Read CHUYA QELLQA La Biblia en Quechua de Ayacucho 2012 Ezequiel 44 Bible Online

Ezequiel 44 - CHUYA QELLQA La Biblia en Quechua de Ayacucho 2012 bible

Ezequiel 44

¹Chaymantam chay runaqa intipa qespimunan lawman qawaq punkuman huktawan kutichiwarqa, hinaptinmi chay punkuqa wichqarayachkasqa.

²Chaypim Tayta Dios kaynata niwarqa: Kay punkuqa wichqasqam kanqa, amam kichanqakuchu. Kay punkuntaqa amam pipas yaykunqachu, chay punkunta Israelpa yupaychasqan Tayta Dios yaykusqanrayku. Chaynaqa, wichqasqam kanqa.

³Kamachikuqllam chay punkupa waqtanpiqa tiyanqa, sapaqchasqa mikuyta Tayta Diospa qayllanpi mikunanpaq. Yaykunqapas lloqsimunqapas corredorman yaykuna punkullantam, nispa.

⁴Chaymantam aparuwarqa norte lawpi punkuman, chay punkuqa kachkan templopa chimpanpim; hinaptinmi temploman Tayta Diospa kanchariynin huntaykusqanta rikurqani, chaymi pampakama kumuykurqani.

⁵Chaymantam Tayta Dios niwarqa: Runapa churin, templopaq kama-chikuykunamantawan reglamentokunamanta allinta yuyaymanaspa allinta uyariy. Sumaqtayá qawariy pikunam temploman yaykunanta hinaspa lloqsinantapas.

⁶Mana kasukuq Israel nacionta niy: Tayta Diosmi kaynata nin: Israelpa mirayninkuna, millakuypaq kaqkuna ruwayta saqeychik.

⁷Qamkunaqa mana qari kayninpi nitaq sonqonpipas seña-lasqa runakunata temployman pusaykuspam millakuypaqtaña ruwarunkichik. Millakuypaqtaqa ruwachkankichik wirata hinaspa yawarta ofrecewaspaykichikmi, pactoytapas manam kasukunkichikchu.

⁸Qamkunaqa ñoqapaq sapaqchasqay kaqkuna ruwanaykichikpaq kamachikuykunatapas manam kasukurqankichikchu aswanqa huklaw nacionniyuq runakunamanñam qoykurqankichik.

⁹Chayraykum ñoqa Tayta Dios kaynata nini: Santuarioymanqa manam sonqonpi hinaspa cuerponpi mana señalasqa huklaw llaqtayuq runaqa yaykunqachu, Israelpa mirayninkunawan yachaq huklaw llaqtayuqkunapas manam yaykunqakuchu.

¹⁰Millakuypaq idolokunataña qatispa Israelpa mirayninkuna ñoqamanta karunchakuruptinkum, llapa levitakunapas saqeruwarqaku, chayraykum huchankumanta castigasqa kanqaku.

¹¹Llapa levitakunam temploypi servikunqaku punkukunata waqaychaspanku chaynataq templopi wakin ruwana kaqkunatapas ruwaspanku. Paykunam lliw kañanapaq animalkunatawan llaqtapa ofrecesqan animalkunatapas nakanqaku, chayllam kanqaku llapa runakunata servinankupaqpas.

¹²Ichaqa paykunam Israelpa mirayninkunata servispanku idolokunata yupaychachirqaku, chaynatam huchallichirqaku; chay huchankumantam paykunaqa castigasqa kanqaku. Ñoqa Tayta Diosmi chaynata nini.

¹³Paykunaqa manam sacerdotekuna hinaqa serviwanankupaq asuykamuwanqakuchu, nitaqmi ñoqapaq sapaqchasqa kaqkunamanpas asuykunqakuchu. Paykunaqa millakuypaq kaqkunata ruwaspanku penqaypi kasqankutam apanqaku.

¹⁴Paykunatam churasaq temployta nanachikunankupaq chaynataq tem-ploypi imapas ruwana kaqkunata ruwanankupaqpas.

