Read CHUYA QELLQA La Biblia en Quechua de Ayacucho 2012 Daniel 1 Bible Online

Daniel 1 - CHUYA QELLQA La Biblia en Quechua de Ayacucho 2012 bible

Daniel 1

¹Judá nacionpi rey Joacim kimsa wataña kamachikuchkaptinmi, Babilonia nacionpa reynin Nabucodonosor Jerusalén llaqtapa contranpi hamurqa, hinaspam campamentonta llaqtapa muyuriqninpi hatarirachirqa.

²Judá nacionpa reynin Joacimtam, templopi kaq achka serviciokunatawan rey Nabucodonosorman Tayta Dios qoykurqa, hinaptinmi chay reyqa tukuy imata Sinar sutiyuq Babilonia nacionman aparqa, hinaspam idolonpa kapuqninkuna waqaychana wasinman churaykurqa.

³Chaymantam rey Nabucodonosorqa palacionpi serviqninkunapa jefen Aspe-nazta kamachirqa Israel reykunapa mirayninmanta chaynataq ancha reqsisqa runakunapa mirayninmanta jovenkunata pusananpaq.

⁴Paykunaqa kananku: Allin rikchayniyuq, sano cuerpoyuq, tukuy imapas yachaq, allin yachayniyuqkuna hinaspa palaciopi servikunankupaq hinam. Pay-kunatam yachachinanku Caldea law rimaytawan qellqayta.

⁵Rey Nabucodonosorqa kamachi-kurqataqmi: Chay akllasqa jovenkunamanmi sapa punchaw qonki ñoqapa mikunayta, tomanqakupas ñoqapa vino tomanaytam. Kimsa wata yachachiptinkum serviqniykunaña kanqaku, nispa.

⁶Chay akllasqa jovenkunawanmi kachkarqa Daniel, Ananías, Misael hinaspa Azarías, paykunaqa Judapa mirayninmi karqaku.

⁷Paykunatam palaciopi servikuqkunapa jefen suticharurqa: Danielta Beltsasarwan, Ananiasta Sadracwan, Misaelta Mesacwan, Azariastañataq Abed-negowan.

⁸Danielmi sonqonpi tantearurqa reypa mikunanwan chaynataq tomanan vinowanpas mana qachachakunanpaq. Chayraykum chay palaciopi serviqkunapa kamachiqninta ruegakurqa chay mikuykunata ama qonanpaq.

⁹Kikin Diosmi eunucokunapa kamachiqninwan allimpaq qawaykachispan Danielta llakipayarichirqa hinaspam kuyaykachirqa.

¹⁰Chaymi Danielta nirqa: Ñoqaqa reytam manchakuni, paymi kamachiwarqa imatam mikunaykichiktawan tomanaykichiktapas. Uyaykichikta wakin wiñaymasikichik jovenkunapa uyanmanta ayayasqata rey rikuruspancha qamkunarayku wañurachiwanqa, nispa.

¹¹Palaciopi servikuqkunapa kama-chiqninmi huk mayordomota churarqa Danielmanta, Ananiasmanta, Misaelmanta hinaspa Azariasmanta cuentallikunanpaq. Paytam Daniel nirqa:

¹²Ruegakuykim ñoqaykuta prueba-wanaykikupaq; chunka punchawyá verdurakunallata mikuchiwayku hinas-pa yakullata tomachiwayku

¹³Chay-mantañayá rikchayniykuta reypa mi-kunanta mikuq jovenkunawan tupanaykachiy, hinaspayá ñoqaykuwan imam tanteasqaykiman hina ruway, nispa.

¹⁴Chaymi chay mayordomoqa imam mañakusqankuta uyariykuspan chunka punchaw pruebarqa.

¹⁵Chunka punchaw pasaruptinmi chay jovenkunapa rikchayninqa aswan allinraq karqa reypa mikunan mikuq wakin jovenkunapa rikchayninmantapas.

¹⁶Chaynapim chay jovenkunapaq reypa qosqan mikuytawan vinotaqa mayordomoña apakuq, hinaspam paykunamanqa verdurallataña qoq.

¹⁷Diosmi qorqa chay tawa jovenkunaman yachaytawan allin yuyayniyuq kayta, chaynapim tukuy richkaq qellqakunata yacharqaku chaynataq ima yachaykunatapas hayparqaku. Danielqa entienderqataqmi llapa revelacionkunapa hinaspa mosqoykunapa imam ninantapas.

¹⁸Reypa qayllanman pusanankupaq punchaw chayaramuptinmi, palaciopi serviqkunapa kamachiqnin, rey Nabucodonosorpa qayllanman jovenkunata pusarqa.

¹⁹Paykunawan rey rimaspanmi, wa-kin jovenkunapiqa mana hukllatapas tarirqachu Danielta, Ananiasta, Misaelta hinaspa Azariasta hinaqa. Chaynapim paykunaqa reypa serviqninña kanankupaq akllasqa karqaku.

²⁰Imapas yachay kaqkunamantawan entiendena kaqkunamanta rey tapuspanmi paykunata chunka kuti aswan yachayniyuqtaraq tarirqa, nacionninpi layqakunamantapas hinaspa qawaqkunamantapas.

²¹Chaynapim Danielqa servikurqa rey Ciro munaychakuyta qallarisqan watakama.