Read CHUYA QELLQA La Biblia en Quechua de Ayacucho 2012 Ezequiel 20 Bible Online

Ezequiel 20 - CHUYA QELLQA La Biblia en Quechua de Ayacucho 2012 bible

Ezequiel 20

¹Qanchis kaq watapa pichqa kaq killanpa chunka kaq punchawninpim, Israelpa ancianonkuna Tayta Diosta tapukunankupaq hamuspanku ñawpaqniypi tiyaykurqaku.

²Hinaptinmi Tayta Dios kaynata niwarqa:

³Runapa churin, Israelpa ancianonkunaman ñoqa Tayta Diospa nisqayta kaynata niy: ¿Tapukuwaqniyraqchum hamuchkankichik? Ñoqa Tayta Diosmi kikiyrayku jurani, tapukuynikichiktaqa manam contestasqaykichikchu, nispayki.

⁴Runapa churin, qam juzgay paykunataqa. Juzgaspayki ñawpaq taytankupa millakuypaq kaqkuna ruwasqankuta reqsichiy.

⁵Ñoqa Tayta Diospa nisqayta kaynata niy: Israelta akllakusqay punchawmi mirayninkunaman Egipto nacionpi reqsichikurqani, hinaspaymi jurarqani “ñoqa Tayta Diosmi, Diosnikiqa kani”, nispa.

⁶Chay jurasqay punchawmi prome-tekurqani paykunata Egipto nacionmanta hurqospay tukuy imapa kanan chaynataq tukuy imapa qespinan allpaman pusanaypaq. Chay allpaqa wakin allpakunamantapas aswan allin allpam.

⁷Hinaspam llapallankuta kamachirqani millakuypaq idolonkunata wischu-nankupaq chaynataq Egipto nacionpa cheqnipay idolonkunawanpas ama qachachakunankupaq. Chaynataqa kamachirqani paykunapa Diosninku kasqayraykum.

⁸Paykunam ichaqa mana kasuwaspanku contraypi hatarirurqaku; manam millakuypaq diosninkutapas wischurqakuchu, nitaqmi Egipto nacionpa idolonkunatapas saqerqakuchu. Chaymi piensarqani piñakuyniy tukunankama paykunata Egipto nacionpi castigaruyta.

⁹Ichaqa manam chaynatachu ruwarqani, chaynapi imaynam Egipto nacionmanta hurqomusqayta qawaq nacionkunapa qayllanpi sutiy mana yanqachasqa kananpaq.

¹⁰Paykunataqa Egipto nacionmanta hurqospaymi chunniqman pusarqani.

¹¹Chaypim kamachikuyniykunata qospay decretoykunata yachachirqani, pipas ruwayman churaspa kawsananpaq.

¹²Paykunamanmi samana punchawniykunata qorqani, chaymi huk señal karqa ñoqapaq chaynataq paykunapaqpas, chaynapi paykunata ñoqallapaqña sapaqchasqayta yuyanankupaq.

¹³Ichaqa paykunam chay chunniqpi mana kasuwarqakuchu; kamachikuyniytapas manam kaqpaqpas hapirqakuchu, decretoykuna qosqaytapas wischupakurqakum, chaykunatam qorqani ruwayman churaspa kawsanankupaq. Aswanraqmi samana punchawniykunatapas pasaypaqta sarutyarurqaku. Chayraykum paykunaman piñakuyniyta kachaykuspay chunniqpi chinkarachiyta tantearqani.

¹⁴Ichaqa manam chaynatachu ruwarqani, chaynapi imaynam Egipto nacionmanta hurqomusqayta qawaq nacionkunapa qayllanpi sutiy mana yanqachasqa kananpaq.

¹⁵Chay chunniqpitaqmi paykunata juraspay nirqani qosqay allpaman, tukuy imapa kanan chaynataq tukuy imapa qespinan allpaman, llapallan allpakunamantapas aswan allin allpaman manaña yaykuchinaypaq.

¹⁶Kamachikuykuna qosqaytapas wischupakuspankum mana decretoykunaman hinachu kawsarqaku, samana punchawniykunatapas pasaypaqtam sarutyarurqaku. Paykunaqa idolokunapi sonqoyuqllam kawsarqaku.

