Read CHUYA QELLQA La Biblia en Quechua de Ayacucho 2012 Daniel 11 Bible Online

Daniel 11 - CHUYA QELLQA La Biblia en Quechua de Ayacucho 2012 bible

Daniel 11

¹Media nacionpi rey Darío munaychakuyta qallarichkaptinmi, payta kallpanchaspay yanaparqani.

²Kunanmi ichaqa cheqap kaqta yacha-chisqayki: Persia nacionpiqa kimsa reykunaraqmi munaychakunqa, paykunapa qepantañataqmi tawa kaq rey munaychakunanpaq hatarimunqa, chay reyqa kimsantin reykunamantapas aswan apu-apum kanqa. Apullaña kasqanraykum ancha munaysapallaña kanqa, hinaspam llapallanta Grecia nacionpa contranpi hatarichinqa.

³Chaymantam llumpay qari tukuq rey hatarimunqa, payqa llumpay atiywan munaychakuspam munasqanta ruwanqa.

⁴Ichaqa chay munaychakuyninmi allinta richkaspan tawaman rakinasqa kanqa. Chay reypa munaychakuyninqa manam mirayninkunamanpas qosqachu kanqa, manataqmi ñawpaq tiemponpi hina ancha atiyniyuqchu kanqa. Chaynaqa, kanqa tawaman rakinasqa kaspa sapaq runakunapa munaychakusqanña kasqanraykum.

⁵Sur lawpi kaq reymi aswan atiyniyuq kanqa, ichaqa tropankunapa kamachiqninmi paymantapas aswan atiyniyuqraq rikurinqa, payqa atiyniyuq kasqanraykum achkallaña nacionkunapi munaychakunqa.

⁶Watakunapa risqanman hinam, iskayninku huk contratota ruwanqaku. Sur lawpi kaq reymi warmi churinwan casarachinqa norte lawpi kaq reyta, chaynapi iskayninku hawkalla kawsanankupaq. Ichaqa chay casarachisqan warmi churinta qosantinta, wawankutawan chaynataq waqaychaqninkunatawan kuskata wañura-chisqankuraykum chay contrato ruwas-qanku yanqachakurunqa.

⁷Ichaqa chay warmipa hukkaqnin ayllunmi norte lawpi tropakunapa contranpi hatarirunqa, hinaspam norte lawpi reypa murallasqa llaqtanman yaykuruspa vencerunqa.

⁸Venceruspanmi diosninkunatapas, qori-qollqemanta alhajankunatapas Egipto nacionman apakunqa, hinaspam norte lawpi kaq reyta unay watakuna hawkallata saqeykunqa.

⁹Chaymantam norte lawpi reyqa, sur lawpi kaq reypa contranpi hatarinqa, ichaqa mana imayuqmi nacionninman kutinqa.

¹⁰Ichaqa norte lawpi reypa churinkunam piñakuspanku nana-nanaq tropakunata hatarichinqaku. Lloqlla hinaraq mastarikuspankum sur lawpi reypa murallasqa llaqtanman chayaruspanku huktawan atacanqaku.

¹¹Norte law tropakunapa chayamusqanwanmi sur lawpi reyqa llumpayta piñakurunqa, hinaspam chay nana-nanaq tropakunawan peleaq lloqsispan pasaypaqta vencerunqa.

¹²Chay nana-nanaq tropakunata vencerusqanwanmi sur lawpi kaq reyqa llumpayta hatunchakurunqa, ichaqa waranqantin-waranqantin tropakunata wañurachichkaspanpas manam unaytachu munaychakunqa.

¹³Watakuna pasaruptinmi, norte lawpi reyqa, ñawpaqta nana-nanaq tropakuna huñusqanmantapas aswan achkataraq huñurunqa, hinaspam allin armasqa achkallaña tropankunawan sur lawman kutirinqa.

¹⁴Chay tiempopim, sur lawpi reypa contranpi achka runakuna hoqarikurunqaku. Paykunawantaqmi Israel llaqtaykimanta kaq mana allin runakunapas hatarinqaku, imaynam visionpi qawasqaykiman hina, ichaqa vencerachikunqakum.

¹⁵Norte lawpi rey hamuruspanmi, sur lawpi llaqtapa murallanpa qepanpi allpakunata huk hawaqllaman montorunqa, chayninta yaykuspam chay llaqtata vencerunqa. Sur law reypa tropankunaqa manam imayna kutichikuytapas atinqakuchu, akllasqa soldadonkunapas mana kallpayuqñam rikurirunqaku.

