Read CHUYA QELLQA La Biblia en Quechua de Ayacucho 2012 Ezequiel 6 Bible Online

Ezequiel 6 - CHUYA QELLQA La Biblia en Quechua de Ayacucho 2012 bible

Ezequiel 6

¹Tayta Diosmi kaynata niwarqa:

²Runapa churin, Israel nacionpi orqokunata qawaspa chaykunapa contranpi

³kaynata profetizay: Israel nacionpi orqokuna, moqokuna, wayqokuna hinaspa qechwakuna, Tayta Diospa nisqanta uyariychik: Qamkunamanmi wañuyta chayachimusaq, hinaspaymi idoloykikuna yupaychanayki sitiokunatapas chaynataq capillakunatapas tuñichisaq.

⁴Idoloykichikkunaman sacrificanaykichik altarkunapas purmachisqam kanqa, intiman rikchakuq idoloykichikkunapas ñutusqam kanqa, runaykikunatapas chay idolokunapa ñawpaqninpim wañuchisaq.

⁵Israelpa mirayninkuna, ayaykichiktam chay idoloykichikkunapa ñawpaqninman montorusaq, tulluykichikkunatapas altarnikichikkunapa muyuriqninpim cheqerachisaq.

⁶Maypiña yachaptikichikpas chay llaqtakunam purmachisqa kanqa, idoloykichikkunapa altarninkunapas tuñichisqam kanqa. Altarkunawan llapa idolokunapas pasaypaq chinkachisqam kanqa. Incienso kañanaykichik altarkunapas ñutusqam kanqa. Qamkunapaqqa ima ruwakusqaykichikpas chinkachisqam kanqa.

⁷Ñawpaqnikichikpi achkallaña runa wañusqanta qawaspam ñoqa Tayta Dios kasqayta yachankichik.

⁸Chaywanpas ñoqaqa wakillayki-chiktapas puchuykusqaykichikraqmi. Chaynapim qamkunaqa guerramanta ayqespa nacionkunaman cheqechisqa kankichik.

⁹Wañuymanta puchuqkunam may nacionmanña preso apasqa kaspankupas ñoqamanta yuyarinqaku. Paykunaqa waqllikuruq warmi hina kaspanku idolokunataña yupaychanankupaq ñoqata saqeruwasqankumanta castigasqaytam yuyarinqaku, hinaspam kikinkupunipas millakuypaq ruwasqankumanta penqakunqaku.

¹⁰Chaynapim Tayta Dios kasqayta yachanqaku. Paykunaman kay mana allinkunata apachinaypaq rimasqaytaqa manam yanqallachu rimarqani, nispa.

¹¹Chaymantam Tayta Diosqa kaynata niwarqa: Makikikunata pitukuspa taqllakuy hinaspa chakikiwan haytakachaspa kaynata qapariy: ¡Ay, Israel nación imallapiraq rikukunqa millakuypaq kaqkuna ruwasqanmanta! Paykunaqa guerrawan, yarqaywan hinaspa peste onqoykunawanmi wañunqaku.

¹²Karupi kaqkunam peste onqoywan wañunqaku, hina llaqtankupi kaqkunam guerrawan wañunqaku, paykunamanta puchuqkunañataqmi yarqaymanta wañunqaku. Chaynatam piñakuyniyta paykunaman chayachisaq.

¹³Altarkunapa muyuriqninpi, idolokunapa chawpinpi, alto moqokunapi, orqokunapa puntankunapi, llaqesapa sachakunapa sikinkunapi, encina sachakunapa sikinkunapi hinaspa idolonkunaman incienso qontichinankunapim wañusqakunata rikunqaku. Chaykunata qawaspankum ñoqa Tayta Dios kasqayta yachanqaku.

¹⁴Paykunata ñakarichinaypaqmi contrankupi hatarisaq, nacionninkutapas sur law chunniqmanta qallaykuspam norte lawpi Ribla llaqtakama pasaypaqta purmarachisaq. Chaynapim ñoqa Tayta Dios kasqayta yachanqaku, nispa.