Read CHUYA QELLQA La Biblia en Quechua de Ayacucho 2012 Ezequiel 27 Bible Online

Ezequiel 27 - CHUYA QELLQA La Biblia en Quechua de Ayacucho 2012 bible

Ezequiel 27

¹Tayta Diosmi rimapayawaspan kaynata niwarqa:

²Runapa churin, qamyá Tiro llaqtapaq aya takita takiy.

³Lamar qochapa patanpi Tiro llaqta, nacionkunawan chaynataq lamar qochapa patanpi llaqtakunawan negocio ruwaq llaqta, Tayta Diosmi kaynata nin: Tiro llaqta, qanmi nirqanki: “Ñoqaqa ancha kuyayllapaq barco hinam kani”, nispayki.

⁴Munaychakuynikipas lamar qochapa chawpinkamaraqmi chayan, hatarichisuqnikikunam kuyayllapaqta ruwasurqanki.

⁵Tablaykikunatapas Senir orqopi cipresmantam ruwarqaku, mástil qeruykitapas Líbano montepi cedromantam ruwarqaku.

⁶Basán lawpi encina sachakunamantam yaku qachina kaspikikunatapas ruwarqaku, Chipre law lamar qochapa patanpi ciprés sachakunamantam tapaqniki tablakunatapas ruwarqaku, marfilwan adornasqatam ruwasurqanki.

⁷Telaykikunapas Egiptomanta apamusqa bordasqa fino linomantam karqa, chaykunam banderaykimanta servikurqa; toldoykikunapas puka morado telamantam karqa, chayqa Elisa lawpi lamar qochapa patanmanta apamusqam karqa.

⁸Sidón llaqtayuqkunawan Arvad llaqtayuqkunam yaku qachipusuqnikikuna karqaku; barco manejaqkunapas allin yachayniyuq runaykikunam karqaku.

⁹Gebal llaqtayuq allin yachaq hichu runakunam tablaykikuna uchkukuruptinpas sumaqllataña allicharuqku. Lamar qochapi llapallan barcokunapi llamkaqkunam imaykikunatapas negociaqku.

¹⁰Persia, Lidia hinaspa Libia nacionniyuq runakunam guerrapaq tropaykikunapas karqaku; paykunam qasqota wasata harkachikunankutawan casconkuta qampa waqtaykipi warkuqku, sumaq qawapasllaña kanaykipaqmi chaynataqa warkuqku.

¹¹Tropaykikunawan Arvad llaqtayuqkunam murallaykipi hinaspa muyuriqnikipi karqaku; torrekikunapim Gamad llaqtayuq runakuna sayarqaku, paykunam wasata qasqota harkachikunankuta murallaykikunapa muyuriqninpi warkuqku, sumaq qawapasllaña kanaykipaq.

¹²Llumpay qori-qollqeyuq kasqaykiraykum Tarsispi runakunapas qanwan negociota ruwarqaku, qampa kaqkunata rantisuspaykim qollqewan, hierrowan, estañowan hinaspa titiwan pagasuq kanki.

¹³Grecia, Tubal hinaspa Mesec nacion-niyuq runakunapas rantisunaykipaqmi hamuqku, hinaspam esclavokunawan chaynataq broncemanta imapas ruwasqa kaqkunawan pagasuq kanki.

¹⁴Togarma runakunam pagasurqanki llamkaq caballokunawan, silla caballokunawan hinaspa mulakunawan.

¹⁵Rodas lawpi runakunapas qanwanmi negociota ruwaqku; lamar qocha patanpi nacionkunam rantisuspayki, marfilwan ébano qerukunawan pagasuq kanki.

¹⁶Qampaqa tukuy imaykikunapas nana-nanaq kaptinmi Edom runakunapas rantisuspayki esmeralda alhaja rumikunawan, grosella telakunawan, sumaq bordasqa telakunawan, lino telakunawan, coral alhaja rumikunawan hinaspa rubí alhaja rumikunawan pagasuq kanki.

