Read CHUYA QELLQA La Biblia en Quechua de Ayacucho 2012 Daniel 9 Bible Online

Daniel 9 - CHUYA QELLQA La Biblia en Quechua de Ayacucho 2012 bible

Daniel 9

¹Rey Asueropa churin Dariom Caldea lawpi munaychakuyta qallaykurqa, rey Darioqa karqa Media nacionniyuq runakunapa castanmi.

²Pay punta kaq watapi munaychakuyta qallarichkaptinmi, ñoqa Daniel profeta Jeremiaspa qellqanta estudiachkarqani, chay qellqapim rimachkan Jerusalén llaqtaqa qanchis chunka watapuni purmachisqa kananmanta, Jeremiasmanmi Tayta Dios chaynata nirqa.

³Hinaptinmi ayunakuspay Señor Diosta mañakurqani, paytaqa mañakurqani hawaypi uchpallaña luto pachayuqmi.

⁴Tayta Diosta mañakuspaymi huchaykumanta kaynata willakurqani: Hatu-hatun manchakuypaq Señor Diosnilláy, kasuqnikikunawan pacto ruwasqaykita cumpliqmi kanki, kamachikuynikikuna kasukuqta kuyapayaykuqmi kanki.

⁵Ñoqaykuqa qampa contraykipi huchallikuruspam llumpa-llumpayta mana allinkunata ruwaruniku, kamachikuynikikunatawan yachachikuynikikunatapas mana kasukuspam qepanchakuruniku.

⁶Servisuqniki profetaykikunatapas manam uyarirqanikuchu, paykunaqa qanmantam willakurqaku reyniykumanpas, kamachiwaqniykumanpas, ñawpaq taytaykumanpas chaynataq nacionniykupi runakunamanpas.

⁷Señorllayku, qamllam kanki tukuy imapas allin ruwaqqa, Judapa mirayninkunam, Jerusalén llaqtapi yachaqkunam, tukuy hinastinpi yachaq Israel ayllukunam penqaypi kachkaniku. Qampa contraykipi hatarispa qepanchasqaykuraykum tukuy hinastinman cheqerachiwarqankiku.

⁸Dios Taytallayku, ñoqaykuqa penqakuypaqmi kachkaniku; reyniykupas, kamachiqniykupas, ñawpaq taytaykupas, contraykipim huchallikuruniku.

⁹Ñoqaykuqa manam kasurqaykikuchu, Señor Diosnillayku llakipayaykuwaspaykikum huchaykutapas pampachaykunki.

¹⁰Dios Taytallayku, kamachikuy-nikikunata profetaykikunawan willachi-wasqaykikutapas manam uyarirqanikuchu, yachachikuynikikunaman hina kawsanaykupaqpas manam kasukurqanikuchu.

¹¹Israelpa mirayninkunaqa imam yachachiwasqaykikutapas llapallaykum mana kasukurqanikuchu, qampa nisqaykitaqa manam uyariytapas munarqanikuchu; contraykipi huchallikuruspaykum juraspa ñakaynikikunawan ñakasqa kachkaniku, imaynam serviqniki Moisespa qellqasqanman hina.

¹²Qamqa ñam cumplirunkiña contraykupi chaynataq kamachiqniykupa contranpi rimasqaykitapas, chaynapim chay hatun ñakariyta hawaykuman chayachimurqanki; sasachakuyqa manam haykapipas Jerusalén llaqtapiqa karqachu.

¹³Moisespa qellqasqan yachachi-kuykunaman hinam kay tukuy ñakariy-kunaqa chayaruwanku. Dios Taytallayku, chaywanpas ñoqaykuqa manam qampa yanapakuynikitaqa maskarqanikuchu, mana allin ruwasqaykumantapas manataqmi wanakurqanikuchu, cheqap kaqnikikunataqa manam uyariqpas tukurqanikuchu.

¹⁴Chayraykum Dios Taytallayku tukuy kay mana allinta ñoqaykuman kachaykamunki. Dios Taytallayku, qamqa tukuy imapas allin ruwaqmi kanki, ñoqaykum ichaqa niwasqaykikuta uyariytapas mana munarqanikuchu.

¹⁵Señor Diosnillayku, hatun atiynikiwanmi Egipto nacionmanta llaqtaykita hurqomurqanki, chay ruwasqaykikunawanmi qamqa anchallataña reqsichikunki. Chaywanpas ñoqaykuqa huchallikuruspam mana allinta ruwarqaniku.

