Read CHUYA QELLQA La Biblia en Quechua de Ayacucho 2012 Daniel 3 Bible Online

Daniel 3 - CHUYA QELLQA La Biblia en Quechua de Ayacucho 2012 bible

Daniel 3

¹Rey Nabucodonosormi qorimanta idolota ruwachirqa, chaypa sayayninmi karqa yaqa kimsa chunka metro, anchonñataqmi yaqa kimsa metro karqa. Hinaspam kamachikurqa Babilonia lawpi Dura sutiyuq pampapi sayachinankupaq.

²Rey Nabucodonosormi qayachirqa gobernadorkunata, capitankunata, kamachikuqkunata, consejaqkunata, tesorerokunata, juezkunata hinaspa provinciankunapi lliw kamachikuqkunatapas, hamuspanku rey Nabucodonosorpa ruwachisqan idolota dedicanankupaq.

³Chaynapim chay nacionpi ancha reqsisqa runakunaqa chay idolopa ñawpaqninman huñunakamurqaku rey Nabucodonosorpa sayachisqan idolota dedicanankupaq.

⁴Willakamunanpaq reypa kamachisqanmi qayaykachakurqa kaynata: Llapallan runakuna, lliw nacionkunamanta kaqkuna hinaspa rikchaqmana rimayniyuqkuna, uyariychik.

⁵Trompetata, qenata, arpata, antarata hinaspa tukuy rikchaq tocanakunata uyarispaykichikmi qonqorakunkichik reypa qorimanta sayachisqan idolota hatunchanaykichikpaq.

⁶Pipas chay idolopa ñawpaqninpi qonqorakuspa mana hatunchaqqa, chaypunillam rupachkaq hornoman wischusqa kanqa, nispa.

⁷Chaynapim llapallan huñunakuq runakuna, lliw tocanakuna tocasqankuta uyarispanku qonqorakurqaku, hinaspam reypa sayachisqan qorimanta idolota hatuncharqaku.

⁸Caldea runakunañataqmi chayman hapipakuruspanku rey Nabucodono-sorman asuykurqaku judío runakunata acusanankupaq.

⁹Paykunam nirqaku: Wiñaypaq kawsakuq reynillayku,

¹⁰qanmi kamachikurqanki trompetata, qenata, arpata, antarata hinaspa tukuy rikchaq tocanakunata uyarispa llapachallan runakuna qonqorakuykuspa qorimanta idolota hatunchanankupaq.

¹¹Kamachikurqankitaqmi pipas qonqorakuspa mana hatunchaqqa chaypunilla rupachkaq hornoman wischusqa kananpaq.

¹²Reynillayku, ichaqa kachkanmi qampa kamachisqaykita mana kasukuq judío runakuna, paykunataqa Babilonia lawpi kamachikuqkuna kanankupaqraqmi churarqankipas, chayna kachkaspapas manam idoloykikunatapas nitaq qorimanta ídolo sayachisqaykitapas yupaychankuchu, paykunapa sutinmi: Sadrac, Mesac hinaspa Abed-negom, nispa.

¹³Chaymi rey Nabucodonosor sinchita piñakuspa Sadracta, Mesacta hinaspa Abed-negota pusachimurqa, paykunatam reypa ñawpaqninman chaylla pusaramurqaku.

¹⁴Hinaptinmi paykunata rey Nabucodonosor tapurqa: ¿Cheqapchu idoloykunata qamkuna mana yupaychankichik, qorimanta sayachisqay idolotapas manachu hatunchankichik?

¹⁵Chaynaqa, ¿listochu kachkankichik tocasqankuta uyariykuspa ruwachisqay idolopa ñawpaqninpi qonqorakunaykichikpaq hinaspa hatunchanaykichikpaq? Mana hatunchaspaykichikqa chaypunillam rupachkaq hornoman wischusqa kankichik. Hinaptinqa, ¿yaqachu mayqan diospas makiymanta librarusunkichikman? nispa.

¹⁶Chaymi Sadracpiwan Mesac hinaspa Abed-nego kaynata nirqaku: Kay niwasqaykikumantaqa manam imatapas nisqaykikuchu.

