Read CHUYA QELLQA La Biblia en Quechua de Ayacucho 2012 Ezequiel 32 Bible Online

Ezequiel 32 - CHUYA QELLQA La Biblia en Quechua de Ayacucho 2012 bible

Ezequiel 32

¹Chunka iskayniyuq watapa chunka iskayniyuq kaq killanpa punta kaq punchawninpim Tayta Dios huktawan rimapayawaspan kaynata niwarqa:

²Runapa churin, Egipto nacionpa reynin Faraonmanyá kay aya takita takipuy: Qamqa nacionkunapi leonmanmi rikchakunki, lamar qochapi manchakuypaq hatun animalmanmi rikchakunki, mayuykikunapim challpuqyanki, yakukunatapas chakikiwanmi putkayachinki, mayukunatapas mitullatañam ruwarunki, nispa.

³Tayta Diosmi kaynata nin: Achka llaqtakunapa chawpinpiña kaptikipas hawaykiman mallayta mastarispaymi hapirusqayki.

⁴Allpaman qatatyaspaymi pampapi wischurayachkaqta saqerusqayki, hinaptinmi alton pawaq animalkuna qampa hawaykipi tiyanqaku, purun animalkunam aminankukama aychaykita mikunqaku.

⁵Aychaykitapas orqokunapim masasaq, ayaykiwanpas qechwakunatam huntachisaq.

⁶Pampakunatapas yawarnikiwanmi parqosaq, chay yawarmi orqokunakamaraq chayanqa, mayukunapas yawarnikiwanmi huntaykunqa.

⁷Qamta puchukarachispaymi cielokunatapas tutayarachisaq, chaskakunatapas tutayarachisaq, intitapas puyuwanmi tapaykusaq, killapas manañam kanchanqañachu.

⁸Qam wañuptikim cielokunapi llapallan kanchaqkunatapas tutayarachisaq, nacionnikitapas tuyayaywanmi pampaykusaq. Ñoqa Tayta Diosmi chaynata nini.

⁹Qamta puchukarachisqayta uyarispankum huklaw nacionniyuq runakunapas hukmanyanqaku, mana reqsisqayki nacionniyuqkunapas llumpaytam hukmanyarunqaku.

¹⁰Qamraykum huklaw nacionniyuq runakunamanpas manchakuyta huntaykusaq, ñawpaqninkupi espadayta hoqariptiymi reyninkupas manchakuypa huntaykusqan kanqaku; Qam wichiykuptikim paykunapas vidankurayku katkatatanqaku.

¹¹Ñoqa Tayta Diosmi kaynata nini: Babilonia nacionpa reyninpa espadanmi qampa hawaykiman wichimunqa.

¹²Mana llakipayakuq soldadokunapa wañuchisqanmi achkallaña runaykikunapas wañunqaku. Paykunam Egipto nacionpa hatunchakuyninta chinkarachispanku achkallaña runankunatapas puchukarachinqaku.

¹³Yakuykikunapa patanpi mikuq animalkunatapas chinkarachisaqmi, chay yakutaqa manañam runakunapa chakinpas nitaq animalkunapa atakanpas putkayachinqañachu.

¹⁴Chaynatam yakunkunatapas chuyayachisaq, mayunkunatapas aceiteta hinam kallpachisaq. Ñoqa Tayta Diosmi chaynata nini.

¹⁵Egipto nacionta purmarachiptiymi, tukuy imankunatapas qechuruptiymi, chaypi yachaqkunatapas wañurachiptiymi, Tayta Dios kasqayta yachanqaku.

¹⁶Kay aya takitam huklaw nacionniyuq warmikuna takinqaku. Egipto nacionmanta hinaspa chaypi nana-nanaq yachaqkunamantam chaynataqa takinqaku. Ñoqa Tayta Diosmi chaynata nini.

¹⁷Chunka iskayniyuq watapa chunka iskayniyuq kaq killanpa chunka pichqayuq punchawninpim Tayta Dios huktawan rimapayawaspan kaynata niwarqa:

¹⁸Runapa churin, Egipto nacionpa nana-nanaq runankunamanta kay aya takita takiy; paytaqa atiyniyuq nacionkunapa wawankunatawan kuskata, wañusqakunapa kasqanman uraykuqkunatawan kuskata, allpa pachapa ukunman wischuykuy.

¹⁹¿Qamqa wakinmantapas aswan kuyayllapaqchu karqanki? Chaynaqa, uraykuspayki Diosta mana reqsiqkunawan kuska chutarayay.

