Read CHUYA QELLQA La Biblia en Quechua de Ayacucho 2012 Ezequiel 39 Bible Online

Ezequiel 39 - CHUYA QELLQA La Biblia en Quechua de Ayacucho 2012 bible

Ezequiel 39

¹Runapa churin, Gogpa contranpi profetizaspayki ñoqa Tayta Diospa nisqayta kaynata niy: Mesec hinaspa Tubal lawkunapi kamachikuq Gog, qampa contraykipim kachkani.

²Norte lawmanta aysamuspaymi Israel nacionpi orqokunaman pusamusqayki.

³Ichoq makikipi apasqayki arcotam pakirusaq, alleq makikipi apasqayki flechakunatam wikaparusaq.

⁴Chaynapim qamqa llapallan tropaykikunapiwan hinaspa qanwan hamuq nacionkunapiwan Israel nacionpa orqonkunapi wañunkichik, chaypim qamkunata alton pawaq animalkunaman hinaspa purun animalkunaman mikusunaykichikpaq qoykusqaykichik.

⁵Ayaykichikpas llutan pampapim wischurayanqa. Ñoqa Tayta Diosmi chaynata nini.

⁶Magog naciontapas chaynataq lamar qochapa patanpi hawkallaña kawsakuq nacionkunatapas kañaykusaqmi. Chaynapim Tayta Dios kasqayta yachanqaku.

⁷Israel llaqtaypim chuya sutiyta reqsichisaq, manañam saqesaqchu chuya sutiy penqayman churasqa kanantaqa. Chaynapim llapa nacionkunapas Israelpa chuya Diosnin kasqayta yachanqaku.

⁸Kay rimasqaykunaqa chayamuchkanñam, cumplikunqapunim. Ñoqa Tayta Diosmi chaynata nini.

⁹Israel nacionpi llaqtakunam lloqsimuspanku llapa armakunata, tukuy rikchaq escudokunata, arcokunata, flechakunata, lanzakunata chaynataq jabalinakunata kañanqaku. Chaykunam qanchis watapuni yantamanta servikunqa.

¹⁰Manañam montekunamanqa yanta pallaqpas lloqsinqakuñachu, nitaqmi sachatapas kuchunqakuñachu; aswanqa chay armakunam yantapi servikunqa. Ñawpaqta suwaqninkutam paykunaña suwanqaku, imankupas qechuqninkutam paykunaña qechunqaku. Ñoqa Tayta Diosmi chaynata nini.

¹¹Chay tiempopim Gog pampakunanpaq Israel nacionpi huk sitiota qosaq, chay sitiom kachkan lamar qochapa intipa qespimunan lawninpi, illaqkunapa purinan qechwapi. Chaypim Gogtawan tropankunata pampanqaku, hinaptinmi llapa puriqkunapas mana pasayta atinqakuchu. Chayraykum chay sitiota Hamón-gog qechwawan sutichanqaku.

¹²Israelpa mirayninkunam allpanku limpio kananpaq ayakunata qanchis killapuni pampanqaku.

¹³Llapallan runakunam pampanqaku, chay punchawqa yuyarinanku punchawmi kanqa; chay punchawmi atiyniyuq kasqayta qawachikusaq. Ñoqa Tayta Diosmi chaynata nini.

¹⁴Chay qanchis killa pasaruptinmi runakunata minkanqaku lliw nacionta muyumuspanku tarisqanku ayakunata pampamunankupaq, chaynata nacionta limpianankupaq.

¹⁵Chay muyumuq runakunam runapa tullunta tariruspaqa chaypa waqtanpi huk señalta sayachinqaku, chaynapi pampaqkuna hamuspa Hamón-gog qechwapi pampanankupaq.

¹⁶Chaynatam llaqtata limpianqaku. Chaypitaqmi Hamona sutiyuq huk llaqtapas kanqa.

¹⁷Runapa churin, alton pawaq animalkunaman hinaspa purun animalkunaman ñoqa Tayta Diospa nisqayta kaynata nimuy: Tukuy hinastinmanta huñunakamuychik, Israel nacionpa orqonkunaman hamuychik, chaypim sacrificiota ruwasaq, chaypim aychata mikunkichik hinaspa yawarta tomankichik.

¹⁸Allinnin qari-qari soldadokunapa aychantam mikunkichik, kay pachapi kamachikuqkunapa yawarnintam tomankichik; paykunaqa rikchakunku allin cebasqa carnerokunamanraqmi, malta carnerokunamanraqmi, chivatokunamanraqmi hinaspa Basán lawpi poqosqa torokunamanraqmi.

¹⁹Ofrecespa wañuchisqaykunapatam wirantapas saksanaykichikkama mikunkichik, yawarnintapas sinkanaykichikkamam tomankichik.

²⁰Qamkunapaqmi caballokunapa, sillada tropakunapa, tropakunapa hinaspa guerrapi peleaqkunapa aychanwan huk convidota ruwapusqaykichik, hinaptinmi saksanaykichikkama mikunkichik. Ñoqa Tayta Diosmi chaynata nini.

²¹Chaynatam huklaw nacionniyuq runakunaman atiyniyta qawachisaq, llapallan nacionkunam qawanqaku juzgaspay castigasqayta.

²²Israelpa miraykunapas chay punchawmanta qepamanmi Tayta Dios kasqayta yachanqaku.

²³Chaynapim huklaw nacionniyuqkunapas yachanqaku Israelpa mirayninkunaqa huchankurayku preso apasqa kasqankuta. Paykunataqa qepanchakuwasqankuraykum ñoqapas qepanchakururqani hinaspam enemigonkupa makinman qoykuptiy guerrapi wañuchisqa karqaku.

²⁴Millakuypaq ruwasqankuman hinam hinaspa mana kasukuq kasqankuman hinam paykunataqa qepanchakururqani.

²⁵Chayraykum ñoqa Tayta Dios kaynata nini: Jacobpa mirayninkunatam preso risqankumanta kutichimusaq, chuya sutiyraykum paykunataqa kuyapayarisaq, chaynapim sutiyta allinta qawachikusaq.

²⁶Allpankupiña hawka mana pipapas manchachisqan kawsakuspankum, contraypi hatarispanku millakuypaq kaqkunata ruwasqankumanta penqakunqaku.

²⁷Chaynaqa kanqaku enemigonkupa allpanmanta hurqomuspay llapa nacionkunapa qawasqanta paykunapi chuya kasqayta qawachikuptiymi.

²⁸Nacionkunaman presota apachisqaymanta mana chullatapas puchuykuspa allpankuman huñumuptiymi Tayta Dios kasqayta yachanqaku.

²⁹Manañam paykunataqa haykapipas qepanchakusaqñachu, Espirituytam paykunaman chaqchurisaq. Ñoqa Tayta Diosmi chaynata nini.