Read CHUYA QELLQA La Biblia en Quechua de Ayacucho 2012 Ezequiel 12 Bible Online

Ezequiel 12 - CHUYA QELLQA La Biblia en Quechua de Ayacucho 2012 bible

Ezequiel 12

¹Tayta Diosmi kaynata niwarqa:

²Runapa churin, qamqa mana kasukuq runakunapa chawpinpim yachachkanki, paykunaqa ñawiyuq kaspapas manam rikukunkuchu, rinriyuq kaspapas manam uyarikunkuchu, paykunaqa mana kasukuq miraykunam.

³Chaynaqa, runapa churin, preso apasqa hina lloqsinaykipaq apanayki kaqkunata allichakuy hinaspa paykuna qawasuchkaptiki punchaw pacha lloqsiy. Wasikimanta lloqsispa huklawman riy, icharaqpas mana kasukuq runakuna kasqankuta reqsikunmanku.

⁴Preso apasqa hina rinaykipaqmi lliwpa rikusqanta tukuy imaykikunatapas punchaw pacha hurqonki, tardeykuqtañataqmi lliw qawasuchkaptiki preso apasqa hina lloqsinki.

⁵Lliwpa qawasqantam perqata uchkuruspayki imaykikunatapas chayninta hurqonki.

⁶Hinaspam tutaykamuchkaptin lliw qawasuchkaptiki imaykikunatapas sawakuykuspa lloqsinki. Llaqtata mana qawanaykipaqmi uyaykita tapakunki. Qamtaqa Israelpa mirayninkunapaqmi huk señalta hina churayki, nispa.

⁷Chaymi Tayta Diospa kamachiwasqanman hina apanay kaqkunata qepichakuruspay, preso hina punchaw pacha lloqsirqani. Tardeykuytam perqata uchkururqani, yaqa tutaykuqtañataqmi lliwpa qawasqanta imaykunatapas sawakuykuspay pasakurqani.

⁸Paqarinnintin achikyaqtañataqmi Tayta Dios niwarqa:

⁹Runapa churin, ¿manachum Israelpa mirayninkunaqa “imatataq ruwachkanki” nispallapas tapusurqanki?

¹⁰Chaynaqa, ñoqapa rantiypi paykunaman kaynata nimuy: Kay profeciaqa Jerusalén llaqtapi kamachikuqpaqmi hinaspa chaypi tarikuq Israelpa mirayninkunapaqmi, nispayki.

¹¹Paykunaman kaynata nimuy: Ño-qam qamkunapaq señal hina kani, kay ruwasqayta hinam qamkunatapas ruwasunkichik. Llapallaykichikmi huklaw nacionkunaman preso apasqa kankichik.

¹²Paykunapa kamachiqninkupas tukuy imankunata sawakuykuspanmi perqapi ruwasqanku uchkunta tutaykuqta lloqsinqa. Payqa muyuriqninpi kaqkuna mana qawananpaqmi chaynataq llaqtatapas mana qawananpaqmi uyan tapasqa lloqsinqa.

¹³Ñoqañataqmi hawanman mallayta wischuykuspay payta hapirusaq, hinaspaymi Caldea runakunapa yachanan Babilonia nacionman apachisaq, ichaqa manam chay nacionta rikunqachu, hinaspam chaypi wañumunqa.

¹⁴Muyuriqninpi kaq yanapaqninkunatapas chaynataq tropankunatapas tukuy hinastinmanmi cheqerachisaq, hinaspaymi paykunataqa espada makintin qatikachasaq.

¹⁵Nacionkunaman cheqerachispay tukuy hinastinman wischuruptiyñam Tayta Dios kasqayta yachanqaku.

¹⁶Ichaqa guerramantawan yarqaymanta hinaspa peste onqoymantam asllatapas puchuykachisaqraq, chaynapi maylaw nacionkunamanña rispapas millakuypaq ruwasqankumanta willakunankupaq. Chaynapim Tayta Dios kasqayta yachanqaku, nispa.

¹⁷Huktawanmi Tayta Dios kaynata niwarqa:

¹⁸Runapa churin, mikuytapas katkatatastin mikuy, yakutapas sinchi manchakuywan tomay.

¹⁹Hinaspa llaqtapi runakunaman kaynata nimuy: Jerusalén llaqtapi yachaqkunatawan Israel nacionpi kaqkunatam Tayta Dios kaynata nin: Tantankutapas manchakuywanmi mikunqaku, yakutapas katkatatastinmi tomanqaku; chaypi yachaqkuna mana allinkunata ruwasqankuraykum nacion-pas purmachisqa kaspa mana imayuq chunninqa.

²⁰Runakunapa yachanan llaqtakunam tuñichisqa kanqa, nacionpas purmachisqam kanqa, chaynapim Tayta Dios kasqayta yachankichik, nispayki.

²¹Huktawan rimapayawaspanmi Tayta Dios kaynata niwarqa:

²²Runapa churin, ¿ima ninantataq Israelpa mirayninkuna nichkanku: “Punchawkuna pasaptinpas profetapa rimasqanqa manam cumplikunchu”, nispankuqa?

²³Chaynaqa, ñoqa Tayta Diospa nisqayta kaynata nimuy: Chay rimaynikichiktam chinkarachisaq, hinaptinmi Israel nacionpiqa manaña chaynataqa rimankichikñachu. Ñam hichpamuchkanña visionkunapi qawachisqay kaqkuna cumplikunan punchaw.

²⁴Israel ukupiqa manañam kanqañachu: “Diosmi qawaykachiwan” nispa llullakuqkunawan profeta tukuqkunapas.

²⁵Ñoqa Tayta Diosqa kikiypunim rimasaq, imam rimasqayqa chayllam cumplikunqa. Mana kasukuq runakuna ñawikichikwanmi rikunkichik; imam rimasqaytaqa ruwasaqpunim. Ñoqa Tayta Diosmi chaynata nini.

²⁶Huktawan rimapayawaspanmi Tayta Diosqa kaynata niwarqa:

²⁷Runapa churin, Israelpa miray-ninkunam nichkanku: Profetapa rimas-qankunaqa haykapiraqya cumplikunqapas, nispanku.

²⁸Chaynaqa, ñoqa Tayta Diospa nisqayta paykunaman nimuy: Ñoqapa rimarisqaykunaqa chayllam cumplikunqa. Ñoqa Tayta Diosmi chaynata nini.