²⁰Espadapi wañuqkunawan kuskam wañunqaku; espadaman qosqam kanqaku. Chaynaqa, ¡chay naciontayá nana-nanaq runakunatawan kuskata pusamuychik!

²¹Wañuqkunapa kasqanpi kaq kallpasapa runakunawan allinnin qari-qari runakunam, Egiptomantawan yanapaqninkunamanta kaynata ninqaku: “Ñam kay tutayaq uchkuman chayaramunkuña, kunanqa Diosta mana reqsiqkunawan hinaspa guerrapi wañuqkunawan kuskam chutarayachkanku”, nispanku.

²²Chaypitaqmi tarikun Asiria nacionwan llapallan tropankunapas sepulturanwan muyuriykachikuspa, paykunaqa llapallankum guerrapi wañurqaku.

²³Paykunaqa sepulturapa aswan ukunpiraqmi pampasqa kachkanku. Paykunam kawsayninkupi llapa runakunata manchachirqaku, ichaqa llapallankum guerrapi wañuchisqa karqaku, kunanqa Asiriapa sepulturanpa muyuriqninpiñam kachkanku.

²⁴Chaypitaqmi kachkan Elam nacionpas llapallan soldadonkunapa sepulturanwan muyuriykachikuspa; paykunam guerrapi wañuruspanku Diosta mana reqsichkaspa uku pachaman uraykurqaku. Paykunam kawsayninkupi llapa runakunata manchachirqaku, kunanmi ichaqa wañuqkunapa kasqanpi penqakuypaq kachkanku.

²⁵Elam nacionqa chutarayachkan lliw wañusqa soldadonkunapa chawpinpim, chay soldadonkunaqa Diosta mana reqsichkaspam guerrapi wañururqaku. Paykunam kawsayninkupi llapa runakunata manchakuymanta katkatatachirqaku, kunanqa wañusqakunawan kuskam penqakuypaq kachkanku. Paykunaqa runa wañuchiqkunawan kuskam kachkanku.

²⁶Chaypitaqmi kachkanku Mesecwan Tubalpas, llapallan tropankunapa sepul-turanwan muyuriykachikuspa, paykunaqa Diosta mana reqsichkaspam guerrapi wañururqaku. Paykunam kawsayninkupi llapa runakunata katkatatachirqaku.

²⁷Paykunaqa Diosta mana reqsiqkunapa guerrapi wañuq allinnin qari-qari soldadonkunawanqa manam kuskachu kachkanku, chay qari-qari soldadokunaqa armankuwan kuskam wañusqakunapa kasqanman uraykurqaku; wañuruptinkum espadankuwan sawnaykachirqaku, escudonkutañataqmi hawankuman churaykurqaku; ichaqa paykunapa mana allin ruwasqankuqa hinallaraqmi tullunkupipas kachkan. Chay allinnin qari-qari runakunaqa kawsayninkupim llapa runakunata katkatatachirqaku.

²⁸Egipto nación, qampas Diosta mana reqsiqkunawan chaynataq gue-rrapi wañuqkunawan kuskam chutarayanki.

²⁹Chaypim Edom nacionpas kachkan reyninkunawan hinaspa kamachiqninkunawan kuska. Paykunaqa atiyniyuq kachkaspankupas guerrapi wañuqkunawan kuskam chutarayachkanku. Diosta mana reqsiqkunawan chaynataq wañuqkunapa kasqanman uraykuqkunawan kuskam kachkanku.

³⁰Chaypitaqmi kachkanku norte lawpi kamachikuqkunawan Sidón lawpi yachaqkunapas. Paykunaqa kall-pasapallaña hinaspa manchakuyllapaqña kachkaspankupas guerrapi wañuqkunawan kuskam penqakuypaq kachkanku. Paykunaqa manam Diosta reqsirqakuchu, kunanqa guerrapi wañuqkunawan chaynataq wañuqkunapa kasqanman uraykuqkunawan kuskam pampasqa kachkanku.

³¹Paykunata rey Faraón qawaykuspanmi, llapa tropankunapa wañusqanmanta sonqonta tiyaykachinqa. Chaynaqa, paypas tropankunawan kuskam guerrapi wañunqa. Ñoqa Tayta Diosmi chaynata nini.

³²Ñoqam Faraonta kawsayninpi llapa runakunapa manchakunanta ruwarqani; ichaqa paypas tropankunapiwanmi Diosta mana reqsiqkunawan chaynataq guerrapi wañuqkunawan kuska kanqa. Ñoqa Tayta Diosmi chaynata nini.