Read CHUYA QELLQA La Biblia en Quechua de Ayacucho 2012 Ezequiel 48 Bible Online

Ezequiel 48 - CHUYA QELLQA La Biblia en Quechua de Ayacucho 2012 bible

Ezequiel 48

¹Kaykunam chay chunka iskayniyuq ayllukunapa sutin: Norte lawpi qallarispam Hetlón, Hamat, Hazar-enán lawninta Damasco llaqtapa allpanpa patanta Hamat lawkama, intipa qespimunan lawmanta intipa seqaykunan lawkama Dan ayllupa allpan kanqa.

²Danpa qatiqninmanmi, intipa qespimunan lawmanta Mediterráneo lamar qochapa patankama Aser ayllupa allpan kanqa.

³Aserpa qatiqninmanmi, intipa qespimunan lawmanta Mediterráneo lamar qochapa patankama Neftalí ayllupa allpan kanqa.

⁴Neftaliypa qatiqninmanmi, intipa qespimunan lawmanta Mediterráneo lamar qochapa patankama Manasés ayllupa allpan kanqa.

⁵Manasespa qatiqninmanmi, intipa qespimunan lawmanta Mediterráneo lamar qochapa patankama, Efraín ayllupa allpan kanqa.

⁶Efrainpa qatiqninmanmi, intipa qespimunan lawmanta Mediterráneo lamar qochapa patankama, Rubén ayllupa allpan kanqa.

⁷Rubenpa qatiqninmanmi, intipa qespimunan lawmanta Mediterráneo lamar qochapa patankama, Judá ayllupa allpan kanqa.

⁸Judapa qatiqninmanmi, intipa qespimuna lawmanta intipa seqaykunan lawkama ñoqa Tayta Diospa allpay kanqa. Anchonmi kanqa chunka iskayniyuq kilómetro parten, largonñataqmi kanqa intipa qespimunan lawmanta intipa seqaykunan lawkama wakin ayllukunapa allpan sayayniyuqlla. Chay allpapa chawpinpim temploy kanqa.

⁹Chay allpapim ñoqa Tayta Diospaq allpata sapaqchapuwankichik. Largonmi kanqa chunka iskayniyuq kilómetro parten, anchonñataqmi chunka kilómetro kanqa.

¹⁰Chay allpapim sacerdotekunapaq allpata sapaqchankichik. Largonmi kanqa chunka iskayniyuq kilómetro parten, anchonñataqmi kanqa pichqa kilómetro. Chay allpapa chawpinpim temploy kanqa.

¹¹Chay allpam kanqa Sadocpa mirayninmanta kaq ñoqallapaqña sapaqchakuq sacerdotekunapaq; paykunam temploypi serviwarqaku, llapa levitakuna hina Israelpa mirayninkunapas ñoqamanta karunchakuruptinku.

¹²Chayraykum ñoqallapaqña sapaqchasqaykichik allpapi, levitakunapa allpanpa waqtanpi, llapa sacerdotekunapa allpan kanqa, chayqa ñoqapaq sapaqchasqam kanqa.

¹³Sacerdotekunapa allpanpa waqtanpim, levitakunapa allpan kanqa, largonmi kanqa chunka iskayniyuq kilómetro parten, anchonñataqmi kanqa pichqa kilómetro. Chaynaqa, ñoqapaq sapaqchasqaykichik allpapa largonmi kanqa chunka iskayniyuq kilómetro parten, anchonñataqmi kanqa chunka kilómetro.

¹⁴Chay allpam kay nacionpi allpakunamanta allinnin kanqa. Chay allpaqa manam rantikusqachu nitaqmi cambiasqachu kanqa, ñoqa Tayta Diosllapaqña sapaqchasqa kasqanrayku.

¹⁵Chunka iskayniyuq kilómetro largoyuq chaynataq iskay kilómetro parten anchoyuq puchuq allpam ichaqa mana ñoqapaq sapaqchasqachu kanqa. Chaypiqa runakunam yachanqaku, chaypitaqmi animalkunapa echaderonpas kanqa. Chay allpapa chawpinpim llaqta kanqa.

