Read CHUYA QELLQA La Biblia en Quechua de Ayacucho 2012 Números 18 Bible Online

Números 18 - CHUYA QELLQA La Biblia en Quechua de Ayacucho 2012 bible

Números 18

¹Aarontam Tayta Dios nirqa: Qanmi churikikunapiwan chaynataq Leví ayllukunapiwan huchayuqkankichik santuariopa contranpi hucha-llikuy kaptinqa. Sacerdote kaynikichik-pi mana allinkunata ruwaspaykichikmi ichaqa qanwan churikikunalla huchayuq kankichik.

²Ñoqaman asuykamuwanaykichik carpapi qanwan churikikuna serviwaspaykichikqa Leví aylluykichikkunawanmi yanapachikunkichik.

³Paykunaqa kamachisqaykita ruwaspankum carpapi serviwanqaku, santuariopi serviciokunamanwan altarmanmi ichaqa ama asuykunqakuchu, chaynapi qamkunawan kuska ama wañurunankupaq.

⁴Paykunam yanapasunki ñoqaman asuykuwanaykichik carpapi tukuy ima ruwanaykikunapi. Leví ayllumanta mana kaspaqa amam asuykamusunkichikchu.

⁵Qamkunallam santuariotawan altartaqa nanachikunkichik, chaynapim Israelpa mirayninkunapa contranpi manaña piñakusaqñachu.

⁶Ñoqam Israelpa mirayninkunamanta Leví aylluta rakirqani qamkunaman qonaypaq, chaynapi ñoqaman asuykuwanaykichik carpapi servikunankupaq.

⁷Altarpi ruwanakunatawan “Chuyay-chuyay” lugarpi ruwanakunatam ichaqa qanwan churikikunalla ruwankichik. Sacerdote kaynikichikqa qamkunallapaqmi, chay llamkaytam qamkunaman qoykichik. Pipas mana sacerdote kachkaspa ruwanaykichikta ruwaqqa wañuchisqam kanqa, nispa.

⁸Aarontam Tayta Dios nirqa: Qowasqanku ofrendakunata nanachikunaykipaqmi churarqayki. Israelpa mirayninkunapa qowasqanku sapaqchasqa ofrendakunatam qanman chaynataq churikikunaman qoykichik. Chay ofrendakunam qamkunapaq kanqa, chayqa wiñaypaq kamachikuymi.

⁹Ñoqapaq kañananku ofrendakunamantam qampaq kanqa: Kawsaykunamanta ofrendakuna, Israel miraykunapa huchamanta otaq culpamanta animal wañuchisqanku ofrendakuna; chaynaqa ñoqaman ofrecewasqanku ofrendakunam qampaq chaynataq churikikunapaq sapaqchasqa kanqa.

¹⁰Chay sapaqchasqa ofrendakunataqa qarikunallam santuariopi mikunkichik. Chaykunataqa chuyapaqmi hapinkichik.

¹¹Israel miraykunapa kuyuchispa ofrecewasqanku ofrendakunapas qampaq chaynataq qanwan yachaq qari churikikunapaqwan warmi churikikunapaqmi kanqa. Chayqa wiñaypaq kamachikuymi. Chaytaqa aylluykimanta haykam chuya kaqkunallam mikunqaku.

¹²Qoykitaqmi ñoqa Tayta Diosman ofrecewanankupaq Israel miraykunapa puntallaraq hurqosqanku aceitetapas, vinotapas hinaspa trigomanta ofrendatapas.

¹³Cosechapa punta rurunmanta ñoqa Tayta Diosman apamuwasqankupas qampaqmi kanqa. Chaykunataqa mikunqaku aylluykimanta chuya kaqkunallam.

¹⁴Israel miraykunapa sapaqchapuwasqan ofrendakunapas qampaqmi kanqa.

¹⁵Israel runakunapa piwi churinkuwan, animalninkupa punta wawankupas ñoqa Tayta Diosman ofrecesqa kasqanraykum qampaq kanqa. Chaywanpas runakunapa piwi churinkunataqa chaynataq mana mikuna animalpa punta wawankunataqa pagaspam kutichikunqaku.

¹⁶Chaynataqa ruwanqaku nacesqanmanta huk killayuq kachkaptinmi. Santuariopi pesoman hinam iskay onza qollqewan kutichikunqaku. Santuariopi pesoqa karqa yaqa media onzam.

