Read CHUYA QELLQA La Biblia en Quechua de Ayacucho 2012 Ezequiel 18 Bible Online

Ezequiel 18 - CHUYA QELLQA La Biblia en Quechua de Ayacucho 2012 bible

Ezequiel 18

¹Tayta Diosmi kaynata niwarqa:

²Israel runakuna, qamkunam sapa kutilla kaynata rimankichik: “Tayta-mamanku puchqo uvasta mikuruptinmi wawa-churinkupa kirun utuyarun” nispaykichik. ¿Imanasqataq chaynata rimankichik?

³Chayraykum ñoqa Tayta Dios kaynata nini: Israel nacionpiqa manañam haykapipas chaynataqa rimankichikñachu.

⁴Llapa runakunaqa ñoqallapam: Taytapa vidanpas hinaspa churipa vidanpas ñoqallapam. Pipas huchallikuqqa wañunqapunim.

⁵Allin ruwaq runaqa, allin kaqkunatawan allin arreglotam ruwan.

⁶Chayna runaqa, idolokunata hatunchanankupaq orqokunapi convidokuna ruwasqankumanpas manam rinchu, Israelpa tukuy rikchaq diosninkunapipas manam hapipakunchu, runamasinpa warmintapas manam abusanchu, killanwan onqoq warminmanpas manam yaykunchu.

⁷Pitapas manam ñakarichinchu, debeqninmanta prenda mañasqantapas manam hapikuykunchu, manam pimantapas suwakunchu, yarqasqakunamanmi mikuykachin, mana pachayuqkunatam pachaykachin.

⁸Mana mirayniyuqllapaqmi qollqetapas prestan, qollqepa miraynintapas manam mañanchu, manam payqa pitapas imananchu; runakuna quejanakuptinpas, mana mayqanmanpas sayapakuspam allin arreglota ruwan.

⁹Payqa decretoykunaman hinam ruwan, kamachikuyniykunatam ruwayman churan. Chay runaqa allin ruwaqmi, chayraykum payqa kawsanqa. Ñoqa Tayta Diosmi chaynata nini.

¹⁰Sichum chayna allin ruwaq runa kachkaptinpas, churinñataq kanman suwa, runa wañuchiq, chayman rikchakuqkunata ruwaq,

¹¹taytanpa mana ruwasqankunata ruwaspan idolokunata hatunchanankupaq orqokunapi convidokuna ruwasqankuman riq, runamasinpa warminta abusaq,

¹²wakchakunatawan mana imayuqkunata ñakarichiq, runamasinpa kaqta suwakuq, prenda mañasqantapas hapikuykuq, idolokunapi hapipakuq, millakusqay kaqkunata ruwaq,

¹³qollqetapas mirayniyuqllapaq prestaq, qollqe prestasqanpa mirayninta mañaq, chayna runaqa manam kawsanqachu. Tukuy chay millakusqay kaqkuna ruwasqanmantaqa wañunqapunim, wañusqanmantaqa kikinmi huchayuq kanqa.

¹⁴Sichum chay mana allin runapa churin karunman, ichaqa taytanpa huchakuna ruwasqanta qawachkaspapas mana taytan hinachu ruwanqa,

¹⁵idolokunata yupaychanankupaq orqokunapi convido ruwasqankunamanpas mana rinqachu, nitaq Israelpa idolonkunapipas hapipakunqachu, runamasinpa warmintapas mana abusanqachu,

¹⁶pitapas mana ñakarichinqachu, debeqninmanta prenda mañasqantapas mana hapikuykunqachu, pitapas mana suwakunqachu. Aswanqa yarqaymanta kaqkunaman mikuykachinqa, mana pachayuqkunata pachaykachinqa,

¹⁷mana allin ruwaymanta sapaqchakunqa, qollqetapas mana mirayniyuqllapaq prestanqa, prestaspapas mana mirayninta mañanqachu, kamachikuyniykunaman hina ruwanqa, decretoykunata kasukunqa, chay runaqa manam taytanpa huchanmantaqa wañunqachu, cheqaptapunim kawsakunqa.

