Read CHUYA QELLQA La Biblia en Quechua de Ayacucho 2012 Ezequiel 30 Bible Online

Ezequiel 30 - CHUYA QELLQA La Biblia en Quechua de Ayacucho 2012 bible

Ezequiel 30

¹Tayta Diosmi rimapayawaspan kaynata niwarqa:

²Runapa churin, ñoqa Tayta Diospa nisqayta kaynata niy: Kaynata waqaychik: ¡Ay, imaynaraq kanqa chay punchawkuna! nispaykichik.

³Chay punchawmi chayamuchkanña, Tayta Diospa punchawninmi chayamuchkanña. Chay punchawqa puyupa pampaykusqanmi kanqa, nacionkuna castigasqa kanan punchawmi kanqa.

⁴Egipto nacionmanmi guerra chayanqa, Egipto runakuna achkallaña wañuptinmi Etiopía nacionpas manchakuymanta katkatatanqa. Tukuy kapuqninkunatam apakunqaku, cimientonkamam tuñichisqa kanqa

⁵Etiopía, Fut, Lud, Arabia hinaspa Libia nacionniyuqkunam espadawan wañuchisqa kanqaku, paykunaman hukllawakuq nacionkunapas wañunqakum, nispayki.

⁶Ñoqa Tayta Diosmi kaynata nini: Egipto nacionta yanapaqkunapas Migdol llaqtamanta qallaykuspam Sevene llaqtakama espadapi wañunqaku. Ñoqa Tayta Diosmi chaynata nini.

⁷Egiptoqa wakin nacionkunamantapas aswan purmasqam kanqa, llaqtankunapas wakin llaqtakunamantapas aswan purmachisqam kanqa.

⁸Egipto nacionta kañaykuptiymi, yanapaqnin nacionkunata chinkarachiptiymi, chayraq Tayta Dios kasqayta yachanqaku.

⁹Egipto nacionta castiganay punchaw chayaramuptinmi willakuqkunata barcokunapi kachamusaq, chaynapi Etiopía nacionpi hawka yachakuqkunata mancharichinankupaq, hinaptinmi manchakuymanta katkatatanqaku. Chay punchawmi hichpamuchkanña.

¹⁰Ñoqa Tayta Diosmi kaynata nini: Babilonia nacionpa reynin Nabucodonosorwanmi, Egipto nacionpa tukuy imankunata chinkarachisaq.

¹¹Paymi llapallan tropankunawan rinqa, paykunaqa pasaypaq mana llakipayakuq runakunam, chay nacionta purmachinankupaqmi hamunqaku, Egipto runakunatam espadankuwan wañuchinqaku, wañusqakunawanmi chay nacionta huntarachinqaku.

¹²Nilo mayutapas chakirachisaqmi mana llakipayakuq runakunamanmi llaqtatapas qoykusaq. Chay naciontapas chaynataq tukuy ima kapuqninkunatapas huklaw nacionniyuq runakunawanmi purmarachisaq, nispa. Ñoqa Tayta Diosmi chaynata nini.

¹³Ñoqa Tayta Diosmi kaynata nini: Idolokunatapas chinkarachisaqmi, Menfis llaqtapi idolokunatapas tukusaqmi. Egiptopiqa kamachikuqpas manam kanqañachu Egipto naciontam manchakuywan huntaykusaq.

¹⁴Patros llaqtatapas purmachisaqmi, Zoán llaqtatapas kañaykusaqmi, Tebas llaqtatapas sentenciaspaymi castigasaq.

¹⁵Egipto nacionpa harkaqnin Sin sutiyuq llaqtamanpas piñakuyniytam kacharisaq, Tebas llaqtapa tukuy ima kapuqninkunatapas chinkarachisaqmi.

¹⁶Egipto naciontam kañaykusaq, Sin llaqtapas nanaywanmi qewipakunqa; Tebas llaqtapa murallankunapas uchkupasqallañam rikurirunqa, Menfis llaqtapas punchawpacham atacasqa kanqa.

¹⁷Avén llaqtapi hinaspa Pibeset llaqtapi jovenkunapas espadawan wañuchisqam kanqaku, warmikunapas preso apasqam kanqaku.

¹⁸Egipto nacionpa atiyninta puchukarachiptiymi, hatun tukunan atiyninta chinkarachiptiymi, Tafnes llaqtapi inti tutayarunqa, Egiptotapas yana puyum pampaykunqa, llaqtankunapi runankunatañataqmi presota apanqaku.

¹⁹Egiptota sentenciaspay castigaptiymi chayraq Tayta Dios kasqayta yachanqaku.

²⁰Chunka hukniyuq watapa punta kaq killanpa qanchis kaq punchawninpim, Tayta Dios rimapayawaspan kaynata niwarqa:

²¹Runapa churin, Egipto nacionpa reynin Faraonpa makinta pakiruptiymi mana pipas hampiykuqnin nitaq wataykuqninpas kanchu, chaynapi kallpanchakuspan espadata hapinanpaq.

²²Chayraykum ñoqa Tayta Dios kaynata nini: Egipto nacionpa reynin Faraonpa contranpim kachkani, iskaynin makintam pakirusaq. Espadata manaña hapinanpaqmi sano kaq makintapas chaynataq pakisqa makintapas pakirusaq.

²³Egipto runakunatam tukuy hinastinman cheqerachisaq, paykunataqa huklaw nacionkunamanmi qarqorusaq.

²⁴Babilonia nacionpa reyninpa makinta kallpanchaspaymi espadayta qoykusaq. Egipto nacionpa reynin Faraonpa makinkunatam ichaqa pakirusaq, chaymi ñakarispa enemigonpa ñawpaqninpi waqanqa.

²⁵Babilonia nacionpa reyninta kallpanchaptiymi rey Faraonpa makinñataq manaña kallpayuq rikurirunqa. Babilonia nacionpa reyninpa makinman espadayta churaptiymi Egipto nacionpa contranpi hatarinqa. Chaynapim Tayta Dios kasqayta yachanqaku.

²⁶Egipto runakunatam tukuy hinastin nacionpi llaqtakunaman cheqerachisaq. Chay-napim Tayta Dios kasqayta yachanqaku.