Read CHUYA QELLQA La Biblia en Quechua de Ayacucho 2012 Ezequiel 40 Bible Online

Ezequiel 40 - CHUYA QELLQA La Biblia en Quechua de Ayacucho 2012 bible

Ezequiel 40

¹Chunka tawayuq watañam Jeru-salén llaqta tuñichisqa kasqanmanta pasarurqa, ñoqaykuñataqmi iskay chunka pichqayuq wataña Babiloniapi preso kachkarqaniku. Chay watapa punta kaq killanpa chunka kaq punchawninpim Tayta Dios hapiykuwaspa chay llaqtaman aparuwarqa.

²Tayta Diosmi visionpi Israel allpaman aparuwaspan hatun orqopa puntanman churaykuwarqa. Chaymanta sur lawman qawariptiymi huk llaqtaman rikchakuq kachkasqa.

³Chayman aparuwaptinmi bronceman rikchakuq runata rikururqani. Paymi llaqtapa punkunpi sayachkasqa, linomanta cordeltawan tupuna kaspita aptarisqa.

⁴Chay runam niwarqa: Runapa churin, allinta uyariway, hinaspayki tukuy ima rikuchisqayta allinta qaway, tukuy kaykunata qawachinaypaqmi kaymanqa pusamusqa karqanki. Tukuy ima rikusqaykitam Israelpa mirayninkunaman willanki, nispa.

⁵Templopa hawa lawninpim huk murallata rikurqani. Chay runapa hapisqan tupunam kasqa kimsa metro sayayniyuq. Chay murallata tupuruptinmi kasqa kimsa metro sayayniyuq hinaspa kimsa metro anchoyuq.

⁶Chaymantam pasarqa templopa intipa qespimunan lawninpi punkuman; gradasninta qespiruspanmi punkupa chakankunata tupurqa, hinaptinmi kimsa metro anchoyuq kasqa.

⁷Chay punkupa iskay lawninpi cuartokunam kasqa kimsa metro largoyuq hinaspa kimsa metro anchoyuq. Huknin cuartomanta huknin cuartokamam kasqa iskay metro parten. Corredorman yaykuna temploman qawaq punkuñataqmi kasqa kimsa metro anchoyuq.

⁸Uku lawman yaykuna corredortapas tupuptinmi kasqa kimsa metro anchoyuq.

⁹Chay corredorpa largonta tupuptinmi kasqa tawa metro sayayniyuq, templo lawman lloqsina punkupa iskay lawninpi pilarkunañataqmi huk metro anchoyuqkama kasqa.

¹⁰Intipa qespimunan lawpi tarikuq punkupa waqtankunapim kaylaw-waklawpi kasqa kimsa cuartochakuna chay sayayniyuqkamalla, chaykunapa waqtankunapi pilarkunapas chay sayayniyuqkamallam kasqa.

¹¹Chaymantam yaykuna punkupa anchonta tupurqa, hinaptinmi kasqa pichqa metro anchoyuq, largonñataqmi kasqa soqta metro parten.

¹²Cuartokunapa ñawpaqninpim kasqa taksa perqakuna parte metro anchoyuqkama. Chay cuartochakunam kasqa tawan lawninman kimsa metroyuqkama.

¹³Chaymantam yaykuna corredorpa anchonta kaylaw kuchunmanta waklaw kuchunkama tupurqa, hinaptinmi kasqa chunka iskayniyuq metro parten.

¹⁴Chaymantam patioman yaykuq corredorta tupuruptin kasqa chunka metro.

¹⁵Chay corredorpa largonmi punkupa hawa lawninmanta corredorpa uku law kuchunkama kasqa iskay chunka pichqayuq metro.

¹⁶Punku waqaychaqkunapa cuartonkunawan pilarninkunam kasqa rejillasqa ventanayuqkama, chay corredorpas uku law muyuriqninpi ventanayuqkamam kasqa. Pilarninkunapim palmeraman rikchakuq dibujokuna kasqa.