¹⁶Norte lawmanta hamuq reymi vencerachikuq enemigonkunawan munasqanta ruwanqa, manam pipas paypa contranpi sayariyta atinqachu. Chay sumaq allpapi munaychakuspam tukuy imata purmachinqa.

¹⁷Hinaspam sur law nacionpipas munaychakuyta munanqa, chaypaqmi sur lawpi reywan huk contratota ruwanqa; chay contrato allin lloqsinanpaqmi warmi churinwan casarachinqa, chaynataqa ruwanqa sur lawpi reypa munaychakuyninta tuñirachinanpaqmi, chaywanpas chay tanteasqankunaqa manam cumplikunqachu.

¹⁸Norte lawpi reyqa munapayanqataqmi lamar qochapa patanpi llaqtakunatapas, hinaspam guerrawan achkaqta vencerunqa. Ichaqa huk kamachikuqmi chay reypa hatunchakuyninta puchukarachinqa, hinaspam chay reyta penqayman churanqa.

¹⁹Chaymantam chay norte lawpi reyqa nacionninpi murallasqa llaqtanman kutikunqa, ichaqa kutisqanpim wañurunqa, hinaspam pasaypaqta chinkarunqa.

²⁰Paypa rantinpi hatariq reyñataqmi munaychakuyninpi allinta takyananpaq impuesto cobraqta kachanqa, ichaqa manapas unaymantam wañurachinqaku, payqa manam guerrapichu nitaqmi piñanakuypichu wañunqa.

²¹Paypa rantinpim huk cheqnipay runa rey kananpaq hatarinqa, ichaqa manam reyta hinachu qawanqaku. Payqa qonqaymantam rikuriramunqa, hinaspam sakri-llawan munaychakuyta qallarinqa.

²²Payqa kallpasapallaña lloqlla hinam contranpi hatarimuqkunatapas pasaypaqta chinkarachinqa, paykunatawan kuskatam contrato ruwaq kamachikuqtapas wañurachinqa.

²³Chay cheqnipay reyqa, paywan contrato ruwaqkunatapas engañaruspam aslla runayuq kachkaspapas vencerunqa.

²⁴Tukuy imapa kasqanpi hawka kawsakuq llaqtakunamanpas yaykuruspanmi taytanpa chaynataq ñawpaq taytankunapa mana ruwasqankunata ruwanqa. Soldadonkunamanmi aypunqa guerrawan tukuy ima qechusqanta, aypunqataqmi qori-qollqe salteasqankunatapas. Payqa murallasqa llaqtakunata atacananpaqmi tanteanqa, chaywanpas chay tanteasqanqa manam unaypaqchu kanqa.

²⁵Atiyninpi kallpanchakuspam achka nana-nanaq tropankunawan sur law reypa contranpi rinqa. Sur lawpi reypas nana-nanaq kallpasapa tropankunata huñuruspan guerraman yaykunqa, ichaqa runankuna qepancharuptinmi enemigonkuna venceyta mana atinqachu.

²⁶Paytaqa mesanpi mikuqmasinkunallam wañurachinqaku, nana-nanaq tropankunapas lloqllapa apasqan hinam rikurirunqaku, chaynapim achkallaña soldadonkuna wañurunqaku.

²⁷Chay iskay reykunaqa mana allin ruwanakuyllapi piensaspankum huk mesallapi tiyaykuspanku llullakunallata ninakunqaku, ichaqa yanqapaqmi chaykunata rimanakunqaku, Diospa nisqan tiempo manaraq chayamusqanrayku.

²⁸Norte lawmanta hamuq reymi nacionninman kutikunqa guerrapi qechusqan qori-qollqekunata aparikuspan, hinaspanmi Diospa pacto ruwasqanpa contranpi hatarinqa. Payqa imam munasqankunata ruwaruspanmi nacionninman kutikunqa.

²⁹Imam nisqan tiempo chayaramuptinmi sur lawman huktawan kutirinqa, ichaqa manam puntapi hinañachu vencenqa.

³⁰Payqa Quitim lawmanta hamuq barcokunapa harkasqan kaspanmi hukmanyasqallaña kutirinqa. Diospa pacto ruwasqanpa contranpi llumpayllataña piñakuruspanmi millakuypaq kaqkunata ruwanqa, hinaspanmi Diospa pacto ruwasqan qepanchaqkunata yanapanqa.

