nirqa:

⁹Judá nacionniyuq runakunapa rikusqanta, hatun rumikunata apaspa rey Faraonpa palacionman yaykuq ladrillasqa patiopi mituwan pampamuy,

¹⁰hinaspa paykunata niy: Israelpa yupaychasqan Tukuy Atiyniyuq Tayta Diosmi kaynata nin: Babilonia nacionpi serviqniy rey Nabucodonosorta pusamuptiymi kay pampasqay rumi hawanpi trononta churanqa, hinaspam carpanta sayachinqa.

¹¹Hamuspanmi Egipto nacionta atacanqa, hinaptinmi peste onqoypaq kaqkuna peste onqoywan wañunqaku, preso rinanpaq kaqkunam preso rinqaku, guerrapi wañunanpaq kaqkunam guerrapi wañunqaku.

¹²Kay Egipto nacionpi idolokunapa capillankunatapas idolonkunatawan kuskatam kañaykunqa, wakin idolokunatañataqmi presota apanqa. Imaynam oveja michiqpas usata pachanmanta pallakun, chaynam Nabucodonosorqa Egipto nacionta limpianqa, chaymantam mana pipa harkasqan hawka pasakunqa.

¹³Egipto nacionpi [3]Bet-semes llaqtapi sayachisqanku estatuakunatapas ñutuparunqam, kañaykunqataqmi Egipto nacionpi idolokunapa templonkunatapas, nispayki.