¹⁷Chaywanpas llakipayaspaymi paykunataqa mana wañurachirqanichu, nitaqmi chunniqpipas puchukarachirqanichu.

¹⁸Chaymi paykunapa mirayninkunataña chunniqpi kaynata nirqani: Qamkunaqa amayá taytaykichikkunapa kamachikuyninkunaman hinaqa kawsaychikchu, yachachikuyninkunatapas ama kasuychikchu, amataq idolonkunawanpas qachachakuychikchu.

¹⁹Ñoqam kani yupaychasqaykichik Tayta Diosqa, decretoykunata kasukuspa kamachikuyniykunata ruwayman churaychik.

²⁰Samana punchawniy-kunatapas sapaqchapuwaychik, chaynapi qamkunapaqwan ñoqapaq huk señal kananpaq; chaynapim ñoqa Tayta Diosqa Diosnikichik kasqayta yachankichik, nispay.

²¹Ichaqa mirayninkunapas manam kasuwarqakuchu; kawsanankupaq qosqay decretoykunatapas mana kasukuspankum kamachikuyniykunatapas mana ruwayman churarqakuchu; samana punchawniykunatapas sarutyarurqakum. Hinaptinmi piñakuyniyta kachaykuspay chay chunniqpi chinkarachiyta tantearqani.

²²Ichaqa manam chaynatachu ruwarqani, chaynapi imaynam Egipto nacionmanta hurqomusqayta qawaq nacionkunapa qayllanpi sutiy mana yanqachasqa kananpaq.

²³Chay chunniqpim jurarqani paykunata kay pachapi tukuy nacionman cheqerachinaypaq.

²⁴Chaynataqa nirqani, decretoy-kunata mana kasukuspanku kamachikuyniykunatapas mana ruwayman churasqankuraykum chaynataq samana punchawniykunatapas pasaypaqta sarutyaruspanku taytankupa idolonkunapi sonqoyuq kasqankuraykum.

²⁵Chayraykum paykunamanqa mana valeq decretokunatawan mana valeq leykunataña qoykurqani. Chay decretokunaqa manam kawsanankupaqñachu karqa.

²⁶Llapa idolonkuman ofrendakunata apaspa chaynataq piwi churinkuta sacrificaspa qachachakunankutam saqeykurqani. Chaytaqa ruwarqani paykunaman manchakuy huntaykuptin ñoqa Tayta Dios kasqayta yachanankupaqmi.

²⁷Chaynaqa, runapa churin, Israelpa mirayninkunaman ñoqa Tayta Diospa nisqayta kaynata niy: Qamkunapa ñawpaq taytaykichikkunapas qepanchawaspankum piñachiwarqaku.

²⁸Paykunaqa juramentowan prometesqay allpaman yaykuruspankupas, alto moqokunata hinaspa rapisapa sachakunata qawaykuspankum animalkunata kañaspa piñachiwarqaku, chaykunapim inciensota kañaspanku vinotapas tallirqaku.

²⁹Chaymi paykunata tapurqani: ¿Imañataq karqa chay ripayasqaykichik moqopi capillaqa? nispa. Chay lugartam [3]“Bama” nispa suticharqaku. Chaynam kunankamapas sutin.

³⁰Ñoqa Tayta Diospa nisqayta Israelpa mirayninkunaman kaynata niy: ¿Imanasqataq taytaykichikkuna hina qachachakuyta munankichik? ¿Imanasqataq millakuypaq idolokunata yupaychaspa qepanchawankichik?

³¹Qamkunaqa ofrendata qonaykichikpaq piwi churikichikta ofrecespam chay idoloykichikkunawan hinalla qachachakuchkankichik. Israelpa mirayninkuna ¿chaykunata ruwachkaspachum tapuwaytaraq munachkankichik? Ñoqa Tayta Diosqa manam tapuwaptikichikpas contestasqaykichikchu.

³²Qamkunam nichkankichik: “Ñoqan-chikpas kaspimanta rumimanta idolokunata serviq nacionkuna hina kasunchik”, nispaykichik. Ichaqa manam qamkunapa munasqaykichikman hinachu kanqa.

