Read CHUYA QELLQA La Biblia en Quechua de Ayacucho 2012 Ezequiel 16 Bible Online

Ezequiel 16 - CHUYA QELLQA La Biblia en Quechua de Ayacucho 2012 bible

Ezequiel 16

¹Tayta Diosmi rimapayawaspan kaynata niwarqa:

²Runapa churin, Jerusalenpi yachaq-kunaman millakuypaq ruwasqankuta willamuy.

³Ñoqa Tayta Diosmi Jerusalén llaqtapa contranpi kaynata nini: Canaán allpapim qamqa nacerqanki, taytaykipas Amor casta runam karqa, mamaykiñataqmi Het castamanta.

⁴Naceruptikiqa manam pupuykitapas kuchurqachu, manam kachiwanpas qaqosurqankichu, nitaqmi pipas qellpusurqankichu.

⁵Manam pipas llakipayasurqankichu, manataqmi chaykuna ruwaykusuqnikipas karqachu, aswanqa qanmanta millakuspankum nacesqayki punchaw hawaman wischurusurqanki.

⁶Ichaqa chayninta pasachkaspaymi yawarnikipa chawpinpi qochpachkaqta rikurqayki, chaymi yawarnikipa hawanpi rikuruspay nirqayki: ¡Kawsakuy! nispa.

⁷Purunpi sachata hinam wiñachirqayki, hatunyaruspaykim kuyayllapaq warmiña rikurirurqanki. Ñuñuykikunawan chukchaykipas wiñarurqam, ichaqa pasaypaq qalallam karqanki.

⁸Huktawan chayninta pasachkaspaymi, casarakunaykipaq hina tiempoykipiña kasqaykita qawaykurqani. Chaymi capayta mastarispay qalalla cuerpoykita tapaykurqani; hinaspam ñoqapaña kanaykipaq qanwan pactota ruwarqani; chaymantam ñoqapaña karqanki. Ñoqa Tayta Diosmi chaynata nini.

⁹Hawaykipi kaq yawartapas yakuwan mayllaykuspaymi miski asnaq aceitewan llusiykurqayki.

¹⁰Sumaq bordasqa pachawanmi pachaykachirqayki, fino qalaskunamanta usutawanmi churaykachirqayki, linomanta chumpiwanmi weqawnikitapas wataykurqayki, seda pachakunawanmi pachaykachirqayki.

¹¹Alhajakunawanmi churaykurqayki, makikikunamanpas brazaletekunatam churaykurqayki, kunkaykimanpas collartam churaykurqayki.

¹²Senqaykimanpas huk anillotam churaykurqayki, rinriki-manpas aretekunatam churaykurqayki, umaykimanpas huk coronatam churay-kurqayki.

¹³Chaynatam qori-qollqewan adornarqayki, pachaykipas fino linomanta hinaspa sedamanta sumaq bordasqam karqa. Mikunaykipas allinnin tantawan, miel hinaspa olivos sachapa aceitenmi karqa. Kuyayllapaq rikuriruspaykim reinaña karqanki.

¹⁴Kuyayllapaq kasqaykiraykum huklaw nacionkunapa ancha reqsisqanña rikurirurqanki, suma-sumaqta adornaykuptiymi ancha kuyayllapaq karqanki. Ñoqa tayta Diosmi chaynata nini.

¹⁵Ichaqa kuyayllapaq kaynikimanmi hapipakururqanki, hinaspam ancha reqsisqa kasqaykirayku chuchumika hinaña rikurirurqanki, llapallan chayninta puriqkunawanmi qanrakurqanki.

¹⁶Chay pachaykikunawanmi ídolo yupaychanayki carpakunata moqokunapi ruwakururqanki, chaykunapim hukwan-hukwan qanrakurqanki. Chaynakuna ruwayqa manam haykapipas karqachu, nitaqmi kanqachu.

¹⁷Qamqa qorimanta qollqemanta alhajakuna qosqaywanpas qariman rikchakuq idolokunatam ruwakururqanki, hinaspam chaykunawan qanrakururqanki.

¹⁸Sumaq bordasqa pachaykiwanmi chaykunata pachachirqanki, hinaspam miski asnaq aceiteytawan inciensoytaraq payku-naman ofrecerqanki.

¹⁹Mikunaykipaq qosqay trigo harinatawan aceiteta hinaspa abejapa miskintapas paykunamanmi qoykurqanki, miski asnaq ofrendata hinaraqmi paykunaman ofrecerqanki. Ñoqa Tayta Diosmi chaynata nini.

²⁰Wawaykikunatapas qarita-warmitam mikuyta hinaraq chay idolokunaman ofrecerqanki. ¿Asllapaqchu hapirqanki chuchumikaman tikrakurusqaykita?

²¹¿Chaychum wawaykikunataraq kañaspa chay idolokunaman ofrecerqanki?

