Read CHUYA QELLQA La Biblia en Quechua de Ayacucho 2012 Ezequiel 47 Bible Online

Ezequiel 47 - CHUYA QELLQA La Biblia en Quechua de Ayacucho 2012 bible

Ezequiel 47

¹Chay pusawaqniy runam templopa punkunman kutirachiwarqa. Hinaptinmi rikurqani templopa punkunpa uku pampanmanta yaku lloqsispan templopa punkun lawman otaq intipa qespimunan lawman kallpaqta. Chay yakum templopa alleq lawninta uraykuspan altarpa sur lawninman risqa.

²Chaymantam norte lawman qawaq punkunta lloqsichiwarqa, hinaspam hawa lawninta intipa qespimunan lawpi punkukama muyuchimuwarqa. Chaypim rikurqani punkupa sur lawninmanta yaku lloqsimuchkaqta.

³Chay runam huk cordelta aptarikuspan intipa qespimunan lawman lloqsirqa, chaymi pichqa pachak metrota tupuruspan chay yakuta chimpachiwaptin chaki senqaykama hayparqa.

⁴Pichqa pachak metrotawan tupuruspanmi kaqllamanta chimpachiwarqa, hinaptinmi yakuqa moqoykamaña hayparqa. Pichqa pachak metrotawan tupuruspan chimpachiwaptinmi chay yakuqa weqawniykamaña hayparqa.

⁵Pichqa pachak metrotawan tupuruptinmi chay mayuqa mana chimpay atinayña rikurirurqa; hatun mayuman tikrakurusqanraykum nadeaspa pasanallaña karqa.

⁶Chaymi niwarqa: Runapa churin, ¿allintachu kayta rikurqanki? nispa. Chaymantam mayu patantakama kutichimuwarqa.

⁷Kutimuchkaspaymi mayupa kaylaw-waklaw chimpanpi achkallaña sachakunata rikurqani.

⁸Hinaptinmi niwarqa: Kay mayuqa richkan intipa qespimunan lawmanmi, hinaspam Jordán mayupa kallpanan wayqoman uray-kuchkan, chaymantam Puchqo lamar qochaman yaykunqa. Chayman chayaruptinmi chay qochapa yakunkuna miski yakumanña tikrakurunqa.

⁹Maymanpas kay mayupa chayasqanpiqa tukuy rikchaq animalkunawan challwakunam kawsanqa. Kay mayupa yakunkunam qatqe yakukunatapas miskiyachinqa, hinaptinmi tukuy rikchaq animalkunaña kawsanqa.

¹⁰En-gadi lawmanta En-eglaim lawkamam challwaqkunapas kanqa, chaypim mallankutapas chakichinqaku. Mediterráneo lamar qochapi hinam challwakunapas tukuy rikchaq hinaspa nana-nanaq kanqa.

¹¹Puchqo lamar qochapa waqtan pukyukunapiwan qochakunapim ichaqa hinalla puchqo yaku kanqa, chaymanta kachita hurqonankupaq.

¹²Chay mayupa kaylaw-waklaw patanpiqa tukuy rikchaq fruta sachakunam wiñanqa, llaqenkunapas manam haykapipas qawinqachu, mana tukuytam rurunqapas; templomanta lloqsiq yakuwan parqosqa kasqanraykum killan-killan poqonqa. Rurunkunam mikunapaq kanqa, llaqenkunañataqmi hampipaq kanqa.

¹³Ñoqa Tayta Diosmi kaynata nini: Israelmanta miramuq chunka iskayniyuq ayllukunapa chaskisqanku allpapa linderonkunaqa kaynam kanqa: Joseypa mirayninmanmi wakin ayllukunaman qosqaykichikmanta huk chaynatawanraq qonkichik.

¹⁴Kay nacionpi allpakunatam ñawpaq taytaykichikkunaman qonaypaq prometekurqani, chaynaqa chay sayaytakamallam partenakunkichik. Kay nacionmi tupaqnikichik allpa kanqa.

¹⁵Allpaykichikpa norte lawman linderonmi Mediterráneo lamar qochamanta qallarinqa, hinaspam Hetlón, Zedad,

¹⁶Hamat, Berota, Sibraim hinaspa Haurán llaqtawan tupanakuq Hazar-haticón lawninta pasanqa. Chay llaqtakunaqa tarikun Damasco llaqtawan Hamat llaqta tupanakuqpim.

¹⁷Chaynaqa, norte lawman linderonmi kanqa Mediterráneo lamar qochamanta qallarispa Hazar-enán lawkama. Hinaptinmi Damasco lawpi chaynataq Hamat lawpi llaqtankuna norte lawninpi tarikunqa.

¹⁸Intipa qespimunan lawpi linderonmi Haurán llaqtawan Damasco llaqta tupanakuqpi qallarinqa, hinaspam Jordán mayuntakama Puchqo lamar qochapa patanpi tarikuq Tamar llaqtakama chayanqa. Jordán mayum Galaad allpamanta Israel nacionpa allpanta rakinqa.

¹⁹Sur lawpi linderonmi qallarinqa Tamar llaqtapi, hinaspam yakupa kanan Meriba-cades lawkama chutarikuspan Egipto wayqonta Mediterráneo lamar qochaman chayanqa.

²⁰Intipa seqaykunan lawpi linderonñataqmi Egipto nacionwan tupanakuqpi qallarispa Mediterráneo lamar qochapa patanta Hamat llaqtapa patankama chayanqa.

²¹Chay allpatam Israelmanta miramuq chunka iskayniyuq ayllukuna rakinakunkichik.

²²Kay allpam tupa-suqnikichik herencia kanqa, qonkichiktaqmi chawpikichikpi yachaq huklaw llaqtayuqkunamanpas chaynataq churinkunamanpas. Paykunataqa Israel ukupi naceqta hinam qawankichik. Kay allpata partenakuspaykichikqa paykunamanpas tupaqnintam partenkichik.

²³Huklaw llaqtayuqkunaqa tupaqninku allpataqa chaskinqaku maymi yachasqanku ayllupa allpanpim. Ñoqa Tayta Diosmi chaynata nini.