Read CHUYA QELLQA La Biblia en Quechua de Ayacucho 2012 Ezequiel 10 Bible Online

Ezequiel 10 - CHUYA QELLQA La Biblia en Quechua de Ayacucho 2012 bible

Ezequiel 10

¹Chaymantam chay querubinkunapa hawanpi kaq bovedapi, zafiro rumimanta ruwasqa tronoman rikchakuqta rikurqani.

²Hinaptinmi linomanta pachayuq runata Tayta Dios kaynata nirqa: Wak querubinkunapa ukunpi kaq ruedakunapa chawpinman yaykuy hinaspa paykunapa chawpinpi kaq nina sansata hapispayki llaqtapa hawanman machqey, nispa. Chaymi chay runaqa qawachkaptiy yaykururqa.

³Llapa querubinkunañataqmi templopa sur lawninpi sayachkarqaku, puyuñataqmi uku law patiota huntaykurqa.

⁴Chaymi Tayta Diospa kanchariynin chay querubinkunapa hawanmanta hoqarikuruspan templopa punkunman rirqa, hinaspam temploman huntaykurqa, Tayta Diospa kanchariyninmi chay patiotapas huntaykurqa.

⁵Chay querubinkunapa rapranpa rapapapasqanmi hawa patiokamaraq uyarikurqa, uyarikurqaqa Tukuy Atiyniyuq Tayta Diospa rimaynin hinaraqmi.

⁶Linomanta pachayuq runata kamachispanmi Tayta Dios nirqa: Wak querubinkunapa ukunpi kaq ruedakunapa chawpinmanta nina sansata hurqomuy, nispa. Chaymi yaykuruspan ruedakunapa chawpinpi sayarqa.

⁷Hinaptinmi huknin querubín makinta haywarispan chawpinkumanta ninata hapiykuspan linomanta pachayuq runapa makinman hapiykachirqa; chay runañataqmi chaskiykuspan pasakurqa.

⁸Chay querubinkunapa rapranpa ukupim runapa makin kaqlla rikurirurqa.

⁹Qawarispaymi querubinkunapa waqtanpi tawa ruedakunata rikurqani, sapa querubinpa waqtanpim huk rueda kasqa. Chay ruedakunaqa crisólito rumi hinam llipipipisqa.

¹⁰Chay tawan ruedakunam kaqkamalla kasqaku, rikchayninkum kasqa iskay chakanakuq rueda hina.

¹¹Rispapas tawan lawmanmi mana muyurispa derecholla risqaku, punta kaq ruedapa risqanmanmi qepa kaq ruedakunapas mana muyurispa risqaku.

¹²Paykunapaqqa cuerponkupas, wasankupas, makinkupas, raprankupas hinaspa ruedakunapas kanchariypa huntasqanmi kasqaku.

¹³Uyarichkaptiymi chay ruedata “carreta” nispa suticharqa.

¹⁴Chay querubinkunaqa sapakamam tawa uyayuq kasqaku: Punta kaq uyanmi toropa uyanman rikchakusqa, iskay kaqmi runapa uyanman rikchakusqa, kimsa kaqmi leonpa uyanman rikchakusqa, tawa kaqñataqmi ankapa uyanman rikchakusqa.

¹⁵Chay querubinkunaqa kasqa Quebar mayu patanpi hina rikusqay kaqkunallam. Chay querubinkunam hoqarikururqaku.

¹⁶Chay querubinkuna puriptinkum, waqtankupi ruedakunapas purisqaku, pampamanta hoqarikunankupaq raprankuta kichariptinkupas ruedakunaqa manam paykunamanta rakikurqachu.

¹⁷Paykuna sayaykuptinqa ruedakunapas sayaqkum, paykuna hoqarikuptinqa ruedakunapas hoqarikuqkum; chaynaqa karqa chay querubinkunapa espiritun ruedakunapi kasqanraykum.

¹⁸Chaymantam Tayta Diospa kanchariyninqa templopa punkunmanta hoqarikuruspan querubinkunapa hawanman tiyaykurqa.

¹⁹Chay querubinkunañataqmi raprankuta kicharis-pa qawachkaptiy pampamanta hoqarikururqaku. Paykuna hoqarikuptinmi ruedakunapas paykunawan kuska hoqarikuspanku templopa punkunpi intipa qespimunan lawpi sayaykurqaku. Tayta Diospa kanchariyninñataqmi paykunapa hawanpi karqa.

²⁰Chaykunaqa kasqa Quebar mayupa patan pampapi rikusqay runaman rikchakuq kawsaqkunam; chaypim paykunata rikurqani Tayta Diospa ukunpi kachkaqta, chaymi querubinkuna kasqanta musyarurqani.

²¹Paykunaqa sapakamam kasqaku tawa uyayuq chaynataq tawa raprayuq; raprankupa ukunpiñataqmi kasqa runapa makinman rikchakuq.

²²Uyankupas kasqa Quebar mayupa patanpi rikusqay kawsaqkunapa uyanman rikchakuqmi, paykunaqa sapakamam derecholla ñawpaqman risqaku.