³¹Soldadonkunapas Diospa santuarionpim chaynataq amparakuna wasipim millakuypaq kaqkunata ruwanqaku, Diospaq sapa punchaw animalkuna wañuchinankutapas harkakunqakum, hinaspam chaypa rantinpi millakuypaq kaqtaña ofrecenqaku.

³²Chay reyqa, Diospa pactonta qepanchakuqkunatam sumaq sakrillawanña rimapayaspan rantiypaq-rantirunqa; Dios reqsikuqkunam ichaqa kallpanchakuspa kutipakunqaku.

³³Llapa runakunamanta allin yachay-niyuq kaqkunam achka-achka runakunata yachachinqaku, ichaqa tiempopa risqanman hinam wakiqninku guerra-pi ñakarispa kañasqa kanqaku, wakin-ñataqmi imallankutapas qechurachikuspanku preso rinqaku.

³⁴Chayna ñakarichisqa kachkaspankum asllapipas yanapasqa kanqaku, hinaptinmi iskay uya runakuna achkallaña paykunaman hukllawakurunqaku.

³⁵Yachayniyuq runakunamantapas wakinmi qatikachasqa kanqaku, chayna ñakarichisqaqa kanqaku metal chulluchisqa hina chuyanchasqa kanankupaqmi. Paykunaqa mana allinmanta rakisqa kaspankum mana huchayuqña kanqaku. Chaynaqa, tarikunqaku tukupay tiempo chayamunankamam.

³⁶ Norte nacionniyuq reymi tukuy imam munasqanta ruwanqa, hatun tukuspanmi kaynata ninqa: “Ñoqaqa llapallan dioskunapapas hawanpim kachkani”, nispa. Payqa Diospa contranpipas millakuypaq mana allinkunatam rimanqa. Payqa tukuy imapim allinllaña lloqsinqa Diospa piñakuynin payta hayparunankama. Diosqa imam tanteasqantaqa ruwanqapunim.

³⁷Chay norte nacionniyuq reyqa, ñawpaq taytankunapa diosnintapas, warmikunapa yupaychasqan diostapas nitaq mayqan diostapas manam kaqpaqpas hapinqachu. Payqa llapallan dioskunamantapas aswan hatunpaqmi hapikunqa.

³⁸Ichaqa murallasqa llaqtakunata waqaychaq diostam yupaychanqa, chay diostaqa ñawpaq taytankunapas manam reqsirqachu. Chay diostam qori-qollqewan, sumaq alhaja rumikunawan hinaspa ancha valorniyuq kaqkunawan yupaychanqa.

³⁹Payqa rikchaqmana idolokunata yupaychaq tropakunawan yanapa-chikuspam, mana yaykuy atina mura-llasqa llaqtakunata vencenqa; reyninkupaq chaskiqnin runakunamanmi tukuy imata qonqa, chay runakunata hatunchaspanmi llaqtakunapi kamachikuq kanankupaq churanqa. Paykunamanqa yanapasqanmantam chakrakunata rakinanqa.

⁴⁰Tukupay tiempo chayaramuptinmi, sur lawpi rey guerrawan hapirunqa norte lawpi reyta. Ichaqa norte lawpi reymi wayra-para hinaraq sur lawpi reypa contranpi mastarikunqa, guerrapaq carretankunawan, sillada tropankunawan, achkallaña barcokunawanmi chayarunqa; hinaspam lloqlla hinaraq achka llaqtakunata chinkarachinqa.

⁴¹Sumaq allpamanpas yaykuruspanmi achka-achka runakunata wañurachinqa; Edom nacionniyuq Moab nacionniyuq runakunam ichaqa paymanta ayqekunqaku, ayqekunqakutaqmi Amonpa mirayninmanta ancha reqsisqa runa-kunapas.

⁴²Achka nacionkunapi mu-naychakuptinmi Egipto nacionpas mana lluptinqachu.

⁴³Egipto nacionpa qori-qollqenkunatapas chaynataq ancha valorniyuq kapuqninkunatapas apakunqam. Libia nacionwan Etiopía nacionpas paytam servinqaku.

⁴⁴Ichaqa intipa qespimunan lawmantawan norte lawmantam mancharikuypaq noticiakunata uyarirunqa, chaymi piñakuyllawanña lloqsinqa tukuy imatapas purmachispan achka runakunata wañuchinanpaq.

⁴⁵Chay reyqa, carpankunatam lamar qochamanta Diospaq sapaqchasqa “kuyayllapaq moqoman” riq ñanpi sayachinqa. Ichaqa wañunan punchaw chayaramuptinmi manaña pipas yanapanqachu.