Read CHUYA QELLQA La Biblia en Quechua de Ayacucho 2012 Lamentaciones 3 Bible Online

Lamentaciones 3 - CHUYA QELLQA La Biblia en Quechua de Ayacucho 2012 bible

Lamentaciones 3

¹Ñoqam kani Tayta Diospa piñakuyninpi ñakariq runa.

²Paymi mana kanchaypa kanan tutayayninta pusawarqa.

³Sapa kutillam makinwan castigawarqa.

⁴Aycha qaraytapas paymi machuyarachin, paytaqmi tulluykunatapas ñutuparun.

⁵Llakikuytawan ñakariytam perqata hina muyuriqniypi hatarirachin.

⁶Ñawpaq watakunapi wañuqta hinam, tutayaq ukullapi kawsachiwarqa.

⁷Lloqsiyta mana atinaypaqmi kayninta chayninta wichqaruwarqa, llasaq cadenakunawanmi ñakarichiwarqa.

⁸Yanapaykuwananpaq qayakuptiypas, manam kaqpaqpas hapirqachu.

⁹Ñanniytapas labrasqa rumikunawanmi wichqarurqa, risqay ñanniykunatapas huklawmanmi muyurachirqa.

¹⁰Ukumari hinam payqa wateqawarqa, pakakuq león hinam payqa wateqawarqa.

¹¹Ñanniymanta pantarachiwaspam llikiparuwarqa, paqway mancharisqatam saqeruwarqa.

¹²Wañurachiwananpaqmi flechanta ñoqa lawman chutariykurqa.

¹³Flechankuna kacharimusqanmi sonqoyman yaykuruwarqa.

¹⁴Llaqtamasiykunapa asipayananñam rikuriruni, sapa punchaw takipayananñam rikuriruni.

¹⁵Tayta Diosmi llakikuywan huntaykuwarqa, qatqe ajenjowan hinam sinkarachiwarqa.

¹⁶Pampaman ñupuruwaspam kiruyta pakiruwarqa, pampaman wischuykuwaspam allpata akurachiwarqa.

¹⁷Sonqoymantam hawkayay karunchakurun, kusikuy kawsaytapas manañam tariniñachu.

¹⁸Chayraykum kaynata nini: Kallpaypas tukurunñam, Diospi hapipakuyniypas chinkarunñam, nispay.

¹⁹Ñakarisqaytawan sapallay kasqaytam yuyarini, ajenjo hina qatqe llakikuyniytam yuyarini.

²⁰Chaykunatam sumaqta yuyarini, hinaspam manaña kallpayuq kachkani.

²¹Chaywanpas paypim hapipakuni, chayraykum yuyaymanaspay nini:

²²Tayta Diospa kuyapayakuyninraykum mana puchukarunchikchu, llakipayakuyninqa mana haykapipas tukuqmi.

²³Paypa kuyapayakuyninqa sapa tutapaytam musoqlla, mayna hatunmi cheqap kayninpas, nispa.

²⁴Ñoqam nini: “Tayta Diosmi tukuy ima kapuwaqniyqa, chayrakum payllapi hapipakullasaq”, nispay.

²⁵Tayta Diosqa ancha allinmi hapipakuqninkunapaqqa, ancha allinmi maskaqninkunapaqqa.

²⁶Tayta Dios yanapawananchikpaqqa upallalla suyaymi aswan allinqa.

²⁷Runapaqqa warma kasqanmantapuni yugo apaymi aswan allin.

²⁸Runata Tayta Dios kamachiptinqa, sapallan tiyaspanyá upallalla suyachun.

²⁹Uchuychakuspayá siminta allpakama churachun, ichapas Tayta Diosqa yanapaykunmanraq.

³⁰Pim laqechuqninman uyanta qochun, pasaypaq penqayman churasqa kachun.

³¹Señorqa manam wiñaypaqchu runataqa saqerun.

³²Pitapas llakichispanqa paymantam llakipayarikun, ancha kuyapayakuq kasqanraykum llakipayarikun.

