Read CHUYA QELLQA La Biblia en Quechua de Ayacucho 2012 Ezequiel 35 Bible Online

Ezequiel 35 - CHUYA QELLQA La Biblia en Quechua de Ayacucho 2012 bible

Ezequiel 35

¹Tayta Diosmi kaynata niwarqa:

²Runapa churin, Seir orqota qawarispa contranpi profetizaspa ñoqa Tayta Diospa kayna nisqayta niy:

³Seir orqo, contraykipim kachkani, atiyniywanmi castigasqayki, purmarachispaymi chunnirachisqayki.

⁴Llaqtaykikunatapas tuñirachispaymi purmarachisaq. Chaynapim Tayta Dios kasqayta yachanki.

⁵Qamqa Israelpa mirayninkunapa wiñaypaq enemigonmi karqanki, mana allin ruwasqankumanta ñakariypi kachkaptinkupas guerrawanraqmi paykunataqa hapirqanki.

⁶Chayraykum ñoqa Tayta Dios kaynata nini: Wañuyman qoykuptiymi qamtaqa wañuyllaña qatikachasunki, runa wañuchisqaykimantam wañuy qatikachasunki.

⁷Seir orqotam manaña imapa kanan chunniqman tikrarusaq, chayninta puriqkunatapas wañuchisaqmi.

⁸Orqonkunatawan moqonkunatapas, qechwankunatawan wayqonkunatapas guerrapi wañuqkunapa ayankunawanmi huntarachisaq.

⁹Wiñay-paq chunniqmanñam tikrarusqayki, llaqtaykikunapipas manañam pipas yachanqañachu. Chaynapim Tayta Dios kasqayta yachanki.

¹⁰Qanmi nirqanki: “Israelpa mirayninkunapa iskaynin nacionninqa ñoqapañam kanqa, Tayta Dios chaypi kachkaptinpas ñoqam hapikuykusaq”, nispayki.

¹¹Ichaqa ñoqa Tayta Diosmi kaynata nini: Imaynam Israelta cheqnikuyllawanña hinaspa piñakuyllawanña ruwasqaykita hinam qamtapas ruwasqayki. Qamta castigaruptiymi pim kasqayta reqsiwanqaku.

¹²Chaynapim yachanki Israel lawpi orqokunamanta burlakuspa rimasqaykita ñoqa Tayta Dios uyarisqayta. Qanmi nirqanki: “Purmachisqam kachkanku, kunanqa ñoqanchikpañam kanqa”, nispayki.

¹³Qamqa mana upallaykuspam ñoqapa contraypi rimarqanki, contraypi rimasqaykitam ñoqaqa uyariruni.

¹⁴Chaynaqa, ñoqa Tayta Diosmi kaynata niki: Qamta purmarachiptiymi kay pachapi llapallan runakuna kusikunqaku.

¹⁵Israelpa mirayninkunapa herencianku allpa purmachisqa kaptinmi kusikurqanki, chaynatapunim qanwanpas ruwasaq: Seir orqom purmachisqa kanqa, Edom nacionmi purmachisqa kanqa. Chaynapim Tayta Dios kasqayta yachanqaku.