²²Qamqa millakuypaq kaqkunata ruwaspam chaynataq hukwan-hukwan qanrakuspam imaynam wawa kaspayki qalalla kasqaykitawan yawarnikipi qochpasqaykitapas manaña yuyankiñachu.

²³Chayraykum ñoqa Tayta Dios kay-nata nini: ¡Ay, imaynaraq kanki chay millakuypaq mana allin kaqkuna ruwasqaykimanta!

²⁴Plazakunapi, esquinakunapi callekunapi idoloykikunapaqmi capillakunata ruwarqanki, hinaspam chaypi qanrakurqanki.

²⁵Ñanpa hawankunapim capillakunata hatarichirqanki, chaykunapim kuyayllapaq kaynikita qachacharqanki. Chayninta puriqmanqa lliwmanmi cuerpoykita qorqanki. Hukwan-hukwanmi qanrakurqanki.

²⁶Vecinoyki Egipto runakunawanmi qanrakurqanki, chuchumika kaynikipi millakuypaq kaqkunata ruwaspam piñachiwarqanki.

²⁷Chayraykum qamta castigaspay mikunaykitapas asllayachirqani, hinaspam cheqnisuqniki filisteokunaman qoykurqayki munasqankuta ruwasunaykipaq; chay millakuypaq kaqkuna ruwasqaykimantaqa paykunaraqmi penqakunkupas.

²⁸Chaywanpas mana wanaspam Asiria runakunawanpas qanrakurqanki, ichaqa manam chaywanpas contentarqankichu.

²⁹Chaynallataqmi Babilonia nacionpi negociante runakunawanpas aswan-aswanraq huchapakurqanki. Aswanqa manam chaywanpas hawkachu karqanki.

³⁰Ñoqa Tayta Diosmi kaynata nini: Sonqoykiqa pimanpas chaylla wayllukuykuqmi karqa; millakuypaq kaqkunata ruwachkaspapas chuchumika warmimantapas aswan mana penqakuqraqmi rikurirurqanki.

³¹Ñanpa hawankunapim, lliw plazakunapim idoloykikunata yupaychanaykipaq altarkunata hatarichirqanki; chaykunapim tukuy rikchaq qarikunawan qanrakurqanki. Ichaqa manam chuchumika hinachu ruwarqanki, qamqa manam pimantapas cobrarqankichu.

³²Qosayuq kachkaspa pierdekuq warmi hinam qamqa mana reqsisqaykikunawan kakurqanki.

³³Llapa chuchumikaqa piwan karuspapas cobranmi, qanmi ichaqa qanrakusqayki runakunamanpas rega-lokunataraq pagarqanki. Tukuy hinas-tinmanta hamuspanku qanwan huchallikunankupaqmi regalokunataraq qorqanki.

³⁴Qamqa manam wakin warmikuna hinachu ruwarqanki, huchallikunankupaqqa manam pipas maskasunkichu, nitaqmi pagasunkichu, aswanqa qamraqmi paykunamanqa pagankipas. Chayna kaynikiwanmi mana wakin warmikunamanqa rikchakunkichu.

³⁵Chaynaqa, yaw chuchumika warmi, ñoqa Tayta Diospa nisqayta uyariy.

³⁶Ñoqa Tayta Diosmi kaynata niki: Qamqa mana penqakuspam qalalla cuerpoykita tukuy rikchaq runakunaman hinaspa millakuypaq idoloykikunaman qoykurqanki; chay idolokunaman ofrecenaykipaqmi wawaykikunata nakarqanki.

³⁷Chayraykum qanrakusqayki waynaykikunata llapallanta huñurusaq, huñurusaqtaqmi kuyasqayki kaqkunatapas chaynataq cheqnisqayki kaqkunatapas. Muyuriqnikiman huñuruspaymi qayllankupi llatanarusqayki, hinaptinmi llapallanku qalalla cuerpoykita qawanqaku.

³⁸Qosayuq kachkaspa pierdekuq warmita hinam chaynataq runa wañuchiqta hinam juzgasqayki, hinaspaymi sinchi piñakuyniypi chaynataq celoso kayniypi wañuyman qoykusqayki.

³⁹Paykunaman qoykuptiymi idoloykikunata yupaychanaykipaq capillakuna ruwasqaykitapas tuñichinqaku. Paykunam pachaykita chusturususpayki sumaq alhajaykikunatapas apakunqaku, hinaspam pasaypaq qalallata saqerusunki.

⁴⁰Contraykipim llaqtakunata hatarichimunqaku, paykunam rumiwan choqaparususpayki espadawan wañuchisunki.

⁴¹Wasikitapas kañaspankum llapa warmikunapa qayllanpi juzgasunki. Chaynapim hukwan-hukwan qanrakuynikita puchukarachisaq, hinaptinmi waynaykikunamanpas manaña pagankiñachu.

⁴²Chaynatam contraykipi piñakuyniyta tanichisaq, celoso kayniypas tukunqam, hawkayaspaymi manaña mastaqa piñakusaqchu.