³³Payqa manam munanchu runakuna llakichiytaqa, nitaqmi munanchu runakuna ñakarichiytapas.

³⁴Kay pachapi carcelasqa runakunata sarutyachkaq hina ñakarichiqtaqa,

³⁵Tukuy imapa hawanpi Diospa qayllanpi runamasinpa derechon qewiruqtaqa,

³⁶runapa quejanta qewiruqtaqa Tayta Diosmi llumpayta cheqnin.

³⁷¿Pitaq imatapas rimanman Señorpuni mana kamachikuptinqa?

³⁸¿Manachu hanaq pachamanta runapa allinninpaq kaqpas otaq mana allinninpaq kaqpas hamun?

³⁹¿Imanasqataq runa quejakun huchapi kawsachkaspaqa?

⁴⁰Imaynam kawsasqanchiktayá allinta qawarikusun, huktawanyá Tayta Diosman kutirikusun.

⁴¹Hanaq pachapi Diosman sonqonchikta kicharisun, makinchiktapas haywarispa kaynata nisun:

⁴²Ñoqaykum contraykipi huchallikuruniku, chayraykum mana pampachawarqankikuchu.

⁴³Anchata piñakuspaykim qatikachawarqankiku, mana llakipayarispam wañuchiwarqankiku.

⁴⁴Mañakusqaykuta mana uyarinaykipaqmi, puyukunawan harkarachikurqanki.

⁴⁵Llapallan runakunapa qayllanpim penqaypaq millakuypaqta ruwaruwarqankiku.

⁴⁶Llapallan enemigoykum contraykupi rimarqaku.

⁴⁷Mancharikuypaq trampakunam, ñakariywan llakikuymi, hawaykuman chayaramurqa.

⁴⁸Kuyasqay llaqtay tuñisqa kaptinmi, weqeykunapas mayu hinaraq kallparichkan.

⁴⁹Mana taniytam weqellaykuna sutuchkan, manañam hawkayaypas kanñachu,

⁵⁰hanaq pachamanta Tayta Dios qawarimunankama.

⁵¹Llaqtaypi warmikuna ñakarisqankuta qawaspaymi ñawiykunapas nanay-nanay kanankama waqachkani.

⁵²Alton pawaq animalta hinam enemigoykuna yanqamanta hapiruwarqaku,

⁵³kawsachkaqllatam pozoman wischuykuwarqaku, hinaspam rumiwan taparuwarqaku.

⁵⁴Yakupas umaykamam pampaykuwarqa, chaymi nirqani: “Wañukusaqñachá”, nispay.

⁵⁵Dios Taytalláy, pozo ukumantam sutikita qayakamullarqani,

⁵⁶qanmi uyariykullawarqanki, mañakusqaytam chaskiykullawarqanki,

⁵⁷qayakamusqay punchawpim asuykamuwaspayki: “Ama manchakuychu”, niykullawarqanki.

⁵⁸Señorlláy, qanmi nanaykachikuwarqanki, vidallaytam libraykuwarqanki.

⁵⁹Dios Taytalláy, ñakarisqaytam rikurqanki, yanapaykuwaspayki allin arreglota ruwaykullaway.

⁶⁰Qanmi vengakuy munawasqankuta rikurqanki, contraypi tanteasqankutapas yachankim.

⁶¹Dios Taytalláy, kamiwasqankutam uyarirqanki, contraypi mana allinkuna tanteasqankutam uyarirqanki.

⁶²Ñataq-ñataq contraypi rimasqankutam uyarirqanki, enemigoykuna contraypi kasqantam qawarqanki.

⁶³Tukuy ruwasqankupi burlakuwasqankuta qawariy, takita takisparaq asipayawasqankuta qawariy.

⁶⁴Dios Taytalláy, imam ruwasqankuman hina paykunaman pagaykapuy.

⁶⁵Paykunapa sonqonkuta rumiyarachiy, paykunaman ñakayniki pasaypaqta chayachun.

⁶⁶Dios Taytalláy, paykunatayá piñakuspayki qatikachay, qayllaykimanta kay pachapi chinkarachiy.