Read CHUYA QELLQA La Biblia en Quechua de Ayacucho 2012 Ezequiel 19 Bible Online

Ezequiel 19 - CHUYA QELLQA La Biblia en Quechua de Ayacucho 2012 bible

Ezequiel 19

¹Ezequiel, Israel nacionpi kamachikuqkunamanta kay aya takita takiy:

²Mamaykiqa china leonmi karqa, leonkunapa chawpinpim yacharqa, leonkunapa chawpinpim wasinta ruwakurqa, chaypim wawankunata uywarqa.

³Huknin uñachantam malta león kanankama wiñarachirqa, paymi animalkuna hapisqanta llikipaspan runa mikuyta yacharurqa.

⁴Nacionkunam paymanta uyarirurqaku, hinaspam trampawan hapirurqaku, senqanman ganchota churaruspankum Egiptoman aysarqaku.

⁵Chaymi maman leonñataq unayña suyaruspan imam munasqan mana cumplikuruptin huknin kaq uña leontaña wiñachirqa.

⁶Malta leonña rikuriruspanmi llapa leonkunapa chawpinpi purirqa. Paypas animalkuna hapisqanta llikipaspanmi runa mikuyta yacharurqa.

⁷Runakunapa palacionkunatapas lliwmi tuñirachirqa, llaqtakunatapas lliwmi purmarachirqa; qapariyninwanmi lliwta mancharichirqa.

⁸Hinaptinmi muyuriqninpi nacionkuna paypa contranpi hatarirurqaku, mallata mastaruspankum trampaman wichiykachirqaku.

⁹Hinaspam ganchokunawan jaulapi wichqaruspanku Babilonia nacionpa reyninman aparurqaku; chaypim payta carcelman wichqarurqaku, Israel law orqokunapi qapariyninta manaña uyarinankupaq.

¹⁰Mamaykiqa yakupa patanpi tarpusqa uvas plantamanmi rikchakurqa, allin parqosqa kasqanraykum sumaqta llanllarispa llaqesapallaña karqa.

¹¹Kallmankunapas mana pakiy atinam karqa, kallmankunamantapas reykunam varankutaraq ruwakurqaku, llumpayta wiñarusqanraykum puyukamaraq chayarurqa. Payqa llumpay hatun chaynataq kallmasapallaña kasqanraykum sutilla qawakurqa.

¹²Ichaqa piñakuywan chutaruspankum pampaman wischuykurqaku. Intipa qespimunan lawmanta hamuq wayra chakirachiptinmi rurunkunapas wichirurqa, kallmankunapas chakiruptinmi ninamanña wischuykurqaku.

¹³Kunanqa mana yakupa kanan chunniq chaki allpapim plantasqa kachkan.

¹⁴Kikinpa kallmanmanta nina lloqsispam ikllipankunatawan rurunkunatapas ruparun, kallmankunapas manañam kanñachu reypa varan ruwanankupaqpas. Kayqa aya takim, llakipi kaspa takinankupaqmi kanqa.