Read CHUYA QELLQA La Biblia en Quechua de Ayacucho 2012 Números 1 Bible Online

Números 1 - CHUYA QELLQA La Biblia en Quechua de Ayacucho 2012 bible

Números 1

¹Israelpa mirayninkuna Egipto nacionmanta lloqsiramuspa yaqa iskay watamanña richkaptinkum, chay watapa iskay kaq killanpa qallariynin punchawpi, Sinaí chunniqpi, Diosman asuykuna carpapi Moisesta Tayta Dios kaynata nirqa:

²Israelpa llapallan mirayninkunatam yupankichik ayllunkunaman hinaspa ñawpaq taytankupa castanman hina, llapallantam haykam qarikuna kasqanman hina yupankichik.

³Qanwan Aaronmi yupankichik iskay chunka watayuqmanta hanayman guerrapaq hina qarikunata.

⁴Sapa ayllumantam huk kamachikuq yupaysisunkichik.

⁵Chay kamachikuqkunapa sutinmi kaykuna: Rubén ayllumanta Sedeurpa churin Elisur.

⁶Simeón ayllumanta Zurisadaipa churin Selumiel.

⁷Judá ayllumanta Aminadabpa churin Naasón.

⁸Isacar ayllumanta Zuarpa churin Natanael.

⁹Zabulón ayllumanta Helonpa churin Eliab.

¹⁰Joseypa churinkunamantam karqa: Efraín ayllumanta Amiudpa churin Elisama; Manasés ayllumantañataq Pedasurpa churin Gamaliel.

¹¹Benjamín ayllumanta Gedeonipa churin Abidán.

¹²Dan ayllumanta Amisadaipa churin Ahiezer.

¹³Aser ayllumanta Ocranpa churin Pagiel.

¹⁴Gad ayllumanta Deuelpa churin Eliasaf.

¹⁵Neftalí ayllumanta Enanpa churin Ahira.

¹⁶Paykunatam Israelpa miraynin ukumanta akllarqaku, paykunam sapa ayllumanta akllasqa karqaku.

¹⁷Chay sutin-sutin Diospa akllasqan qarikunatam Moiseswan Aarón qayachispanku

¹⁸Israelpa llapallan mirayninkunata huñururqaku, iskay kaq killapa qallariynin punchawpi. Chaymi llapallan runakuna ayllunkuman hina listachikurqaku. Llapa qarikunam iskay chunka watayuqmanta hanayman sutin-sutin listasqa karqaku.

¹⁹Tayta Diospa kamachisqanman hinam, Sinaí chunniqpi Moisés yuparqa.

²⁰Mirayninkuman hinaspa ayllunkuman hina, guerrapaq hina qarikuna sapakama iskay chunka watayuqmanta hanayman sutin-sutin listasqa kaptinkum, kayna karqaku: Rubén ayllumanta, tawa chunka soqtayuq waranqa pichqa pachaknin qarikuna.

²²Simeón ayllumanta, pichqa chunka isqonniyuq waranqa kimsa pachaknin qarikuna.

²⁴Gad ayllumanta, tawa chunka pichqayuq waranqa soqta pachak pichqa chunka qarikuna.

²⁶Judá ayllumanta, qanchis chunka tawayuq waranqa soqta pachaknin qarikuna.

²⁸Isacar ayllumanta, pichqa chunka tawayuq waranqa tawa pachak qarikuna.

³⁰Zabulón ayllumanta, pichqa chunka qanchisniyuq waranqa tawa pachaknin qarikuna.

³²Joseypa churinkunamantam: Efraín ayllumanta, tawa chunka waranqa pichqa pachaknin qarikuna. Manasés ayllumantañataq kimsa chunka iskayniyuq waranqa iskay pachaknin qarikuna.

³⁶Benjamín ayllumanta, kimsa chunka pichqayuq waranqa tawa pachaknin qarikuna.

³⁸Dan ayllumanta, soqta chunka iskayniyuq waranqa qanchis pachaknin qarikuna.

⁴⁰Aser ayllumanta, tawa chunka hukniyuq waranqa pichqa pachaknin qarikuna.

⁴²Neftalí ayllumanta, pichqa chunka kimsayuq waranqa tawa pachaknin qarikuna.

⁴⁴Kaynatam Moiseswan Aarón chaynataq Israelpi chunka iskayniyuq ayllukunapa kamachiqninkuna yuparqaku.

⁴⁵Llapallan Israelpa mirayninkunata, guerrapaq hina kaqkunata, iskay chunka watayuqmanta hanayman yuparuptinkum,

⁴⁶soqta pachak kimsayuq waranqa pichqa pachak pichqa chunka qarikuna karqaku.

⁴⁷Leví ayllukunaqa manam wakin ayllukunawan kuska yupasqachu karqaku.

⁴⁸Moisestam Tayta Dios nirqa:

⁴⁹Israel ayllukunata yupaspaykiqa amam Leví ayllutaqa yupankichu.

⁵⁰Paykunatam churanki ñoqaman asuykamuwananku carpata, servicionkunata chaynataq tukuy imankunatapas nanachikunankupaq. Paykunam yachanay carpata hinaspa llapallan servicionkunata apanqaku, carpapa muyuriqninpitaqmi samanqakupas.

⁵¹Carpata apanaykichik kaptinqa, Leví ayllukunam paskanqaku hinaspa sayachinqakupas. Pipas mana Leví ayllumanta kachkaspan carpaman asuykuqqa wañuchisqam kanqa.

⁵²Israelpa wakin mirayninkunaqa sapa-kamam carpankupi samanqaku. Payku-naqa tropakuna hinam maymi banderankupa sayasqanpi samanqaku.

⁵³Leví ayllum ichaqa santuariopa muyuriqninpi samanqa, chaynapim Israel ayllukunapa contranpi ñoqa Tayta Dios mana piñakusaqchu. Chaynaqa, Leví ayllukunam ñoqaman asuykamuwananku carpata nanachikunankupaq, nispa.

⁵⁴Chaynatam Israelpa mirayninkuna, Moisesman Tayta Diospa kamachisqanman hina ruwarqaku.