¹⁷Rupachkaq hornoman wischuykachiwaptikikupas yupaychasqayku Diosniykum libra-wanqaku, librawanqakutaqmi maki-kimantapas.

¹⁸Chaynaqa, reynillay-ku, manaña Diosniyku librawaptinkupas manam idoloykikunataqa yupaychasaqkuchu, nitaqmi qorimanta sayachisqayki idolotapas hatunchasaqkuchu, nispanku.

¹⁹Rey Nabucodonosormi uyanpas pukayanankama llumpa-llumpayta piñakururqa Sadracpa, Mesacpa hinaspa Abed-negopa contranpi, hinaspam kamachikurqa hornota imaynam caldeachinankumantapas qanchis kuti mastaraq caldeachinankupaq.

²⁰Chaymantam tropankunapi kallpasapa soldadokunata kamachirqa Sadracta, Mesacta hinaspa Abed-negota chaqnaruspa rupachkaq hornoman wischuykunankupaq.

²¹Chaynapim chay kimsa jovenkunata soldadokuna chaqnaruspanku hina pachantillanta rupachkaq hornoman wischuykurqaku.

²²Chaylla ruwanankupaq rey kamachikusqanraykum chaynataq hornopas llumpayta rupasqanraykum, chay jovenkuna wischuykuq soldadokunata lenwachkaq nina hayparamuspa wañurachirqa.

²³Sadracwan, Mesacwan Abed-negoñataqmi hina chaqnasqa chay rupachkaq hornoman wichiykurqaku.

²⁴Rey Nabucodonosorñataqmi chaylla hatarispan consejaqninkunata mancharisqallaña tapurqa: ¿Manachum kimsa runakunallata chaqnaruspa rupachkaq hornomanqa wischuykurqankichik? nispa. Hinaptinmi paykuna nirqaku: Arí reynillayku, chaynam, nispanku.

²⁵Reyñataqmi nirqa: Ñoqaqa qawachkani mana chaqnasqa tawa runakunatañam; paykunaqa rupachkaq ninapa chawpinpim mana imanasqa purikuchkanku, paykunawan puriq runaqa diosmanmi rikchakun.

²⁶Chaynata niruspanmi rey Nabu-codonosorqa hornopa punkunman asuy-kurqa, hinaspam qayakurqa: Tukuy imapa hawanpi munaychakuq Diospa serviqnin Sadrac, Mesac, Abed-nego, lloqsimuychik, nispa. Chaymi kimsanku rupachkaq nina ukumanta lloqsimurqaku.

²⁷Kamachi-kuqkunawan, gobernadorkuna, capitankuna hinaspa consejaqkunañataqmi asuykuspanku paykunata qawaykurqaku ninapapas mana imanasqanta, chukchankupas mana qaspasqa kasqanta, pachankupas manam imanakusqachu, nitaqmi rupa-rupallatapas asnasqakuchu.

²⁸Hinaptinmi rey Nabucodonosor chaylla nirqa: Sadracpa, Mesacpa, Abed-negopa Diosnin hatunchasqa kachun. Paymi angelninta kachamurqa hapipakuqnin serviqninkunata libraykunanpaq. Arí, paykunaqa Diosnillankuta hatunchayta munaspankum ñoqapa kamachikusqaytapas mana kasukurqakuchu, wañuytapas mana manchakuspankum huk dioskunataqa mana yupaycharqakuchu.

²⁹Chayraykum llapallan runakunata, llapallan nacionkunata chaynataq huk rikchaq rimayniyuq runakunatapas kamachini; Sadracpa, Mesacpa, Abed-negopa Diosninkupa contranpi rimaqkunaqa tisapasqam kanqaku, wasinkupas ispakuna raqaymanñam tikrasqa kanqa, paykunapa Diosnin hina kayna librakuykuqqa manam kanchu, nispa.

³⁰Chaynapim rey Nabucodonosorqa, Sadracta, Mesacta, Abed-negota aswan atiyniyuq kanankupaqraq Babiloniapi churarqa.