¹⁸Taytanmi ichaqa runamasinta ñakarichisqanmanta, wawqenpa kaqta maqaypawan suwakusqanmanta, llaqtanpi tukuy mana allin kaqkuna ruwasqanmanta, wañunqapuni.

¹⁹Sichum qamkuna tapukunkichik: ¿Imanasqataq churinqa mana castigasqachu taytanpa huchanmantaqa? nispaykichik, hinaptinqa chay churinqa allin ruwayman chaynataq allin arregloman hinam imatapas ruwarqa. Kamachikuyniykunatapas kasukuspanmi ruwayman churarqa. Chayraykum payqa kawsakunqa.

²⁰Pipas huchallikuqqa wañunqam, taytanpa huchanmantaqa manam churinqa castigasqachu kanqa, churinpa huchanmantapas manataqmi taytanqa castigasqachu kanqa, allin ruwaq runaqa allin ruwasqanmantam pagasqa kanqa, mana allin ruwaq runapas mana allin ruwasqanmantam pagasqa kanqa.

²¹Sichum mana allin ruwaq runa huchankunamanta wanakuspa decretoykunata kasukuspan allin arregloman hina imatapas ruwanqa, hinaspaqa cheqaptapunim kawsakunqa, manam wañunqachu.

²²Mana kasukuspan mana allin ruwasqantaqa manañam yuyarisaqñachu, payqa allin kaqtaña ruwasqanraykum kawsanqa.

²³Ñoqaqa manapunim munanichu mana allin ruwaq runapa wañunantaqa, aswanqa mana allin ruwasqanmanta wanakuspa kawsakunantam munani.

²⁴Sichum allin ruwaq runa chayna allinkuna ruwasqanmanta karunchakuruspan mana allinkunataña ruwanman otaq chay mana allin ruwaq runapa millakuypaq kaqkuna ruwasqantaña ruwanman hinaspa ¿yaqachu chay runa kawsanqa? Ñoqaqa tukuy ima allinkuna ruwasqantapas manam yuyarisaqchu, qepanchawaspan huchallikusqanraykum wañunqa.

²⁵Ichapas qamkuna niwankichikman: “Señor, qamqa manam allin arregloman hinachu juzgachkanki”, nispaykichik. Chaynaqa, Israelpa mirayninkuna uyariwaychik: Ñoqaqa allin arregloman hinam ruwachkani. Qamkunam mana allintaqa ruwachkankichik.

²⁶Sichum allin ruwaq runa allin ruwasqanmanta karunchakuruspan mana allinkunataña ruwanqa hinaspaqa huchanmantam wañunqa.

²⁷Sichum mana allin ruwaq runa mana allin ruwayninkunata saqespan allin arregloman hina allin kaqkunataña ruwaspanqa vidantam salvanqa.

²⁸Mana kasukusqanta qawaykuspan mana allin ruwasqankunata saqesqanraykum cheqaptapuni kawsanqa, manam wañunqachu.

²⁹Israelpa mirayninkuna, ichapas qamkunaqa niwankichikmanraq: “Señor, qamqa manam allin arregloman hinachu juzgachkanki”, nispaykichik. Ñoqaqa allin arregloman hinam ruwachkani, qamkunam mana allintaqa ruwachkankichik.

³⁰Chaynaqa, Israelpa mirayninkuna, imaynam kawsasqaykichikman hinam juzgasqaykichik. Ñoqa Tayta Diosmi chaynata nini. Chaynaqa, mana kasukuq kasqaykichikmanta wanakuspa kutirikamuwaychik chaynapi huchaykichikkuna mana tuñichisunaykichikpaq.

³¹Ñoqapa contraypi mana allinkuna ruwasqaykichikkunata qamkunamanta wischuychik; hinaspa musoq sonqoyuq, musoq espirituyuqña kaychik. Israel miraykuna, ¿imanasqataq wañuyta munankichik?

³²Ñoqaqa manam pitapas wañunantaqa munanichu. Chaynaqa, ñoqaman kutirikamuspa kawsakuychik. Ñoqa Tayta Diosmi chaynata nini.