¹⁷Chaymantam pusaruwarqa templopa hawa law pationman. Chay patioqa muyuriqnin kuchunpi empedrasqam kasqa. Chay patiopa muyuriqninpim kasqa kimsa chunka cuartochakuna.

¹⁸Chay empedrasqaqa ukuniqpi ruwasqam kasqa, hinaspam punkupa waqtanta muyusqa, anchonpas kasqa chay corredorpa anchon sayayniyuqmi.

¹⁹Chaymantam tupurqa uray lawpi punkupa ñawpaqninmanta qallaykuspa uku law patiopa chimpankama, hinaptinmi norte lawmanpas chaynataq intipa qespimunan lawmanpas kasqa pichqa chunka metro.

²⁰Chay runaqa tupurqataqmi norte lawman qawaq punkupa largontawan anchontapas.

²¹Chay punkupa kaylaw-waklaw waqtanpim kasqa kimsa cuartochakuna, pilarkuna hinaspa corredorninpas; sayayninmi kasqa iskay chunka pichqayuq metro largoyuq, anchonñataqmi kasqa chunka iskayniyuq metro parten.

²²Corredorninpas, ventanankunapas chaynataq dibujasqa palmerankunapas kasqa intipa qespimunan lawman qawaq punkupa sayaynin sayayniyuqllam. Chayman seqanankupaqmi kasqa qanchis gradaskuna, chay gradaskunapa ñawpaqninpiñataqmi kasqa huk corredor.

²³Uku law patiopim huk punku kasqa norte lawman qawaq chaynataq intipa qespimunan lawman qawaq. Hinaptinmi chay punkumanta huknin punkukama tupuruptin kasqa pichqa chunka metro.

²⁴Chaymantam sur lawman aparuwarqa, chaypim kasqa huk punku sur lawman qawaq. Chay punkupa corredornintawan pilarninkunata tupuruptinmi kasqa wakin punkukunapa sayaynin hinalla.

²⁵Chay punkuwan corredorninmi kasqa muyuriqninpi ventanayuqkama. Sayayninmi kasqa iskay chunka pichqayuq metro, anchonñataqmi kasqa chunka iskayniyuq metro.

²⁶Kasqataqmi qanchis gradasninkunapas, corredorninñataqmi uku lawman kasqa; pilarninkunapipas kaylaw-waklaw waqtanpim kasqa palmeraman rikchakuq dibujokuna.

²⁷Uku law patiopas sur lawman qawaq punkuyuqmi kasqa. Chay punkumanta sur lawman qawaq punkukama tupuruptinmi kasqa pichqa chunka metro.

²⁸Chaymantam sur lawman qawaq punkuntakama uku law patioman aparuwarqa. Sur lawman qawaq punkuta tupuruptinmi kasqa wakin punkupa sayaynin sayayniyuqlla.

²⁹Punku cuidaqkunapa cuartonkunapas, pilarninkunapas hinaspa corredorninpas kasqa punta kaqkunapa sayaynin sayayniyuqllam. Chay punkupas chaynataq corredorninpas muyuriqninpi ventanayuqmi kasqa. Sayayninmi kasqa iskay chunka pichqayuq metro, anchonñataqmi kasqa chunka iskayniyuq metro parten.

³⁰Muyuriqninpim kasqa corredorkuna, sayayninmi kasqa chunka iskayniyuq metro parten, anchonñataqmi kasqa iskay metro parten.

³¹Chay corredorqa hawa law pationmanmi qawasqa, pilarninkunapim kasqa palmeraman rikchakuq dibujokuna, chay punkumanmi qespisqa pusaq gradaskuna.

³²Chaymantam aparuwarqa intipa qespimunan lawman qawaq uku law patioman, chaypi tarikuq punkuta tupuruptinmi wakin punkukunapa sayaynin sayayniyuqlla kasqa.

³³Punku cuidaqkunapa cuartonkunapas, pilarninkunapas hinaspa corredorninpas chay wakinpa sayaynin sayayniyuqllam kasqa. Chay punkupas chaynataq corredorninpas muyuriqninpi ventanayuqkamam kasqa. Sayayninmi kasqa iskay chunka pichqayuq metro, anchonñataqmi kasqa chunka iskayniyuq metro parten.