³³Ñoqa Tayta Diosmi kaynata nini: Ñoqaqa piñakuyniywan hinaspa hatun atiyniywanmi qamkunapi munaychakusaq.

³⁴Sinchi piñakuywan castigaspay chaynataq hatun atiyniywanmi maypim cheqesqa kasqaykichik llaqtakunamanta hinaspa nacionkunamanta huñumusqaykichik.

³⁵Nacionkunapa chawpinpi chunniqman pusamuspaymi qamkunata juzgasqaykichik.

³⁶Imaynam Egipto nacionpa chunniqninpi ñawpaq taytaykichikkunata juzgarqani, chaynam qamkunatapas juzgasqaykichik. Ñoqa Tayta Diosmi chaynata nini.

³⁷Imaynam oveja michiq, ovejankunata sapaq ovejakunamanta rakin, chaynam ñoqapas qamkunata akllasqaykichik, chaynapim qamkunawan pactota ruwasqayta kasukunaykichikpaq churasqaykichik.

³⁸Qamkunamantam mana kasuwaqniykunatawan contraypi hoqarikuqkunata rakisaq. Paykunataqa runapa llaqtanpi yachasqankumantapas hurqorusaqmi, Israel allpamanmi ichaqa mana yaykunqakuchu, chaynapim Tayta Dios kasqayta yachankichik.

³⁹Chaynaqa, Israelpa mirayninkuna, ñoqa Tayta Diosmi kaynata nikichik: Mana kasuwayta munaspaykichikqa idoloykichikkunata sapakama yupaychamuychik. Amaña chuya sutiyta sarutyaychikchu ofrendaykichikkunawan hinaspa millakuypaq idoloykichikkunawan.

⁴⁰Israelpa llapallan mirayninkunam sapaqchakusqay hatun orqopi, Israelpa kaq hatun orqonpi yupaychawankichik. Chaypim ofrendaykichikkunatawan primiciaykichikkunata chaynataq tukuy ima sapaqchapuwasqaykichiktapas chaskisqaykichik. Ñoqa Tayta Diosmi chaynata nini.

⁴¹Qamkunatam nacionkunapi llaqtakunapi cheqesqa kasqaykichikmanta hurqomusqaykichik, hinaspam llapa nacionkunapa qayllanpi miski asnaq ofrendata hina chaskispay chuya kasqayta reqsichisqaykichik.

⁴²Israel allpaman otaq ñawpaq taytay-kichikkunaman qonaypaq jurasqay allpaman yaykuchiptiymi Tayta Dios kasqayta yachankichik.

⁴³Chaypim tukuy mana allinkuna ruwasqaykichikta yuyarispa ñakakunkichik, tukuy mana allin ruwasqaykichikraykum kikikichikmantapunipas millakunkichik.

⁴⁴Israelpa mirayninkuna, qamkunawan imam ruwanayta ruwaspayqa, manam qamkunapa mana allin kawsasqaykichikman hinachu nitaq chay millakuypaq kaqkuna ruwasqaykichikman hinachu ruwasaq, aswanqa sutiyraykum. Chaynapim Tayta Dios kasqayta yachankichik. Ñoqa Tayta Diosmi chaynata nini.

⁴⁵Tayta Diosmi rimapayawaspan kaynata niwarqa:

⁴⁶Runapa churin, sur lawman qawarispa Neguev lawpi montekunapa contranpi profetizay.

⁴⁷Chay montekuna lawmanyá ñoqa Tayta Diospa nisqayta kaynata niy: Chaypi kaq sachakunata kañaykuptiymi verde sachakunatawan chaki sachakunatapas ruparunqa, chay ninaqa manaña amachay atina kaspanmi chaypi yachaq runakunapa uyantapas lliw rupanqa, sur lawmanta qallaykuspa norte lawkama.

⁴⁸Chaynapim llapa runakuna rikunqa ñoqa Tayta Diospa kañaykusqayta, chay ninaqa mana amachay atinam kanqa, nispa.

⁴⁹Hinaptinmi ñoqa nirqani: Dios Taytalláy, runakunaqa rikchanachiykunallata rimaqpaqmi hapiwanku, nispay.