Read CHUYA QELLQA La Biblia en Quechua de Ayacucho 2012 Joel 1 Bible Online

Joel 1 - CHUYA QELLQA La Biblia en Quechua de Ayacucho 2012 bible

Joel 1

¹Kaykunam Israelman willananpaq Petuelpa churin Joelman Tayta Diospa rimapayasqan simikuna:

²¡Kamachikuqkuna kayta uyariychik! ¡Israel runakuna kayta uyariychik! ¿Yaqachum tiempoykichikpi kaykuna pasakurqa otaq ñawpaq taytaykichikkunapa tiemponpipas?

³Churikichikkunaman kayta willaychik, churikichikkunapas churinkunaman willachunku, paykunapas hamuq mirayninkunaman willachunku.

⁴Aqaruwaypa puchusqantam pinki-pinki mikururqa, pinki-pinkipa puchusqantam utuskuru mikururqa, utuskurupa puchuntañataqmi aqaruway tukururqa.

⁵Llapa sinkakuna rikcharispa waqaychik, vino upyayman qokuruqkuna allwaychik, vinom simikichikmanta qechusqa.

⁶Manaña yupay atina tropakuna hinam aqaruwaykuna nacionniyman yaykuramun, kirunkupas leonpa hinaraqmi, waqsankupas china leonpa hinaraqmi.

⁷Uvas plantaykunatapas pasaypaqtam purmarachinku, higos sachaykunatapas pasaypaqtam pakiparunku, kallmankunatapas yuraqyanankamam qalaturunku.

⁸Runakunam mana upallaykuspa waqachkanku, sipas kayllanpiraq qosan wañukuptin lutokuruq viuda hinam qaparkachachkanku.

⁹Tayta Diospa templonpim kawsaymanta vinomanta ofrenda qoy tukurun, chayraykum Diospa sacerdotenkuna waqachkanku.

¹⁰Trigo manaña kasqanraykum, uvas chakirusqanraykum, olivos qawirusqanraykum, chakrakunapas purmachkanña, allpakunapas lutoyuq hinañam kachkan.

¹¹Chakra llamkaqkuna, uvas plantaqkuna, llakikuymanta waqaychik; trigomantawan cebadamanta waqaychik, chakrakunapim cosecha pierderun.

¹²Uvaswan higospas chakirunmi, granadawan palmerapas qawirunmi, manzanawan wakin sachakunapas chakirunmi, llapa runapa kusikuyninpas chinkarunmi.

¹³Sacerdotekuna lutokuspa waqaychik, altarpi servikuqkuna qaparkachaychik; Diosniypa serviqninkuna, hamuspa luto pachantin puñuychik; Diosnikichikpa templonpim kawsaykunata hinaspa vinota ofrecey tukurun.

¹⁴Ayunopaq runakunata huñumuychik, Diospa templonman kay nacionpi kamachikuqkunatawan runakunata huñumuychik, hinaspa Tayta Diosta qayakuychik.

¹⁵Tayta Diospa punchawninmi hichpamuchkanña, ¡imaynaraq chay punchaw kanqa! Tukuy Atiyniyuqmantam puchukay hamuchkan.

¹⁶Qayllanchikmantam mikusqanchiktapas qechuruwanchik, Diosninchikpa templonpi kusikuyninchiktapas pasaypaqtam qechuruwanchik.

¹⁷Muhukunapas kurpa ukupim ismurun, kawsay waqaychana wasikunapas lliwmi tuñirun, trigo chinkarusqanraykum taqekunapas llikipakurun.

¹⁸Mikuymantam uywakunapas waqachkanku, vacakunapas mikunankupaq mana kaptinmi muspaypi hinaña purillachkanku, ovejakunapas yarqaymantam ñakarillachkanku.

¹⁹Dios Taytalláy, qamtam qayakamullayki, chunniqpi pastokunatam nina ruparun, purunpi sachakunatam lenwachkaq nina ruparun.

²⁰Kallpaq yakukuna chakirusqanraykum, mikunanku pastokunata nina ruparusqanraykum, purun animalkunapas qaparkachaspa qayakamusunki.