Read CHUYA QELLQA La Biblia en Quechua de Ayacucho 2012 Ezequiel 29 Bible Online

Ezequiel 29 - CHUYA QELLQA La Biblia en Quechua de Ayacucho 2012 bible

Ezequiel 29

¹Chunka kaq watapa chunka kaq killanpa chunka iskayniyuq punchawninpim Tayta Dios rimapayawaspan kaynata niwarqa:

²Runapa churin, Egipto nacionpa reynin Faraonta qawarispayki paypa contranpi chaynataq Egipto nacionpa contranpi profetizay.

³Ñoqa Tayta Diospa nisqayta kaynata niy: Egipto nacionpa reynin Faraón, ñoqam contraykipi kachkani, mayupa chawpinpi wischurayaq manchapa hatun animal hinam kanki. Qanmi kaynata nirqanki: “Nilo mayuqa ñoqapam, ñoqam unancharqani”, nispayki.

⁴Ganchokunatam hocicoykiman churasaq, mayuykipi challwakunatapas escamaykimanmi laqarusaq, escamaykiman laqasqa challwakunatawan kuskatam mayuykimanta aysarusqayki.

⁵Mayuykipi challwakunatawan kuskatam chunniqman wischurusqayki, pampaman wichiykuptikim mana pipas hoqarisunkichu, nitaqmi pipas pampasunkichu, aswanqa purun animalkunañam mikusunki, alton pawaq animalkunam mikusunki.

⁶Chaynapim Egipto nacionpi llapallan runakunaqa, Tayta Dios kasqayta yachankichik. Israelpa mirayninkunam yanapanaykipaq maskasurqanki, ichaqa soqos hinallam karqanki.

⁷Qanman hapipakuykuptinkum pakikururqanki, pakikuruspaykim waqtankuta kuchururqanki; qanman tawnapakuykuptinkum pakipakuruspayki wichiykachirqanki.

⁸Chayraykum ñoqa Tayta Dios kaynata nini: Egipto nación, qampa contraykipim guerrata hatarichimuchkani, runaykikunatapas animalkunatawan kuskatam wañuchisaq.

⁹Purmachisqa kaspam chunninki, chaynapim runaykikunapas Tayta Dios kasqayta yachanqaku. Qanmi nirqanki: “Nilo mayuqa ñoqapam, ñoqam unancharqani”, nispayki.

¹⁰Chayraykum qampa contraykipi hinaspa Nilo mayuykipa contranpi kachkani. Egipto naciontam manchakuypaq chunniqman tikrarusaq, Migdol llaqtamanta qallaykuspa Sevene llaqtakama hinaspa Etiopía nacionwan tupanakuqkama.

¹¹Runapas, animalpas manañam chaynintaqa purinqañachu, tawa chunka watapunim chaypiqa manaña pipas yachanqañachu.

¹²Egipto naciontam chunniq allpakunamantapas aswan chunniqtaraq ruwasaq, llaqtankunatapas purmasqa llaqtakunamantapas aswan purmasqataraqmi ruwasaq, tawa chunka watapunim purmanqa. Egipto naciontam tukuy hinastin llaqtakunaman hinaspa nacionkunaman cheqechisaq.

¹³Chaynaqa, ñoqa Tayta Diosmi kaynata nini: Tawa chunka wata pasaruptinmi cheqechisqay nacionkunamanta Egipto nacionniyuqkunata huñumusaq.

¹⁴Egipto runakunatam preso apasqa kasqankumanta kutichimuspay nacesqanku Patros allpaman pusasaq, chaypim manayniraq nacionllaña kanqaku.

¹⁵Wakin nacionkunamantapas mana atiyniyuqña kaspankum, wakin nacionkunapa contranpiqa manaña haykapipas hoqarikunqakuñachu. Taksallataña ruwarusqayraykum wakin nacionkunapiqa manaña munaychakunqakuñachu.

¹⁶Chaynapim Israelpa mirayninkunapas Egiptomanqa manaña hapipakunqakuchu, chayraqmi musyakurunqaku Egipto nacionpa yanapakuynin maskayqa pantay kasqanta. Chaynapim Tayta Dios kasqayta yachanqaku.

¹⁷Iskay chunka qanchisniyuq watapa punta kaq killanpa punta kaq punchawninpim Tayta Dios rimapayawaspan kaynata niwarqa:

¹⁸Runapa churin, Babilonia nacionpa reynin Nabucodonosormi tropankunata Tiro llaqtapa contranpi kachaykun, chayraykum tropankunaqa paqla umaña kachkanku, hombronkupas mata-matañam kachkan, ichaqa manam kikin reypas nitaq tropankunapas chay sasallaña llamkasqankumantaqa imallatapas allintaqa hurqonkuchu.

¹⁹Chayraykum ñoqa Tayta Dios kaynata nini: Babilonia nacionpa reynin Nabucodonosormanmi Egipto nacionta qoykuni, qori-qollqentapas hinaspa tukuy imantapas qechuspa chaykunawanña tropankunaman pagananpaq.

²⁰Chaynaqa, Tiro llaqtapa contranpi rey Nabucodonosor ñoqapaq llamkasqanmantam Egipto nacionta payman pagaykuni. Ñoqa Tayta Diosmi chaynata nini.

²¹Chay tiempopim Israelpa mirayninkunata kallpasapallataña ruwarusaq, hinaptinmi qamñataq Ezequiel mana upallakuykuspa paykunapa chawpinpi rimanki, chaynapim Tayta Dios kasqayta yachanqaku.