Read CHUYA QELLQA La Biblia en Quechua de Ayacucho 2012 Ezequiel 25 Bible Online

Ezequiel 25 - CHUYA QELLQA La Biblia en Quechua de Ayacucho 2012 bible

Ezequiel 25

¹Tayta Diosmi rimapayawaspan kaynata niwarqa:

²Runapa churin, Amonpa mirayninkunata qawarispayki paykunapa contranpi profetizay.

³Ñoqa Tayta Diospa nisqayta kaynata niy: Qamkunam temployta millakuypaqta ruwaptinku, Israel nacionta tuñichiptinku, Judá nacionpi kaqkuna preso apasqa kaptinku, kusikuymanta qaparispa: “Allinta ruwachun” nirqankichik.

⁴Chayraykum qamkunata intipa qespimunan lawpi llaqtakunaman qoykusqaykichik, chaynapi allpaykitapas hapikuykuspanku campamentonkuta sayachispa yachakunankupaq. Chakraykichikpa ruruntapas paykunañam mikukunqaku hinaspam tomanaykichik lechetapas paykunaña tomakunqaku.

⁵Rabá llaqtatapas camellokunapa mikunan chakrakunamanñam tikrarusaq, Amón naciontañataqmi ovejakunata michina pampamanña tikrarusaq. Chaynapim Tayta Dios kasqayta yachankichik.

⁶Ñoqa Tayta Diosmi nikichik: Amonpa mirayninkuna, qamkunam taqllakusparaq kusikuymanta pawaykacharqankichik, Israel nacionmantam burlakuspa asikurqankichik.

⁷Chayraykum atiyniywan castigaspa huklaw nacionkunaman qoykusqaykichik, paykunam tukuy imaykichikta qechusunkichik. Qamkunataqa sachata kuchuchkaq hinam nacionkunapa chawpinmanta chinkarachisqaykichik. Pasaypaqta purmarachiptiymi Tayta Dios kasqayta yachankichik.

⁸Tayta Diosmi kaynata nin: Moab nacionwan Seir nacionmi kaynata ninku: “Judá nacionpas wakin nacionkuna hinallam”, nispanku.

⁹Chayraykum Moab nacionpa waqtanta kicharusaq, hinaspam huknin waqtanmanta qallaykuspa huknin waqtankama llapa llaqtankunata purmarachisaq. Paykunapa anchallaña kuyasqanku llaqtakunam kaykuna: Bet-jesimot, Baal-meón hinaspa Quiriataim.

¹⁰Moab nacionpa allpantawan Amón nacionpa allpantam intipa qespimunan lawpi llaqtakunaman qoykusaq. Chaynapim Amón nacionmantaqa manaña mayqan nacionpas yuyarinqañachu.

¹¹Moab nacionta castigaptiymi Tayta Dios kasqayta yachanqaku.

¹²Ñoqa Tayta Diosmi kaynata nini: Edom nacionmi Judá nacionmanta vengakurun, chaynapim llumpay huchayuq rikurirun.

¹³Chayraykum ñoqa Tayta Dios kaynata nini: Edom naciontam atiyniywan castigasaq, runakunatapas animalkunatawan kuskatam wañuchisaq, chay naciontam pasaypaqta purmachisaq. Temán llaqtamanta qallaykuspam Dedán llaqtakama guerrawan wañunqaku.

¹⁴Edom nacionpi yachaqkunatam Israel runaykunawan vengakusaq, runaykunam paykunata piñakuyniywan allinniqta castiganqaku, chaynapim paykunaqa vengakusqayta yachanqaku. Ñoqa Tayta Diosmi chaynata nini.

¹⁵Tayta Diosmi kaynata nin: Filisteokunam Israelpa mirayninkunata vengakurun, ñawpaqmantaraq enemigo kasqankuraykum cheqnikuyllawanña chinkarachiypi rirqaku.

¹⁶Chayraykum ñoqa Tayta Dios kaynata nini: Atiy-niywanmi filisteokunata castigasaq, Ceret runakunatapas tukuruspaymi lamar qochapa patanpi puchuq runakunatapas llapallanta chinkarachisaq.

¹⁷Paykunatam llumpayta vengakusaq, piñakuywanmi paykunata castigasaq, chaynata vengakuptiymi Tayta Dios kasqayta yachanqaku. Ñoqa Tayta Diosmi chaynata nini.