¹⁶Chay llaqtapa sayayninqa tawan lawninmi kanqa iskay kilómetro iskay pachak pichqa chunka metroyuqkama.

¹⁷Chay llaqtapa muyuriqninpim echaderokuna kanqa. Chay echaderokunaqa tawan lawmanmi kanqa pachak iskay chunka pichqayuq metro anchoyuqkama.

¹⁸Llaqtapa waqtanpi hinaspa ñoqa Tayta Diospa sapaqchasqa allpapa waqtanpim puchuchkan, intipa qespimunan lawman pichqa kilómetro largoyuq allpa, intipa seqaykunan lawmanpas pichqa kilometrotaq. Chay allpakunapim tarpunqaku llaqtapi llamkaq runakuna mikunanpaq.

¹⁹Llaqtapi llamkaqkunaqa kanqa Israel ayllukunamanta kaqkunallam.

²⁰Chaynaqa, ñoqapaq sapaqchasqanku allpawan llaqtapaq sapaqchasqanku allpam kanqa tawan lawninman chunka iskayniyuq kilómetro parten sayay-niyuqkama.

²¹Kamachikuqpa allpanmi kanqa Judá ayllupa chaynataq Benjamín ayllupa chawpinpi puchuq allpa, otaq ñoqallapaqña sapaqchasqanku allpapa chaynataq llaqtapaq sapaqchasqanku allpapa kaylaw-waklaw waqtanpi puchuq allpakuna. Chay allpapa sayayninmi kanqa chunka iskayniyuq kilómetro parten; intipa qespimunan lawmanta chutarikuspanmi intipa seqaykunan lawman lamar qochapa patankama chayanqa.

²²Chay allpapa chawpinpim qepanqa ñoqapaq sapaqchasqa allpa, levitakunapa allpan chaynataq llaqtapaq sapaqchasqa allpapas.

²³Wakin ayllukunapa allpanpas kaynam kanqa: Intipa qespimunan lawmanta qallaykuspam intipa seqaykunan lawpi Mediterráneo lamar qochakama chutarikunqa. Norte lawmanta qallaykuspam sur lawman puntata kanqa Benjamín ayllupa allpan, qepanmanñataqmi qatinqa Simeonpa, Isacarpa, Zabulonpa hinaspa Gadpa allpankuna.

²⁸Gad ayllupa allpanpa sur lawman linderonmi Tamar lawpi qallaykunqa, chaymantam yakupa kanan Meriba-cades lawninta chutarikuspa Egipto wayqontakama Mediterráneo lamar qochakama chayanqa.

²⁹Chay allpatam Israelpa mirayninkuna herencianku kananpaq chaskinqaku; chaynatam partenakunkichik. Ñoqa Tayta Diosmi chaynata nini.

³⁰Llaqtapa punkunkunapas kaynam kanqa: Chay llaqtaqa tawan lawmanmi iskay kilómetro iskay pachak pichqa chunka metro largoyuqkama kanqa.

³¹Llaqtapa punkunkunaqa Israel ayllukunapa sutinwan sutichasqam kanqa. Norte lawmanmi kimsa punkukuna kanqa, chay punkukunapa sutinmi kanqa Rubén, Judá hinaspa Leví.

³²Intipa qespimunan lawman kimsa punkukunapa sutinmi kanqa José, Benjamín hinaspa Dan.

³³Sur lawman kimsa punkukunapa sutinmi kanqa Simeón, Isacar hinaspa Zabulón.

³⁴Intipa seqaykunan lawman kimsa punkukunapa sutinñataqmi kanqa Gad, Aser hinaspa Neftalí.

³⁵Chay llaqtapa muyuriqninpi murallam kanqa isqon kilómetro sayayniyuq. Chay punchawmantam chay llaqtapa sutin kanqa: [7]“Jehová-sama”.