¹⁵Israelpa mirayninkuna ñoqamanta karunchakuruptinkupas Leví ayllumanta kaq Sadocpa mirayninkunam ichaqa temploypi servikurqaku, paykunallam serviwananpaqqa asuykamuwanqaku. Paykuna asuykamuwaspankum animalpa wirantawan yawarninta ofrecemuwanqaku. Ñoqa Tayta Diosmi chaynata nini.

¹⁶Paykunam temployman yaykuspanku serviwanankupaq altarniyman asuykunqaku, hinaspam chaypi ruwana kaqkunata ruwanqaku.

¹⁷Uku patiopa punkunta yaykuspam linomanta ruwasqa pachawan pachakunqaku. Templopa uku law pationpi otaq templopi kaspankuqa amam millwamanta ruwasqa pachawanqa churakunqakuchu.

¹⁸Paykunaqa umankupim linomanta uma wankinata apanqaku, churakunqakutaqmi linomanta calzoncillokunawanpas, sudachikuq pachawanqa amam churakunqakuchu.

¹⁹Paykunaqa hawa patiopi runakunapa kasqanman manaraq lloqsichkaspam templopi servinankupaq churakusqanku pachata hurqokuspanku huk pachawan churakunqaku, hinaspam chay pachakunataqa chaypaq sapaqchasqa cuartopi saqenqaku, chaynapi chay pachakunawan llapa runakunata ama chuyancharunanpaq.

²⁰Amam chukchankutapas kachiy-kachiytaqa rutukunqakuchu, nitaqmi hatu-hatun kanankamapas wiñachikunqakuchu.

²¹Templopa uku law pationman yaykuspanqa amam mayqan sacerdotepas vinotaqa tomanqachu.

²²Payqa amam viudawanpas nitaq qosanmanta rakikuruq warmiwanpas casarakunqachu, casarakunqaqa Israelmanta kaq manaraq qari reqsiq sipaswanmi, otaq hukkaqnin sacerdotepa viudanwanmi.

²³Sacerdotekunaqa runaykunatam yachachinanku imam chuya kasqanta chaynataq imam millakuypaq kasqantapas, reqsichinqakutaqmi allin kaqta chaynataq mana allin kaqtapas.

²⁴Quejakuna kaptinpas paykunam juezkuna hina kamachikuyniykunaman hina allin arreglota ruwanqaku. Kamachikuyniykunata ruwayman churaspankum fiestaykunapaq qosqay yachachikuykunatapas kasukunqaku, samana punchawniykunatapas waqaychanqakum.

²⁵Wañusqapa ayanmanqa amam asuykunqakuchu, chaynapi ama qacha-chakurunankupaq. Asuykuspaqa asuy-kunqaku tayta-maman, qari churin otaq warmi churin, wawqen otaq manaraq qari reqsiq panin wañukuptillanmi.

²⁶Llapcharuspanqa chuyanchakuspanmi qanchis punchawtaraq suyanan.

²⁷Chaymantam temploman serviwananpaq kutiykuspan huchamanta sacrificiota ofrecewanqa. Ñoqa Tayta Diosmi chaynata nini.

²⁸Sacerdotekunapa herencianqa ñoqallam kasaq, Israel nacionpiqa amam ima herenciatapas chaskinqakuchu, ñoqallam kani paykunapa herencianqa.

²⁹Paykunaqa Israel miraykunapa ofrecewasqanku kawsaykunatam mikunqaku, mikunqakutaqmi hucharayku chaynataq culparayku ofrecemuwasqanku animalpa aychantapas. Israelpa mirayninkunapa ñoqapaq sapaqchasqankupas paykunapaqmi kanqa.

³⁰Paykunapataqmi kanqa tarpukuynikichikpa punta kaq rurunkunapas chaynataq ofrendakunapas. Tantata ruwanaykichikpaq masa ruwasqaykichikmantapas allinnintam qonkichik. Chaynapim wasikichikta bendecisaq.

³¹Sacerdotekunaqa amam mikunqakuchu kikillanmanta wañuruq animalkunataqa alton pawaq kaptinpas otaq ima animal kaptinpas; amataqmi mikunqakuchu purun animalkunapa puchuntapas.