Read CHUYA QELLQA La Biblia en Quechua de Ayacucho 2012 Amós 4 Bible Online

Amós 4 - CHUYA QELLQA La Biblia en Quechua de Ayacucho 2012 bible

Amós 4

¹Tayta Diosmi chaynata nin. Basán lawpi wira vacakuna kaqlla Samaria llaqtapi warmikuna, qamkunam wakchakunata usuchinkichik, mana imayuqkunatam sarutyankichik. Qosaykichiktam kamachinkichik vinota apamuy tomananchikpaq, nispaykichik. Qamkunayá kayta uyariychik.

²Tayta Diosmi chuya kayninrayku kaynata jurarqa: Hamuchkanmi tiempo senqaykichikmanta ganchowan watuchaspa aysasqa kanaykichikpaq, miraynikichikpas anzuelowan challwa hapisqa hina apasqa kanankupaq.

³Perqa uchkunkunatam chulla-chullamanta lluptinkichik, yachanaykichik wasimantam Hermón orqoman wischusqa kankichik. Tayta Diosmi chaynata nin.

⁴Qamkunaqa huchallikuytam anchata gustankichik, chaynaqa Bet-elmanwan Gilgalman rispayá, idoloykichikta yupaychamuychik, manañam imapas qokuwanchu imayna kaynikichikpas.

⁵Sapa tutapaytayá levadurayuq tantata kañapuychik, sapa kimsa punchawyá diezmoykichiktapas chayman astaychik, ofrendata apamunankupaqyá tukuy hinastinpi qayaykachakamuychik, aswan mastaraqyá huchallikuychik. Israelpa mirayninkuna, hucha ruwaytam qamkunaqa kuyankichik. Tayta Diosmi chaynata nin.

⁶Ñoqam yarqayta pasachirqaykichik, llaqtaykichikkunapipas manam mikuy karqachu, chaywanpas qamkunaqa manam ñoqaman kutirikamurqankichikchu. Tayta Diosmi chaynata nin.

⁷Cosechapaq kimsa killaraq faltachkaptinmi paratapas mana parachimurqanichu. Huk llaqtapim parachirqani huk llaqtapiñataqmi mana, partentam para chayarqa, parapa mana chayasqanñataqmi chakirurqa.

⁸Iskay-kimsa llaqtam huk llaqtaman yaku tomaq rirqaku ichaqa manam saksarqakuchu. Chaywanpas manam ñoqaman kutirikamurqankichikchu. Tayta Diosmi chaynata nin.

⁹Wayrawan utuskuruwanmi uvasnikichiktawan huertaykichiktapas tukurqa, higos plantaykichiktawan olivos sachaykichiktapas aqaruwaymi tukurqa, ichaqa manam ñoqaman kutirikamurqankichikchu. Tayta Diosmi chaynata nin.

¹⁰Egipto nacionta castigasqayta hinam qamkunatapas castigarqaykichik, jovennikichikkunatapas espadawanmi wañuchirqani, caballoykichikkunatapas enemigoykikunam apakurqaku, wañuqkunapa asnaynintam muskirqankichik, chaywanpas manam ñoqaman kutirikamurqankichikchu. Tayta Diosmi chaynata nin.

¹¹Sodoma Gomorra llaqtakunata hinam chinkarachirqaykichik, ninamanta hurqosqa sansa hinam karqankichik, ichaqa manam ñoqaman kutirikamurqankichikchu. Tayta Diosmi chaynata nin.

¹²Chaynatam Israel qamkunawanpas ruwasaq, qamkunawan chaynata ruwanay kachkaptinqa, Diosnikichikwan tupanaykichikpaq allichakuychik.

¹³Kayqaya: Orqokunata unanchaqqa, wayrakunata hatarichiqqa, imam munasqanta runakunaman reqsichiqqa, tutayayta achkiyman tikraqqa, kay pachapa hawankunapi puriqqa. Payqa Tukuy Atiyniyuq Tayta Diosmi.