Read CHUYA QELLQA La Biblia en Quechua de Ayacucho 2012 Oseas 7 Bible Online

Oseas 7 - CHUYA QELLQA La Biblia en Quechua de Ayacucho 2012 bible

Oseas 7

¹Israelta hampichkaptiymi Efrainpa chaynataq Samariapa mana allin ruwasqankuna rikuriramun. Paykunaqa llapallankum llullakuspa suwakunku, punchawpacham wasikunaman suwakuq yaykunku, callepi purikuqkunatam imantapas suwanku.

²Manam musyankuchu llapa mana allin ruwasqankuta yuyasqaytaqa, mana allin ruwasqankuwanmi paykunaqa inturachikunku, ñoqaqa rikuchkanim tukuy chaykuna ruwasqankutapas.

³Mana allinta ruwaspankum reyninkuta kusichinku, llullakunata rimaspankum kamachiqninkuta kusichinku.

⁴Llapallankum paykunaqa waqllikunku, masa poqonankama tanta ruwaqpa horno kañasqanmanraqmi rikchakunkupas.

⁵Reypa fiestan punchawpim llapa kamachikuqkuna reyta llumpayta upyarachispa onqorachirqaku, burlakuqnin runakunamanraqmi reyqa makintapas haywarirqa.

⁶Paykunaqa hawa sonqollam reymanpas asuykunku, sonqonkupas rupachkaq horno hinaraqmi; tutanpas mana samaykuspam paykunaqa paqarinnintin imaynam rey tuñirachiyta tanteanku.

⁷Paykunaqa rupachkaq horno hinam kamachiqninkunatapas mikurunku; llapallan reyninkum wichirunku, ichaqa manam mayqanninpas yanapakuyniyta mañakuwankuchu.

⁸Efrainmi huklaw nacionkunawan taqrukurun, huklawllan chayasqa tortilla hinam rikurirun.

⁹Huklaw nación runakunam paykunapa kallpanta tukurun, ichaqa manam musyakunkuchu; umankupas soqoyarunñam ichaqa manam musyakunkuchu.

¹⁰Israelpa hatun tukuyninmi kikinpa contranpi rikurirun, ichaqa manam Tayta Diosman kutirikunkuchu nitaqmi maskankuchu.

¹¹Efrainqa mana yuyayniyuq uma muyu paloma hinam rikurirun, paykunaqa Egiptopa yanapakuynintam maskanku, qaparkachaspam Asiriapa yanapakuyninta maskanku.

¹²Ichaqa chay nacionkunaman riptinkum hawankuman mallayta wischuykusaq, alton pawaq urpikunata hinam wichiykachimusaq, paykunataqa mana allin ruwasqankuman hinam ñakarichisaq.

¹³¡Ay, imaynaraq kanqaku ñoqamanta karunchakuq runakuna! Contraypi hatarisqankuraykum puchukanqaku, libraykuyta munaptiypas paykunaqa contraypim llullallata rimanku.

¹⁴Paykunaqa manam sonqomantachu mañakuwanku, aswanmi puñunankupi sirikuykuspa qaparkachanku. Trigotawan vinota chaskinankuraykum cuerponkuta kuchukunku, hinaspam contraypi hatarinku.

¹⁵Ñoqam paykunataqa kallpanchaspay yachachirqani, ichaqa paykunam contraypi tukuy mana allinkunata tantearqaku.

¹⁶Paykunaqa manam Tayta Diosmanchu kutirikurqaku, aswanqa idolonkumanmi; paykunaqa mana imapaq serviq flecha hinam kachkanku, kamachiqninkunapas hatun tukuspa rimasqankuraykum guerrapi wañunqaku, Egipto nacionpim paykunamantaqa asikunqaku.