Read CHUYA QELLQA La Biblia en Quechua de Ayacucho 2012 Ezequiel 26 Bible Online

Ezequiel 26 - CHUYA QELLQA La Biblia en Quechua de Ayacucho 2012 bible

Ezequiel 26

¹Chunka hukniyuq watapim, Adar killapa punta kaq punchawninpi, Tayta Dios rimapayawaspan kaynata niwarqa:

²Runapa churin, Tiro llaqtapi yachaq-kunam Jerusalén llaqtapa contranpi kaynata nirqaku: “Allinta ruwachun, nacionkunapa negocio ruwananku punkum ñutupasqaña kachkan, kunanqa ñoqanchikmanñam tuparuwanchik, pay tuñichisqa kanankamam ñoqanchikñataq qori-qollqeta huñukuspa kapuqniyuq kasunchik”, nispanku.

³Chayraykum ñoqa Tayta Dios kaynata nini: Tiro llaqta, qampa contraykipim kachkani, imaynam lamar qochapa olankuna hoqarikun, chaynatam achka nacionkunata contraykipi hatarirachisaq.

⁴Paykunam murallaykikunatapas taqmanqaku, torrekikunatapas pampamanmi wikapanqaku, allpaykitapas maymi kasqanmantam picharusaq, chuya taqra pampatam saqerusaq.

⁵Lamar qochapa chawpinpim qeparunqa, mallakuna chakichina sitioñam kanqa. Tiro llaqtaqa nacionkunapa saqueasqanmi kanqa, nispa. Ñoqa Señorniki Tayta Diosmi chaynata nini.

⁶Lamar qocha patanpi llaqtakunapa runankunapas espadawan wañuchisqam kanqaku, chaynapim Tayta Dios kasqayta yachanqaku, nispa.

⁷Ñoqa Tayta Diosmi kaynata nini: Tiro llaqtapa contranpim norte lawmanta Babilonia nacionpa reynin Nabucodonosorta pusamuchkani, payqa llumpay atiyniyuq reymi, paymi carretakunawan, silladakunawan hinaspa nana-nanaq tropakunawan, Tiro llaqtata atacananpaq hamuchkan.

⁸Lamar qocha patanpi yachaq runaykikunatapas espadawanmi wañuchinqa, muyuriqnikipim murallata hatarichinqa, atacasunaykipaqmi rampakunata ruwanqa, escudowan armasqa soldadokunatam contraykipi kacharimunqa.

⁹[4]Arietekunawanmi murallaykikunatapas taqmanqaku, torrekikunatapas takachkaspallam tuñirachinqaku.

¹⁰Llaqtaykichikpa punkunta Babilonia nacionpa reynin yaykuptinmi llapa caballokunapa polvo hatarichisqanpas tapaypaq tapaykusunki, llapa caballokunapa hinaspa carretakunapa kallpayninwanmi murallaykikunapas katkatatanqa. Tuñichisqa llaqtapa raqrankunata hina yaykuptinmi chaynaqa kanqa.

¹¹Caballonkunam callekikunatapas sarupanqa, runaykikunatapas espadawanmi wañuchinqa, raku-raku pilarnikikunatapas pampamanmi wikapanqa.

¹²Tukuy imaykikunatam apakunqa, negocio ruwasqaykikunatam suwasunki, qaqay-qaqay perqaykikunatam tuñichinqa, suma-sumaq palacioykikunatam taqmanqa, rumikikunatawan pilarnikikunatapas lamar qochamanmi wischuykunqa.

¹³Suma-sumaq takikikunatapas qollurachisaqmi, arpaykikunapa waqayninpas manam uyarikunqañachu.

¹⁴Mana imayuq taqratañam saqerusqayki, mallakunata chakichinanku pampatañam ruwarusqayki, manaña haykapipas hatarichisqam kanki, nispa. Ñoqa Tayta Diosmi chaynata nini. Ñoqa Tayta Diospa nisqayqa chaynam kanqa.

¹⁵Ñoqa Tayta Diosmi kaynata nini: Tiro llaqta, tuñichisqa kaptiki, heridasqa runaykikuna qapariptinmi, runaykikuna wañuchisqa kaptinmi lamar qochapa patanpi llaqtakuna katkatatanqaku.

¹⁶Hinaptinmi lamar qocha patanpi reykunapas trononkumanta uraykuspanku capankutawan bordasqa pachankuta hurqokunqaku; manchakuypa huntasqanmi pampapi tiyanqaku, tuñichisqa kasqaykita qawaykuspankum sapa kutilla manchakuymanta katkatatanqaku.

¹⁷Chayraykum kay aya takita qampaq takinqaku: “Ancha reqsisqa Tiro llaqta, lamar qocha patanpi runakunapa yachanan llaqta, tuñichisqam rikurirunki, lamar qochapa patanmantam chinkarunki, qamqa runaykikunawanmi lamar qochapa patanpi atiyniyuq karqanki, muyuriqnikipi nacionkunapa manchakunanmi karqanki.

¹⁸Kay wichiykusqaykiwanqa lamar qochapa hichpanpi nacionkunapas manchakuymantam katkatatanqaku, chinkarusqaykiwanqa lamar qochapa hichpanpi kaqkunam mancharisqallaña kanqaku”, nispanku.

¹⁹Ñoqa Tayta Diosmi kaynata nini: Purmarachispaymi manaña pipapas yachanan llaqtataña ruwarusqayki, lamar qochapa yakunwanmi pampachisqayki.

²⁰Chaynapim wañusqakunapa kananman wischuykusqayki, ñawpaq tiempopi runakunapa yachananmanmi wischuykusqayki. Allpapa sonqonmanraqmi qamtaqa wischuykusqayki, mana imapa kananman wischuykuptiymi wañusqakunawan kuska yachanki. Runaykikunapas manañam kanqachu, kay pachapiqa manañam pipas musoqmantaqa hatarichisunkiñachu.

²¹Manchakuypaqtaña ruwaruptiymi mana kaqña rikurirunki. Maskasuspaykipas manañam pipas tarisunkiñachu. Ñoqa Tayta Diosmi chaynata nini.