Read CHUYA QELLQA La Biblia en Quechua de Ayacucho 2012 Jeremías 9 Bible Online

Jeremías 9 - CHUYA QELLQA La Biblia en Quechua de Ayacucho 2012 bible

Jeremías 9

¹Amalaya ñawiy pukyu hina rikurirunman, amalaya weqeypas kallpaq yaku hina rikurirunman, chaynapi llaqtamasiykunapa wañusqanmanta tuta punchaw waqanaypaq.

²Imaynaraq chunniqpi samakuna wasi kanman, kay llaqtamanta chayman ayqekunaypaq. Llapallankum iskay uyaña rikurirunku, llapallankum qepanchakuqllaña rikurirunku.

³Tayta Diosmi kaynata nin: Flechachkaq hinaraqmi llullata rimanankupaq listoñalla kachkanku, kay llaqtapiqa llullakuyllañam munaychakuchkan cheqapqa manañam kanñachu; aswan-aswanmi mana allinkunaman qokurunku, Diospunim kaynata nin: Paykunaqa mana reqsisqapaqñam hapiwanku,

⁴amistadnikipipas ama hapipakuychu, wawqekipipas ama confiakuychu, wawqepurapas engañanakunkum, amistadpurapas tunpanakunkum.

⁵Sapakamam runamasinta engañan, manam pipas cheqap kaqtaqa rimanchu, llullakuymanmi amañakurunku, mana allin ruwayllamanñam qokurunku, nispa.

⁶Tayta Diosmi kaynata nin: Pantachinakuypa chawpinpim kawsakunku, engañakuq kasqankuraykum paykunaqa mana reqsiwayta munankuchu.

⁷Tukuy Atiyniyuq Tayta Diosmi kaynata nin: Ruwasqaymanta mastaqa, ¿imataraqtaq runaykunawan ruwasaq? Qorita ninapi chulluchichkaq hinaraqmi paykunataqa chuyanchasaq.

⁸Qallunkupas wañuchikuq flecha hinaraqmi engañollata rimanku. Amistadninkutam “hawkayay” qampaq kachun ninku sonqonkupim ichaqa wañuchinankupaq tanteanku.

⁹Chaykuna ruwasqankumantaqa ¿manachu paykunata castigasaq? Chayna ruwasqankumantaqa ¿manachu paykunata vengakusaq? Ñoqa Tayta Diosmi chaynata nini.

¹⁰Orqokunapi, chunniqkunapi waqachiptiymi, waqasqaykichik uyarikunqa. Pastokunapa kananmi mana imayuq qepanqa, manañam pipas chaynintaqa purinqañachu, animalkunapa qapariyninpas manañam uyarikunqañachu; alton pawaq animalkunawan purun animalkunapas pasaypaqtam chinkarunqaku.

¹¹Tayta Diosmi kaynata nin: Jerusalén llaqtatam tuñichisaq, atoqkunapa yachananmanñam tikrarusaq; Judá nacionpi llaqtakunatam manaña runayuq kanankama chunnirachisaq.

¹²Ñoqañataqmi nirqani: ¿Pitaq yachaysapa runa kanman kaykunata yachananpaq? ¿Pimantaq kaykunata Tayta Dios rimapayarqa chaynapi wakin runakunamanpas willakunanpaq? ¿Ima-nasqataq kay nación purmachisqa kachkan, manaña pipapas purinan chunniq kanankama? nispa.

¹³Hinaptinmi Tayta Diosñataq niwarqa: Chaykunaqa pasakurqa Israelman qosqay kamachikuyniykunata saqerus-qankuraykum, paykunaqa nisqaykuna-tapas manam kasukurqakuchu nitaq-mi ruwaymanpas churarqakuchu.

¹⁴Aswanraqmi sonqonkuta rumiyarachispanku, ñawpaq taytankuta qatipakuspanku Baal idolokunataña yupaycharqaku.

¹⁵Chayraykum ñoqa Tukuy Atiyniyuq Tayta Dios kay-nata nini: Kay runakunamanmi ajenjota mikuchisaq, hinaspaymi venenoyuq yakuta tomachisaq.

¹⁶Taytankupapas kikinkupapas mana reqsisqanku nacionkunamanmi cheqechisaq. Espa-dawan qatikachachispaymi manaña chullapas puchunankukama tukusaq, nispa.

¹⁷Tukuy Atiyniyuq Tayta Diosmi kaynata nin: Yaw, runakuna, aya takita yachaq warmikunata qayamuychik, chaypaq hina allinta takiy yachaq warmikunata qayachimuychik, nispa.

¹⁸Chaylla hamuspa ñoqanchikmanta waqachunku, ñawinchikyá weqewan huntarichun, qechipranchikmantapas weqenchikyá suturichun.

¹⁹Sión llaqtamantam qaparillawanña waqasqanku uyarikamuchkan, qaparillawanña waqaspa kayna nisqankum uyarikamuchkan: ¡Pasaypaq tuñisqam qeparunchik! ¡Hatun penqaypim rikurirunchik! Wasinchikkuna tuñichisqa kasqanraykum nacionninchikta saqesunchik.

²⁰Yaw warmikuna, Tayta Diospa palabranta uyariychik, nisqankunatayá chaskiychik. Warmi wawaykichikta waqanankupaq yachachiychik, warmimasikichikman kay aya takita yachachiychik:

²¹Wañuymi wasinchikman yaykuramun, wañuymi palacionchikkunaman chayaramun; warmakunatam callekunapi wañuchichkan, jovenkunatam plazakunapi wañuchichkan.

²²Runakunapa ayanmi hatun ispay hina chakrakunapi wischurayachkan, rutuqkunapa qepanpi gavillakuna hinam wischurayachkan, manam pipas hoqariq kanchu. Ñoqa Tayta Diosmi chaynata nini.

²³Tayta Diosmi kaynata nin: Yachaysapapas, amayá yachaysapa kayninmantaqa alabakuchunchu, allin qaripas, amayá allinnin qari-qari kayninmantaqa alabakuchunchu, apupas, amayá apu kayninmantaqa alabakuchunchu.

²⁴Pipas alabakuyta munaspaqa alabakuchun ñoqa reqsiwasqanmanta, ñoqa Tayta Dios kasqayta yachasqanmanta, kuyapayakuywan allin arreglo ruwaq kasqaymanta, kay pachapi allinkuna ruwaq kasqaymanta; chayna ruwaytam ñoqaqa munani. Ñoqa Tayta Diosmi chaynata nini.

²⁵Tayta Diosmi kaynata nin: Hamuchkanmi punchawkuna, qari kayninkupi señalasqatapas chaynataq mana señalasqatapas;

²⁶Judá naciontapas, Egiptotapas, Amontapas, Edomtapas, Moabtapas hinaspa rinrinkupa ñawpaqnin lawpi kaq chukchanku rutukuqkunatapas chaynataq chunniqpi yachaqkunatapas castiganaypaq. Chay nacionpi kaqkunaqa llapallankum qari kayninkupi mana señalasqa runakuna, Israelpa mirayninkunañataqmi sonqonkupi mana señalasqa runakuna.