⁴³Qanmi sipas kaspa imaynam kasqaykita qonqarurqanki, hinaspam tukuy chay mana allinkunata ruwaspa piñachiwarqanki; chayraykum imaynam kawsasqaykimanta castigasqayki. Ñoqa Tayta Diosmi chaynata nini.

⁴⁴Rikchanachiy rimaq runakunam qanmanta kaynata rimanqaku: “Imaynam maman karqa chaynallam wawanpas kanqa”, nispanku.

⁴⁵Qamqa kanki qosantapas wawan-kunatapas cheqniq warmipa wawanmi. Chaynallam ñañaykikunapas qosankutawan wawankuta cheqnirqaku. Het casta warmim mamaykichikpas karqa, taytaykichikñataqmi Amor casta runa karqa.

⁴⁶Mayor ñañaykim Samaria, paymi wawankunapiwan norte lawnikipi yachachkanku; Sodomañataqmi sullka ñañayki, paypas wawankunapiwanmi sur lawnikipi yachachkanku.

⁴⁷Qampas paykunapa imaynam kawsasqankutam qatipakurqanki, hinaspam millakuypaq ruwasqankuta ruwarqanki, ichaqa chaykunawanpas mana contentaspam paykunamantapas aswan millakuypaq kaqkunataraq ruwarqanki.

⁴⁸Chayraykum ñoqa Tayta Dios kay-nata nini: Ñañayki Sodomawan wawan-kunapas manam qanwan wawaykiku-napa ruwasqaykichikta hinaqa ruwarqakuchu.

⁴⁹Ñañayki Sodomapa mana allinkuna ruwasqanqa kaymi karqa: Payqa wawankunapiwanmi, achkallaña mikunayuq kasqankurayku, tukuy imayuq kaspa hawka kawsakusqankurayku hatun tukuqllaña karqaku. Ichaqa manam wakchakunatawan mana imayuqkunatapas yanapaykurqakuchu.

⁵⁰Hatun tukuqllaña rikuriruspankum millakuypaq kaqkunataña qayllaypi ruwarqaku, chayraykum qawasqaykipi hinapas chinkarachirqani.

⁵¹Samariam ichaqa tukuy millakuypaq kaqkuna ruwasqaykipa partellantapas mana huchallikurqachu. Qamqa paykunamantapas paqway millakuypaq kaqkunatam ruwarqanki; qanwan rikchanachisqaqa paykunaqa mana huchayuqmanraqmi rikchakunkupas.

⁵²Qamqa ñañaykikunamantapas aswan millakuypaqtaraq huchallikuspam paykunataqa mana huchayuqpaq hina qawasqataraq rikurirachinki, chaynaqa penqakuymanta kukurayay, penqaypi kasqaykita aguantay, qamqa ñañaykikunatam mana huchayuqta hina ruwarunki.

⁵³Sodomatawan Samariatam wawan-tintakama preso apasqa kasqankumanta kutichimusaq, qamtapas preso risqaykimantam kutichimusqayki,

⁵⁴chaynapim sasachakuynikikunata qepikuykuspa tukuy ima ruwasqaykimanta penqakunki. Chayna kasqaykim paykunapa sonqonta tiyachinqa.

⁵⁵Ñañayki Sodomawan ñañayki Samaria wawantinkama ñawpaqta hina kaptinkum, qampas wawaykikunapiwan imaynam ñawpaqta kasqaykichikpi hina kankichik.

⁵⁶Hatun tukuq kaynikipim ñañayki Sodoma castigasqa kaptin burlakurqanki,

⁵⁷millakuypaq kaqkuna ruwasqaykipas manaraq rikukuchkaptin. Kunanmi ichaqa Edom lawpi llaqtakunapas, filisteokunapas chaynataq llapallan muyuriqnikipi yachaqkunapas millakuywan qawasunki.

⁵⁸Chaynaqa, millakuypaq kaqkuna ruwasqaykimanta castigoykitam aguantanki. Ñoqa Tayta Diosmi chaynata nini.

⁵⁹Ñoqa Tayta Diosmi kaynata nini: Juramentowan pacto ruwasqanchikta mana kasukusqaykimantam merecesqaykiman hina castigasqayki.

⁶⁰Ñoqam ichaqa warma kaptikiraq pacto ruwasqayta yuyarisaq, hinaspaymi wiñaypaq pactota qanwan ruwasaq.

⁶¹Mana pacto ruwasqanchikpa parten kachkaptinpas, mayor ñañaykitawan sullka ñañaykita wawaykipaq hina qoykuptiymi, ñawpaqta millakuypaq kaqkuna ruwasqaykita yuyarispa penqakuymanta ñakakunki.

⁶²Huktawanmi pactota qanwan ruwasaq, hinaptinmi Tayta Dios kasqayta yachanki.

⁶³Mana allin ruwasqaykikunamanta pampachaykuptiymi chaykunata yuyarispa penqakuymanta simikitapas manaña kicharinkichu. Ñoqa Tayta Dios chaynata nini.