Read CHUYA QELLQA La Biblia en Quechua de Ayacucho 2012 Abdías 1 Bible Online

Abdías 1 - CHUYA QELLQA La Biblia en Quechua de Ayacucho 2012 bible

Abdías 1

¹Tayta Diosmi Edom nacionwan imatam ruwananmanta profeta Abdiasman visionpi kaynata nirqa: Diosmanta hamuq willakuytam uyariruniku, huk willakuqmi nacionkunaman kaynata willakunanpaq kachasqa: ¡Kay nacionpa contranpi llapallanchik guerrapi hatarisun! nispa.

²Tayta Diosmi Edom nacionta kaynata nin: Llapallan nacionkunamanta taksallatañam ruwasqayki, hinaspaymi hatun penqayman churasqayki.

³Hatun tukuq kaynikim pantarachisunki, qaqakunapa raqrankunapi yachasqaykiraykum sonqoykipipas kaynataraq ninki: “¿Pitaq kaymanta wichichiwanman?” nispayki.

⁴Ichaqa anka hinaña altoman hoqarikuruptikipas, chaskakunapa chawpinpiña qesachakuruptikipas, chaymantam wichichimusqayki, Tayta Diosmi chaynata nin.

⁵Suwakunaña tutan hamususpaykipas, ¿manachum paykunaqa munasqan kaqllata apanmanku? Uvas pallaqkunaña yaykumususpaykipas, ¿manachum asllatapas maskapakunapaq puchuykunmanku? Qamtam ichaqa enemigoykikuna pasaypaqta tuñirachisunki.

⁶Pasaypaqtam [1]Esaupa kapuqninkunata suwarunku, pakasqan kapuqninkunatapas maskachakurunkum.

⁷Hapipakusqayki kaqkunallam engañarusunki, paykunallam allpaykimantapas qarqorusunki, reqsinakusqaykikunallam contraykipi hatarirunku, mikuqmasikikunallam wichinaykipaq toqllatapas churarunku. Mana yachayniyuqmi Edomqa rikurirun.

⁸Tayta Diosmi kaynata nin: Chay punchawpim Edompi yachayniyuq runakunata chinkachisaq, Esaupa yachanan orqomantam yachayniyuq runakunata chinkachisaq.

⁹Temán llaqtapi allinnin qari-qari soldadokunapas manchakuymantam katkatatanqaku, Esaupa orqonkunapi yachaqkunapas pasaypaq tukusqam kanqaku.

¹⁰Wawqeki Jacobpa mirayninkunata ñakarichisqaykimantam penqaypi kanki, hinaspam pasaypaqta chinkanki.

¹¹Jerusalenman enemigonkuna yaykuspa tropankunata presochaspa apaptinpas qamqa qawayllam qawakurqanki; punkunta huklaw nacionkuna yaykuspan Jerusalenta partenakunankupaq sorteaptinkupas paykunamanraqmi sayapakurqanki.

¹²Amamiki wawqekipa ñakarisqan punchawpi asipayawaqchu karqa, amataqmi Judapa mirayninkuna tuñisqan punchawpi kusikuwaqchu karqa, nitaqmi paykunapa sasachakuynin punchawpi burlakuwaqchu karqa.

¹³Amamiki llaqtaypa ñakarisqan punchawqa punkunta yaykuwaqchu karqa, amataqmi ñakariypi tarikusqan punchawqa kusikuwaqchu karqa; amataqmi tuñichisqa kasqan punchawqa kapuqninkunatapas suwakuwaqchu karqa.

¹⁴Amamiki pallqaq ñankunapi ayqekuqkunata wañuchinaykipaq suyawaqchu karqa, sasachakuy punchawpi wañuymanta lluptiqkunatapas amamiki enemigonkupa makinman qoykuwaqchu karqa.

¹⁵Nacionkunata Tayta Diospa juzganan punchawmi hichpaykamuchkanña. Edom, imaynam ruwasqaykiman hinam qampas ruwasqa kanki, imaynam ruwasqaykiman hinam pagasqa kanki.

¹⁶Imaynam sapaqchakusqay orqopi llaqtay ñakarirqa, chaynam llapa nacionkunapas mana samaykuspa ñakarinqaku, ñakariyninkuta millpuypaq-millpuspam pasaypaqta chinkarunqaku.

¹⁷Sión moqopim ichaqa asllapas salvakunqaraq Sionqa ñoqapaq sapaqchasqam kanqa. Jacobpa mirayninkunapas yapamantam kapuqninkunata kutichikunqaku.

¹⁸Jacobpa mirayninkunam nina hina kanqaku, Joseypa mirayninkunam lenwachkaq nina hina kanqaku, hinaspam Esaupa mirayninkunata qopata hina ruparunqaku, Esaupa mirayninkunaqa lliwmi wañunqaku. Tayta Diosmi chaynata nin.

¹⁹Neguev lawpi yachaqkunam Esaupa orqonkunapi munaychakunqaku, Sefela lawpi yachaqkunañataqmi Filistea nacionpi munaychakunqaku, munaychakunqakutaqmi Efrainpa hinaspa Samariapa chakrankunapipas. Benjaminpa mirayninkunapas Galaadpim munaychakunqaku.

²⁰Israelpa mirayninkunamanta preso apasqa kaqkunapas, Canaanpa allpankunamanta Sarepta llaqtakamam munaychakunqaku, Jerusalenmanta Sefaradman preso apasqa kaqkunapas, Neguev law llaqtakunapim munaychakunqaku.

²¹Llapallankum kusisqallaña Sión moqoman qespinqaku hinaspam Esaupa orqonkunapi munaychakunqaku, Tayta Diosñataqmi paykunapi munaychakunqa.