Read CHUYA QELLQA La Biblia en Quechua de Ayacucho 2012 Ezequiel 42 Bible Online

Ezequiel 42 - CHUYA QELLQA La Biblia en Quechua de Ayacucho 2012 bible

Ezequiel 42

¹Chaymantam chay runaqa norte lawpi kaq hawa patioman aparuwarqa, hinaspam norte lawpi cuartokunaman pusaykuwarqa, chay cuartokunaqa kasqa templopa qepanpi kaq hatun wasipa chimpanpim hinaspa qepa law patiopa waqtanpim.

²Chay norte lawpi llapallan cuartokunapa largonmi kasqa pichqa chunka metro, anchonñataqmi kasqa iskay chunka pichqayuq metro.

³Chay cuartokunapa huklawninmi qawasqa uku lawpi chunka metro anchoyuq patioman, huklawninñataqmi qawasqa hawa lawpi empedrasqa patioman. Chay cuartokunaqa kasqa kimsa pisoyuqkamam hinaspam chimpa-chimpa qawanakusqa.

⁴Chay qawanakuq cuartokunapa chawpintam huk callejón yaykusqa pichqa metro anchoyuq, largonñataqmi kasqa pichqa chunka metro. Chay cuartokunapa punkunmi norte lawman qawasqa.

⁵Iskaynin altoskunapi cuartokunaqa taksallam kasqa pampapi kaq cuartokunamantaqa, sapa piso ukuniqpi ruwasqa kasqanrayku.

⁶Chay cuartokunaqa kimsa pisoyuq kachkaspapas manam patiopi cuartokuna hina pilarniyuqchu kasqaku, chayraykum altospi kaq cuartokunaqa uku pampapi cuartokunamantaqa taksalla kasqa.

⁷Hawa law patiopa waqtanpi qatinaslla cuartokunapa chimpanpi perqaqa kasqa iskay chunka pichqayuq metro largoyuqmi.

⁸Chay cuartokunapa chimpanpi perqam kasqa iskay chunka pichqayuq metro largoyuq, chayqa hawa law patiomanmi qawasqa. Chay callejonpa largonmi kasqa pichqa chunka metro.

⁹Punta kaq pisopi cuartokunamanqa hawa law pationta otaq intipa qespimunan law pationtam yaykuna kasqa.

¹⁰Sur lawpipas kasqataqmi chayna cuartokunaqa. Chay cuartokunam kasqa templopa qepanpi kaq hatun wasipa chimpanpi chaynataq qepa law patiopa waqtanpi.

¹¹Chay sur lawpi cuartokunapa anchonpas chaynataq sayayninpas kasqa norte lawpi kaq cuartokunapa hinallam.

¹²Chay cuartokunamanpas intipa qespimunan lawnintam huk callejón yaykusqa, chay callejonmi qallarisqa intipa qespimunan law perqapa ñawpaqninpi.

¹³Chay runam niwarqa: Patiopa ñawpaqninpi norte lawpi chaynataq sur lawpi cuartokunaqa “chuyam”. Chaypim Tayta Diosman asuykuq sacerdotekuna Diospaq sapaqchasqa ofrendakunata mikunqaku; chaypitaqmi churanqaku Tayta Diospaq sapaqchasqa ofrendakunatapas, chaykunam: Hucha pampachana ofrenda, hucharayku ofrenda hinaspa kawsaykunamanta ofrenda. Chay cuartokunaqa Diosllapaqña sapaqchasqam.

¹⁴Sichum temploman sacerdotekuna yaykurunqaku hinaspaqa, servisqanku chuya pachata hurqokuspallam hawa patiomanqa lloqsinqaku, chay pachakunaqa Diosllapaqña sapaqchasqam. Runakunapa kasqanman lloqsinankupaqqa huk pachawanmi churakunqaku, nispa.

¹⁵Chay runam templopa uku lawninpi kaqkunata tupuyta tukuruspan, intipa qespimunan lawpi punkunta hurqoruwarqa, hinaspam templopa hawa law muyuriqninta tupurqa.

¹⁶Tupuna kaspita hapiykuspanmi intipa qespimunan lawta tupurqa, hinaptinmi chaypa sayaynin kasqa iskay pachak pichqa chunka metro.

¹⁷Chaymantam norte lawta tupurqa, chaymi sayaynin kasqa iskay pachak pichqa chunka metro.

¹⁸Sur lawtapas tupuruptinmi kasqa iskay pachak pichqa chunka metro.

¹⁹Intipa seqaykunan lawmanpas tupuruptinmi kasqa iskay pachak pichqa chunka metro.

²⁰Tawan lawnintam tupururqa. Templopa kasqan allpapa muyuriqninpim huk muralla kasqa iskay pachak pichqa chunka metro largoyuq. Chay murallam rakisqa Diospaq sapaqchasqa kaqkunata hawapi kaqkunamanta.