Read CHUYA QELLQA La Biblia en Quechua de Ayacucho 2012 Oseas 10 Bible Online

Oseas 10 - CHUYA QELLQA La Biblia en Quechua de Ayacucho 2012 bible

Oseas 10

¹Israelqa sumaqllaña ruruq uvas hinam, ichaqa achkanpi rurusqanman hinam idolokunata aswanraq mirachispan sumaq altarkunata ruwakurqa.

²Israelpa mirayninkunaqa iskay uya runakunam, chay huchankumantam ñakarinqaku, Tayta Diosmi idolonkutapas ñutunqa, suma-sumaq altarninkunatapas tuñichinqam.

³Hinaptinmi chayraq ninqaku: Tayta Diosta mana kasukusqanchikraykum mana reyniyuq rikurirunchik, reyniyuqraq kaptinchikpas ¿imatataq rey ñoqanchikpaq ruwanman? nispanku.

⁴Paykunaqa yanqa rimaq runakunam kanku, pactota ruwaspapas yanqallam juranku, allinpaq hapispa ruwayninkupas chakrakunapi wiñaq qatqe qorakuna hinam.

⁵Bet-avenpi yupaychasqanku qori torillo idolota chinkarachisqankumantam Samaria law runakuna chaynallataq sacerdotenkunapas waqachkanku.

⁶Asiriapa tropankunam hamuruspanku chay qori torillota apakunqaku reyninkuman regalota qonankupaq, chaymi Israelpa mirayninkuna chay idolota yupaychasqankumanta penqaypi kanqaku.

⁷Samaria llaqtapa reyninmi chinkanqa, yakupa apasqan punpu kullu hinam chinkanqa.

⁸Yupaychananku sitiokunapas tuñichisqam kanqa, chaypim Israel castakuna idolota yupaychaspa huchallikurqaku; altarkunapa hawanpipas qorakunawan kichkakunam wiñanqa. Chaymi Israel miraykuna orqokunata ninqaku: ¡Pampaykuwayku! nispanku, moqokunatapas, ¡hawaykumanyá wichiykamuy! nispanku.

⁹Tayta Diosmi kaynata nin: Israelpa mirayninkuna, qamkunaqa mana allin runakunam kankichik; Gabaapi huchallikusqaykichikmantam kunankama huchallikuyta mana saqenkichikchu, chayraykum maymi huchallikusqaykichikpi chinkachisqa kankichik.

¹⁰Munarisqay punchawmi qamkunataqa castigasqaykichik, nacionkunam contraykichikpi huñunakunqa, llumpay huchaykichikmanta ñakarichisunaykichikpaq.

¹¹Efrainqa trillayta yachachisqa vaquilla hinam, sumaqllaña matankanman yugota wataruptiymi Judá yapunqa, Jacobñataqmi kurpakunata ñutunqa.

¹²Qamkunaqa allin kawsakuytayá tarpuychik, kuyakuypa rurunta cosechaychik, mana yapusqa chakrakunatayá yapuychik. Tayta Diosta maskanaykichik punchawmi chayaramunqa, hinaptinqa Tayta Diospas para hinaraqmi hamunqa, qamkunaman kutirimuspan salvaykusunkichik.

¹³Qamkunam ichaqa mana allinllata tarpuchkankichik, mana allinllata cosechaspam llullakuynikichikpa rurunta mikuchkankichik. Qamkunaqa tropaykichikpa kallpanpim hapipakunkichik.

¹⁴Chayraykum llaqtaykikunapi guerra hatarinqa, murallasqa llaqtaykikunapas tuñichisqam kanqa, wawakunapas mamankuwan kuskam wañunqaku, imaynam Bet-arbel llaqtata rey Salmán chinkachisqanta hina.

¹⁵Bet-el llaqtapi yachaqkuna, llumpay huchaykichikmantam qamkunapas puchukachisqa kankichik. Achikyaykamuptillanmi Israelpa reyninpas wañuchisqa kanqa, nispa.