¹⁷Judá nacionpi hinaspa Israel nacionpi runakunapas rantisuspaykim, Minit lawpi chaynataq Panag lawpi trigokunawan, mielwan, aceitewan hinaspa balsamowan pagasuq kanki.

¹⁸Damasco runakunapas tukuy ima kapusuqnikikunatam achkanpi rantisuspayki, Helbón lawmanta kaq vinowan chaynataq Sahar lawmanta kaq millwawan pagasuq kanki.

¹⁹Dan llaqtayuq hinaspa Grecia llaqtayuq negociantekunapas, kapusuqnikikunawan truecanankupaqmi Uzal lawmanta vinota, martillasqa fierrota, canelata hinaspa mirrata apamuqku.

²⁰Dedán lawpi runakunam monturapaq sumaq pellonkunata rantikusuq kanki.

²¹Arabia lawpi yachaqkunawan Cedar lawpi kamachikuqkunapas rantisuspaykim, malta carnerokunawan, hatun carnerokunawan hinaspa chivatokunawan pagasuq kanki.

²²Sabá lawmanta chaynataq Raama lawmanta negociantekunapas rantisuspaykim, miski asnaq perfumekunawan, qoriwan, kuyayllapaq alhaja rumikunawan pagasuq kanki.

²³Harán, Cane, Edén, Sabá, Asiria hinaspa Quilmad nacionniyuq runakunapas qanwanmi negociota ruwaqku.

²⁴Paykunam fino telakunata, morado telamanta capakunata, sumaq bordasqa telakunata, sumaqllaña colorniyuq alfombrakunata hinaspa sumaq simpasqa cordonkunata rantikusuq kanki.

²⁵Tarsis law barcokunam llapa imata apamususpayki qatinakamuqku. Qamqa lamar qocha chawpipi tukuy imawan huntasqa barco hinam karqanki.

²⁶Qamtaqa yaku qachipusuqnikikunam ukullay-uku lamar qochanta apasurqanki, ichaqa intipa qespimunan lawmanta pukumuq wayram lamar qochapa chawpinpi pakiparusurqanki.

²⁷Wichiykusqayki punchawmi qori-qollqekikunawan tukuy rikchaq negocioykikuna, yaku qachipusuqnikikuna, manejasuqnikikuna, tablayki allichaqkuna, negociantekuna, guerrapaq tropaykikuna hinaspa apasqayki runakunapas, lamar qochapa chawpinman chinkaykunqaku.

²⁸Marineroykikuna qapariptinkum lamar qochapa patanpi kaqkuna katkatatanqaku.

²⁹Yaku qachipusuqnikikunapas lluptikunqakum, qampi llamkaqkunawan manejaqnikikunapas allpamanmi uraykunqaku.

³⁰Qanmantam llakikuyllawanña hinaspa qaparillawanña waqanqaku. Umankumanpas allpata machqekuspam uchpapi qochpanqaku.

³¹Umankutapas kachiy-kachiytam rutukunqaku, qachqa pachawan churakuspam qaparkachanqaku, qamraykum sonqonkupas nanasqa waqanqaku.

³²Qamraykum aya takita takispanku llakillawanña kaynata ninqaku: ¿Pitaq lamar qochapa chawpinpi Tiro llaqtaman rikchakunman?

³³Mercaderiaykikunata barcokunamanta uraykachiptinkum achka nacionkunata saksachirqanki. Tukuy ima kapusuqnikikunawan chaynataq qori-qollqekiwanmi kay pachapi reykunata apuyachirqanki.

³⁴Kunanmi ichaqa lamar qochapa ñutusqan kachkanki, lamar qochapa chawpinmanmi wichiykunki. Tukuy imaykikunawan apasqayki runakunapas qanwan kuskam chinkaykunku.

³⁵Lamar qochapa patanpi llapallan yachaqkunam mancharisqallaña kachkanku; reyninkunapas llumpay mancharisqam kachkanku, manchakuymi uyankupi sutilla qawakuchkan.

³⁶Huklaw nacionniyuq negociantekunapas qamta qawaykuspankum mancharikunku. Qamqa manchakuypaqñam rikurirunki, wiña-wiñaypaqñam puchukarunki, nispanku.