Read CHUYA QELLQA La Biblia en Quechua de Ayacucho 2012 Ezequiel 41 Bible Online

Ezequiel 41 - CHUYA QELLQA La Biblia en Quechua de Ayacucho 2012 bible

Ezequiel 41

¹Chay runam templopa ukuman pusaruwarqa. Chaypim pilarkunapa muyuriqninta tupurqa, hinaptinmi kimsa metroyuqkama kasqa.

²Temploman yaykuq punkupa anchonmi kasqa pichqa metro, hapiqnin perqakunapa anchonñataqmi kasqa iskay metro partenkama. Chaymantam templopa chawpi salanta tupururqa, hinaptinmi largon kasqa iskay chunka metro, anchonñataqmi kasqa chunka metro.

³Chaymantam uku law salanman pasaykuspan pilarninkunapa muyuriqninta tupurqa, hinaptinmi kasqa huk metroyuqkama; punkuñataqmi kasqa kimsa metro anchoyuq, hapiqnin perqakunañataqmi kasqa kimsa metro parten anchoyuqkama.

⁴Tupurqataqmi templopa uku law salantapas, chaymi tawan lawnin kasqa chunka metrokama. Hinaspanmi chay tupuq runa niwarqa: Kay salaqa “Chuyay-chuyaywan” sutichasqam, nispan.

⁵Chay runam templopa perqankunata tupurqa, hinaptinmi kimsa metro anchoyuq kasqa. Chay templopa muyuriqninpim cuartokuna kasqa, chay cuartokunam kasqa iskay metro sayayniyuqkama.

⁶Chay cuartokunaqa kasqa kimsa pisoyuqmi, sapa pisopim kasqa kimsa chunka cuartokuna. Sapa pisopaqmi templopa perqan menosyasqa, chaynapi chay cuartokunapa qerunkuna chay patakpi tiyaspan templopa perqanman mana yaykunanpaq.

⁷Templopa muyuriqninpi kaq cuartokunapa anchonqa sapa pisopim yapakusqa. Chay cuartokunamanmi, kimsa kaq pisokama gradas qespisqa, chayninta qespinankupaq otaq uraykamunankupaqpas.

⁸Chaymantam rikurqani templopas chaynataq muyuriqninpi cuartokunapas kimsa metro altoyuq patakpa hawanpi ruwasqa kasqanta.

⁹Cuartokunapa hawa perqanqa kasqa iskay metro parten anchoyuqmi, karqataqmi sacerdotekunapaq cuartokunamanta templopa waqtanpi cuartokunapa chawpinpi huk callejonpas.

¹⁰Templopa muyuriqninpi cuartokunatam sacerdotekunapa cuartonkunamanta chunka metro anchoyuq callejón rakinasqa.

¹¹Chay callejonmantam iskay punku lloqsisqa, hukninmi norte lawman hukninñataqmi sur lawman. Chay cuartokunapa muyuriqninpim huk callejón kasqa iskay metro parten anchoyuq.

¹²Intipa seqaykunan lawpi patioman qawaq wasim kasqa kimsa chunka pichqayuq metro anchoyuq, sayayninmi kasqa tawa chunka pichqayuq metro; perqankunañataqmi kasqa iskay metro parten anchoyuq.

¹³Chaymantam chay runaqa templopa largonta tupurqa, hinaptinmi kasqa pichqa chunka metro largoyuq. Patiopa anchontawan wasita chaynataq perqankunatapas tupuruptinmi kasqa pichqa chunka metro.

¹⁴Templopa ñawpaqnintawan intipa qespimunan lawpi patiota tupuruptinmi kasqa pichqa chunka metro.

¹⁵Chaymantam tupurqa templopa qepanpi kaq hatun wasita chaynataq kaylaw-waklaw perqakunatapas, hinaptinmi kasqa pichqa chunka metroyuqkama. Chay wasiqa intipa seqaykunan law patiomanmi qawasqa. Templo ukupi kaq salakunawan corredorqa

¹⁶tableasqam kasqa. Punkupa patakninkunapas, rejillayuq ventanankunapas chaynataq templopa muyuriqninpi kimsa pisoyuq cuartokunapa balconninkunapas tableasqam kasqa, chaynaqa kasqa pampanmanta ventanankamam. Ventanankunapas tableasqam kasqa.

¹⁷Tupurqataqmi punkumanta qallaykuspa templo ukukamapas, muyuriqninpi perqakunatapas hawanta-ukuntam tupurqa.

¹⁸Chay tableasqa tablakunapim tallasqa kasqa querubinkunawan palmera sachapa dibujonkuna. Chay querubinkunaqa sapakamam kasqa iskay uyayuqkama.

¹⁹Huknin uyanmi kasqa runapa uyan kaqlla, hinaspam palmera sachapa dibujon lawman qawasqa; huknin uyanñataqmi kasqa leonpa uyan kaqlla, chaypas huklawninpi palmera sachapa dibujon lawmanmi qawasqa. Templopa lliw muyuriqninpim chayna kasqa.

²⁰Pampamanta punkupa hawankamam kasqa chay querubinkunapa dibujonkuna tallasqa, chaynallataq palmera sachapa dibujonkunapas; chaynaqa kasqa santuariopa muyuriq perqankunapim.

²¹Temploman yaykuq punkupa pilarninkunam kasqa tawa waqtayuqkama. Chuyay-chuyaywan sutichasqa cuartopa chimpanpiñataqmi kasqa

²²tablamanta ruwasqa altar, tawan lawninmi kasqa huk metrokama, altoman sayayninñataqmi kasqa huk metro parten. Chay altarpaqa esquinankunapas, pampanpas hinaspa waqtankunapas tablamantam kasqa. Hinaptinmi chay runa niwarqa: Kayqa Tayta Diospa qayllanpi kaq mesam, nispa.

²³Templopas chaynataq “Chuyay-chuyaywan” sutichasqa cuartopas iskay lawman kichakuq punkuyuqmi kasqa.

²⁴Sapa punkum kaylaw waklawman kichakusqa.

²⁵Templopa punkunkunapim tallasqa kasqa querubinman rikchaq chaynataq palmeraman rikchakuq dibujokuna, chaynallataqmi kasqa perqankunapipas hinaspa corredorpipas. Hawa law punkupim kasqa tablamanta balconkuna.

²⁶Corredorpa kaylaw-waklawninpim kasqa rejillayuq ventanakuna, chay ventanakunapipas palmeraman rikchakuq dibujonkunam tallasqa kasqa. Templopa waqtanpi kaq cuartochakunapas balconniyuqkamam kasqa.