Read CHUYA QELLQA La Biblia en Quechua de Ayacucho 2012 Oseas 2 Bible Online

Oseas 2 - CHUYA QELLQA La Biblia en Quechua de Ayacucho 2012 bible

Oseas 2

¹Jezreelpa punchawninqa hatunmi kanqa. Wawqekichikta “Diospa llaqtan”, niychik, panikichiktañataq “llakipayana”, niychik.

²Tayta Diosmi nin: Mamaykichikta uyanpi niychik, payqa manam warmiyñachu, nitaqmi ñoqapas qosanñachu kani; chuchumika kayninta saqechun, qarikunawan qanrakuyninta qonqachun.

³Yanqañataq tukuy imanta qechuruspay nacesqan punchawpi hina qalallata saqeruyman, mana imayuq chunniqta ruwaruyman, chaki allpaman tikraruyman, yakumanta wañurachiyman.

⁴Chuchumika kaspan wachakusqanraykum wawankunamantapas mana llakikusaqñachu.

⁵Mamankum chuchumikayarun, wachakuqninkum penqaypi rikurirun, paymi nirqa: “Kuyaqniykunawan pasakusaq, paykunaqa mikunaytawan yakuytam qowanku, millwaytawan pachaytam qowanku, aceiteytawan tomanaytam qowanku”, nispa.

⁶Chayraykum purinantapas kichkakunawan qencharusaq, purinanpa muyuriqninta perqaruptiymi ñan purinantapas mana tarinqachu.

⁷Kuyaqninkunata qatispanpas manam haypanqachu, maskaspanpas manam tarinqachu. Hinaspam ninqa: “Kayna kanaytaqa punta qosayman kutikusaq, paywanqa allinmi karqani”, nispan.

⁸Payqa manam reqsikurqachu trigota, vinota hinaspa aceiteta qosqaytapas; qorita qollqeta mirachipusqaytapas manam reqsikurqachu, chaywanraqmi Baal idolotapas ruwakururqa.

⁹Chayraykum tiemponpi rispay trigoytapas vinoytapas kutichikamusaq; qalalla cuerponta pakaykunanpaq linotawan millwa qosqaytam qechumusaq.

¹⁰Kuyaqninkunapa qayllanpim millay warmi kasqanta qawachisaq, makiymantaqa manam pipas libranqachu.

¹¹Kusikuynintapas chinkachisaqmi; fiestankunatapas, musoq killankunatapas, samana punchawninkunatapas hinaspa hatun huñunakuyninkunatapas qolluchisaqmi.

¹²Uvas plantankunatawan higos sachankunatapas wituchisaqmi. Chaykunamantam pay nirqa: “Kaykunaqa kuyaqniykunapa pagawasqanmi”, nispa. Chaykunata qorayarachiptiymi purun animalkunaña mikunqaku.

¹³Ñoqata qonqaruwaspam anillokunawan collarkunawan churakuykuspa kuyaqninkunata qatikurqa, hinaspam Baal idoloman inciensota kañapurqa, chaykunamantam payta ñakarichisaq. Tayta Diosmi chaynata nin.

¹⁴Chayraykum kuyakuyllawan rimapayasaq, chunniqman pusaruspaymi sonqonta sumaqllata suwaykusaq.

¹⁵Chaypim uvas chakrankunatapas kutichipusaq, hinaspaymi [3]Acor qechwatapas kusikuy punkumanña tikrarusaq. Chaypim sipas kayninpi hinaraq kuyaykuwanqa, Egiptomanta lloqsimusqan punchawpi hinaraqmi kuyaykuwanqa.

¹⁶Chay punchawkunapiqa manañam “dueñolláy” niwanqañachu, aswanqa “qosalláy” nispañam niwanqa.

¹⁷[4]Baal idolokunapa sutinta siminmanta qechuruptiymi manaña rimayllapas rimanqakuñachu.

¹⁸Chay punchawkunapim paykunarayku purun animalkunawan pactota ruwasaq, pawaq urpikunawan hinaspa maqta urukunawanpas. Chinkachisaqmi flechatapas, espadatapas chaynataq guerratapas, hinaspaymi hawkallataña kawsachikusqayki.

¹⁹Israel llaqta, wiñaypaqñam casarasqayki, leyman hinam casarasqayki; qamllapaqña kaspaymi, llakipayaspay, kuyapayaspay casarasqayki.

²⁰Manaña rakinakunapaq casaraptiymi Dios kasqayta riqsiwanki.

²¹Tayta Diosmi nin: Chay punchawkunapim hanaq pachamanta kay pachaman parachimusaq.

²²Kay pacham trigota, uvasta hinaspa aceitunasta rurunqa, chaykunam Jezreelman qosqa kanqa.

²³Kikiypaqmi llaqtayta kay pachapi hatarichisaq; mana llakipayanatapas llakipayaykusaqmi, “manam llaqtayñachu kanki” nisqaytapas, “llaqtaymi kanki” niptiymi paypas “Diosnilláy” niwanqa, nispa.