¹⁷Vacapa, ovejapa hinaspa cabrapa punta wawankunataqa ñoqapaq sapaqchasqa kasqankuraykum ama kutichikunqakuchu. Chay animalkunatam wañuchispayki yawarninta altarman chaqchunki, wirankunatañataqmi kañanki ñoqa Tayta Diospaq miskillaña asnariq ofrenda kananpaq.

¹⁸Aychankunaqa qampaqmi kanqa, wakin ofrendakunamanta kuyuchispa ofrecewanaykichik animalpa qasqonpas chaynataq ofrecewanaykichik animalpa alleq piernanpas.

¹⁹Israelpa mirayninkuna ñoqa Tayta Diospaq sapaqchapuwasqan ofrendakunatam qanman qoyki chaynataq qanwan yachaq qari-warmi churikikunamanpas. Chayqa wiñaypaq kamachikuymi kanqa. Chaymi wiñaypaq pactoy kanqa, qampaqpas chaynataq miraynikikunapaqpas, nispa.

²⁰Aarontam Tayta Dios nirqa: Israelpa mirayninkunapa allpanpiqa manam herenciaykipas nitaq ima kapuqnikipas kanqachu, ñoqam herenciaykipas chaynataq kapuqnikipas kasaq.

²¹Leví ayllukunaman herencia qosqayqa kanqa Israel runakunapa cosechasqankumanta llapallan diezmo qosqankum. Chaytam asuykuwanaykichik carpapi serviwasqaykichikrayku qoykichik.

²²Israelpa mirayninkunamanta wakin runakunaqa amam carpamanqa asuykunqakuchu. Yaykuspankuqa huchallikuruspam wañurunmanku.

²³Asuykuwanaykichik carpapiqa Leví ayllukunallam servikunqaku. Imapipas pantaruspankuqa kikinkum huchayuq kanqaku. Chayqa wiñaypaq kamachikuymi. Israel miraykunapa allpanpiqa manam kanqachu Leví ayllukunapa herencianqa.

²⁴Paykunapa herencianqa kanqa Israelpa mirayninkunapa cosechasqankumanta diezmokuna qowasqankum. Chayraykum nirqani: “Israelpa mirayninkunapa allpanpiqa manam herencianku kanqachu”, nispa.

²⁵Leví ayllukunaman ninanpaqmi Moisesta Tayta Dios kaynata nirqa: Israelpa mirayninkuna cosechasqankumanta diezmo qowasqankutam herenciaykichik kananpaq qamkunaman qoykichik. Chay diezmokunamantam qamkunapas diezmoykichikta rakispa ñoqa Tayta Diosman ofrecewankichik.

²⁷Chay diezmokunataqa rakipuwankichik imaynam Israelpa mirayninkuna kawsaykunamanta rakipuwasqankuman hinam, trigo kaptin vino kaptinpas.

²⁸Chaynaqa, Leví ayllukuna, qamkunam ñoqa Tayta Diosman Israelpa mirayninkunapa qosusqaykichik llapallan diezmokunamanta ofrecewankichik. Ñoqa Tayta Diospaq ofrendakunataqa sacerdote Aaronmanmi qonkichik.

²⁹Tukuy ima chaskisqaykichikmantam ñoqa Tayta Diosman ofrecewanaykichikpaq kaqta rakinkichik. Ñoqapaq sapaqchasqa ofrendaqa allinnin kaqkunam kanqa.

³⁰Chaynaqa, Leví ayllukuna, chay allinnin ofrendakunamanta ñoqapaq sapaqcharuptikichik puchuqninmi trigo kaspa otaq vino kaspapas qamkunapaq kanqa.

³¹Chaytam maypiña kaspaykichikpas aylluykichikkunapiwan mikunkichik. Chaymi asuykuwanaykichik carpapi serviwasqaykichikmanta pagoykichik kanqa.

³²Chay allinnin kaqkunata ñoqaman ofreceruwaspayki-chikqa, puchuqninta mikuspapas manañam huchallikunkichikñachu. Chaynata ruwaspaykichikmi Israelpa mirayninkunapa sapaqchapuwasqan kaqkunata mana qachachankichikchu, chaynapim mana wañunkichikchu, nispa.