³⁴Corredorninmi hawa law patioman qawasqa, kaylaw-waklaw waqtanpi pilarninkunapas kasqa palmerakunaman rikchakuq dibujoyuqmi; chay punkumanmi qespisqa pusaq gradaskuna.

³⁵Chaymantam norte lawpi punkuman aparuwarqa, hinaptinmi tupuruptin kasqa wakin hina sayayniyuqlla.

³⁶Punku cuidaqkunapa cuartonkunapas, pilarninkunapas hinaspa corredorninpas kasqa wakinpa sayaynin sayayniyuqllam. Sayayninmi kasqa iskay chunka pichqayuq metro, anchonñataqmi kasqa chunka iskayniyuq metro parten.

³⁷Corredorninmi hawa law patioman qawasqa. Pilarninkunapas kaylaw-waklaw waqtanpi palmeraman rikchakuq dibujoyuqmi kasqa, chay punkumanmi qespisqa pusaq gradaskuna.

³⁸Kasqataqmi huk cuartopas corredor lawman punkuyuq, chay cuartopim lliw kañana ofrecenanku animalkunata mayllasqaku.

³⁹Chay yaykuna corredorpim tawa mesakuna kasqa, kaylaw-waklawpi iskay; chaypa hawanpim lliw kañana sacrificiopaq, hucha pampachana ofrendapaq chaynataq hucharayku ofrendapaq animalkunata nakasqaku.

⁴⁰Norte lawmanta yaykumuq corredorpa hawa lawninpipas, kaylawpim iskay mesakuna kasqa waklawpipas iskay mesataqmi kasqa.

⁴¹Chaynapim tawa mesakuna hawa lawpi kasqa, uku lawpipas tawataq; llapanqa kasqa pusaq mesakunam. Chaykunapa hawanpim animalkunamanta ofrendankuta nakasqaku.

⁴²Diosman ofrecenanku lliw kañana sacrificiopaqmi kasqa rumimanta labrasqa tawa mesakuna. Chay mesakunapaqa tawan lawninmi kasqa qanchis chunka pichqayuq centimetroyuqkama; altoman sayayninñataqmi kasqa pichqa chunka centímetro. Chay mesakunapim churasqaku animalkunata nakananku serviciokunata.

⁴³Chay cuartopa uku muyuriq perqanpim ganchokuna kasqa iskay chunka pichqayuq centímetro sayayniyuqkama, chay mesakunapa hawanpim churasqaku ofrecenanku aychakunata.

⁴⁴Uku law patiopim kasqa takiqkunapaq iskay cuartokuna; hukninmi kasqa norte law punkupa waqtanpi sur lawman qawaspan, hukninñataqmi kasqa sur law punkupa waqtanpi norte lawman qawaspan.

⁴⁵Hinaptinmi chay runa niwarqa: Kay sur lawman qawaq cuartoqa templopi llamkaq sacerdotekunapaqmi.

⁴⁶Kay norte lawman qawaq cuartoñataqmi altarpi llamkaq sacerdotekunapaq. Paykunam sacerdote Sadocpa mirayninkuna, paykunallam Leví castakunamantaqa servinankupaq Tayta Diosman asuykunqaku, nispa.

⁴⁷Chay runam uku lawpi patiota tupururqa, hinaptinmi tawan lawninman kasqa pichqa chunka metro. Altarñataqmi templopa ñawpaqninpi kasqa.

⁴⁸Templopa corredorninman aparuwaspanñataqmi punkupa waqtanpi pilarkunapa muyuriqninta tupururqa, hinaptinmi sapakama kasqa iskay metro partenkama. Punkuta hapiq perqakunañataqmi kasqa huk metro partenkama.

⁴⁹Chay corredorpa largonmi kasqa soqta metro, anchonñataqmi kasqa chunka metro, chaymanmi qespisqa chunka gradaskuna. Chay pilarkunapa waqtanpim perqakuna kasqa.