Read CHUYA QELLQA La Biblia en Quechua de Ayacucho 2012 Ezequiel 3 Bible Online

Ezequiel 3 - CHUYA QELLQA La Biblia en Quechua de Ayacucho 2012 bible

Ezequiel 3

¹Chaymantam niwarqa: Runapa churin, ñawpaqnikipi kaq qellqata mikuy hinaspa Israelpa mirayninkunaman nimuy, nispa.

²Chaymi simiyta kichaykuptiy chay qellqasqa rollota mikurachiwarqa,

³hinaspam kaynata niwarqa: Runapa churin, saksanaykikama kay qosqay rollota mikuy, nispa. Mikuruptiymi abejapa miskin hinaraq simiypi karqa.

⁴Niwarqataqmi kaytapas: Runapa churin, chaynaqa Israelpa mirayninkunaman kay imam nisqaykunata willamuy.

⁵Manam kachachkaykiqa mana reqsisqayki rimayniyuq runakunamanchu, nitaqmi rimasqankupas mana entiendesqayki runakunamanchu, aswanqa Israelpa mirayninkunamanmi.

⁶Manam kamachichkaykiqa rimasqankupas mana entiendesqayki nacionkunamanchu rimasqankuta mana entiendenaykipaqqa. Sichum paykunaman kachaptiyqa kasusunkimanmi karqa.

⁷Israelpa mirayninkunam ichaqa mana uyarisunkichu, chaynaqa kanqaku ñoqatapas mana kasuwasqankuraykum. Israelpa mirayninkunaqa mana kasukuq rumi sonqo runakunam.

⁸Ichaqa ñoqam qamtapas paykuna hina mana kasukuq rumi sonqoman tikrasqayki.

⁹Diamanteta otaq mana chaylla pakiruq rumita hinam ruwasqayki. Amam paykunataqa manchakunkichu, nitaqmi qayllankupipas hukmanyankichu. Paykunaqa mana kasukuq miraykunam, nispa.

¹⁰Chaymantam niwarqa: Runapa churin, kay rimapayasqaykunata sumaqta uyariwaspayki sonqoykipi waqaychay.

¹¹Preso apasqa llaqtamasikikunata watukamuspa kaynata nimuy: “Tayta Diosmi kaynata nin”, nispayki. Uyarisunaykipaq otaq mana uyarisunaykipaqpas willamuy, nispa.

¹²Chaymantam Diospa Espiritun hoqariruwaptin hatun qapariytauyarirqani kayna niqta: ¡Maymi yachasqanpiyá Tayta Dios hatunchasqa kachun! niqta.

¹³Uyarirqanitaqmi runaman rikchakuq kawsaqkunapa raprankuna qaqonakuspan bullallataña ruwasqantapas chaynataq waqtankupi ruedakunapa qapariynintapas.

¹⁴Ñoqatañataqmi Diospa Espiritun hoqariruwaspan huklawman aparuwarqa. Chaymi ñoqaqa llakisqallaña hinaspa piñasqallaña rirqani, Tayta Diospa makinñataqmi allinniqta hapiwarqa.

¹⁵Chaynapim Quebar mayupa patanpi Tel-abib llaqtaman chayarurqani. Chaypim Israelmanta preso apasqakuna yacharqaku, hinaspaymi paykunawan qanchis punchaw karqani, ichaqa manam ima ruwaytapas nitaq ima niytapas atirqanichu.

¹⁶Chay qanchis punchaw pasaruptinmi Tayta Dios kaynata niwarqa:

¹⁷Runapa churin, qamtam llaqta waqaychaqta hina Israelpa mirayninkunapaq churayki. Imapas qanman nisqaytam ñoqapa rantiypi paykunaman willanki.

¹⁸Sichum mana allin ruwaq runata nisaq: “Wañunkipunim” nispa, hinaptin qamñataq mana qaqchawaqchu nitaq rimapayawaqchu mana allin kawsasqanmanta wanakuspa kawsananpaq, hinaptinqa chay runam huchanpi wañurunqa; ichaqa huchanpi wañusqanmantam qanmanta cuentata mañasqayki.

¹⁹Sichum chay mana allin ruwaq runata qaqchachkaptiki mana wanakunqachu huchanmantawan mana allin ruwayninmanta, hinaspaqa hucha ruwasqanraykum wañurunqa, qanmi ichaqa paymanta manaña huchayuq kanki.

²⁰Sichum pipas allinkunata ruwachkaspan qepancharuwanqa hinaspam mana allintaña ruwaptinqa, ñoqam mitkananpaq trampata churarusaq, hinaptinmi wañurunqa. Ichaqa mana rimapayasqaykiraykum huchanpi wañurunqa. Hinaptinqa tukuy allinkuna ruwasqankunatapas manam qawarisaqchu, ichaqa paypa wañusqanmantam qanmanta cuentata mañasqayki.

²¹Sichum allin ruwaq runata mana huchallikunanpaq qaqchaptiki manaña huchallikunqachu hinaspaqa qaqchasqaykiraykum kawsanqa, hinaptinqa qampas mana huchayuqmi kanki, nispa.

²²Tayta Diosmi makinwan hapiykuwaspan niwarqa: Hatarispayki pampaman lloqsiy, hinaptinmi chaypi rimapayasqayki, nispa.

²³Chaynapim hatarispay pampaman rirqani. Chaypim Tayta Diospa kanchariynin kachkasqa, chay kanchariyqa kasqa Quebar mayupa patanpi rikusqay hinam. Chaymi qonqoranpa pampaman kumuykurqani

²⁴Hinaptinmi Tayta Diospa Espiritun huntaykuwaspan sayarirachiwarqa, hinaspam kaynata rimapayawarqa: Rispayki wasikipi wichqakaramuy.

²⁵Runapa churin, qamtam waskawan chaqnasunkichik, chaynapim runakunapa chawpinmanqa manaña lloqsinkiñachu.

²⁶Qalluykitapas paladarnikiman laqanarachiptiymi mana rimaqña rikurirunki. Paykunataqa mana kasukuq kaptinpas manañam qaqchayta atinkiñachu.

²⁷Ichaqa rimapayaspaymi huktawan rimachisqayki, hinaptinmi kaynata ninki: “Tayta Diosmi kaynata nin”, nispayki. Uyariy munaqqa uyarinqam, mana uyariy munaqqa manam uyarinqachu. Paykunaqa mana kasukuq miraykunam, nispa.