¹⁶Señornillayku, allin ruwaq kasqaykiraykuyá akllakusqayki Jerusalén llaqtaykipa contranpiqa amaña piñakuyñachu nitaq rabiakuyñachu. Huchaykuraykum hinaspa ñawpaq taytaykupa mana allinkuna ruwasqankuraykum Jerusalén llaqtaykiwan runaykikunapas muyuriqniykupi nacionkunapa usuchisqan kachkaniku.

¹⁷Chaynaqa, Diosnillayku, kunanyá kay serviqnikipa qayakuyninta uyariykullaway, sutikiraykuyá purmachisqa santuarioykita llakipayaykuy.

¹⁸Diosnilláy, kumuykamuspayá uyariykullaway, ñawillaykitapas kichariykuspayá ñakariyniykutawan sutiki hatunchanayku llaqtapa purmasqa kasqanta qawariykuy. Ñoqaykuqa manam mañakuchkaykiku allin ruwasqaykupi hapipakuspachu, aswanqa ancha llakipayakuq kasqaykipi hapipakuspam.

¹⁹¡Señorlláy, uyariykullawayku! ¡Diosnilláy, pampachaykullawayku! ¡Señorlláy, uyariykuspa yanapay-kullawayku! Diosnilláy, kikikirayku, Jerusalén llaqtaykirayku, sutikita hatunchaq runaykikunarayku ama unamuychu, nispa.

²⁰Tayta Diosta mañakuspay huchay-kunatapas hinaspa llaqtamasiyku-napa huchantapas hinallaraq willa-kuchkaptiymi, sapaqchakusqan moqorayku mañakuchkaptiymi,

²¹Diosman tardeykuq ofrendata ofrecena horata, ángel Gabriel altonta pawamuspa ñoqapa kasqayman chayaramurqa. Paytaqa punta visionniypipas rikurqaniñam.

²²Paymi kaynata niwarqa: Daniel, ñoqaqa qamta entiendechinaypaqmi hamurqani.

²³Mañakuyta qallaykuptillaykiraqmi Diosqa uyariykusurqankiña. Qamqa paypa ancha kuyasqanmi kanki, chayraykum uyarisusqaykita qanman willaykuq hamurqani. Chaynaqa, visionpi qawasqaykita entiendenaykipaqyá allinta uyariway:

²⁴Qanchis chunka semanam tanteasqa kachkan nacionnikipaqpas chaynataq chuya llaqtaykipaqpas, mana kasukuyninkuwan huchallikuyninkupas tukunanpaq, huchapas puchukachisqa kananpaq, mana allin ruwayta pampachananpaq; allin ruwayta wiñaypaq takyachinanpaq, visionpas profeciapas cumplikunanpaq, Chuyay-chuyay lugarpas Diosllapaqña sapaqchasqa kananpaq.

²⁵Kaytam yachanayki hinaspa allinta entiendenayki: Jerusalén llaqta huktawan hatarichisqa kananpaq kamachikuy lloqsimusqanmantam kamachikuq Mesías hamunankama qanchis semana pasanqa. Chaymantam soqta chunka iskayniyuq semanakuna pasanqa; chay tiempopim Jerusalén llaqtapa plazankunapas perqankunapas musoqmanta hatarichisqa kanqa. Chaykunaqa ruwasqa kanqa hatun sasachakuy tiempopim.

²⁶Chay soqta chunka iskayniyuq semanakuna pasaruptinmi, kamachikuq Mesías wañuchisqa kanqa. Jerusalén llaqtatapas huk reymi tropankunawan hamuruspa tuñirachinqa, chaynataqmi santuariotapas tuñirachinqa. Lloqlla hinam puchukay chayaramunqa, puchukay chayamunankamam guerrakunapas hinaspa purmachiykunapas kanqa.

²⁷Chay reymi achka runakunawan contratota huk semanapaq ruwanqa; ichaqa chawpi semanallapiraqmi Diospaq animalkuna wañuchinankutapas, Diosman kawsay ofrendakuna qonankutapas harkakurunqa. Templopa altarninpipas millakuypaq kaqkunatam ruwanqa, chaykunapa qepantam chay millakuypaq runata Diospuni puchukarachinqa.