Read CHUYA QELLQA La Biblia en Quechua de Ayacucho 2012 Números 4 Bible Online

Números 4 - CHUYA QELLQA La Biblia en Quechua de Ayacucho 2012 bible

Números 4

²Leví ayllunkunamantam Coatpa mirayninkunata ayllunkuman chaynataq ñawpaq taytankupa mirayninkuman hina yupankichik.

³Kimsa chunka watayuqmanta pichqa chunka watayuqkamam yupankichik. Paykunam kanqaku asuykamuwanaykichik carpapi servikuqkuna.

⁴Coatpa mirayninkunaqa, asuykamuwanaykichik carpapim imapas ñoqallapaqña sapaqchasqa kaqkunata nanachikunqaku.

⁵Israelpa mirayninkuna huklawman astakuptinkum, Aaronwan churinkuna carpa rakinaq velota hurqonqaku, hinaspam Arcata chaywan tapanqaku.

⁶Chay velopa hawantam fino qalaswan tapanqaku, chaypa hawanmanñataqmi morado telawan tapanqaku, hinaspam varillakunata ustuchispa apanqaku.

⁷Ñoqapa qayllaypi kaq mesapa hawan-manpas morado telatam mastanqaku, chaypa hawanmanñataqmi platokunata, cucharakunata, tazonkunata hinaspa vino tallinapaq aysakukunata churanqaku. Chay mesapa hawanpitaqmi tantatapas mana tipiyta ñoqapa qayllaypi churankichik.

⁸Tukuy chaykunapa hawanmanñataqmi guindo telata mastanqaku, hinaspam fino qalaskunawan tapanqaku. Varillankunatam ustuchinqaku mesata apanankupaq.

⁹Chaymantam candelabrota, mecheronkunata, mecha limpianankunata, platochankunata chaynataq aceitepaq llapa serviciokunatapas morado telawan tapanqaku.

¹⁰Fino qalaskunapim lliwta qepicharunqaku hinaspam chakanaman churaspa apanqaku.

¹¹Qorimanta altarpa hawanmanpas morado telatam mastanqaku, chaypa hawantañataqmi fino qalaskunawan tapanqaku, hinaspam chay altarta apanankupaq varillankunata ustuchinqaku.

¹²Santuariopi llapa serviciokunatapas morado pañopi mayturuspam fino qalaskunapi kipuruspa chakanaman churaspa apanqaku.

¹³Altartapas wirayuq uchpanta limpiaruspankum grosella telawan tapanqaku.

¹⁴Hinaspam chay altarpa hawanman llapa servicionkunata churanqaku otaq palankunata, trinchenkunata, kallanankunata hinaspa tazonninkunata. Hawanmanñataqmi fino qalaskunawan tapanqaku hinaspa varillankunata ustuchispa chay altarta apanqaku.

¹⁵Santuariopi llapa serviciokunata huklawman apanankupaq Aaronwan churinkuna tapayta tukuruptinkum, Coatpa mirayninkuna yaykuspanku apanqaku. Ñoqapaq sapaqchasqa kaqkunatam ichaqa ama llapchanqakuchu, chaynapi ama wañurunankupaq. Chaynaqa, ñoqaman asuykuwanaykichik carpapi kaq tukuy ima kaqkunatam Coatpa mirayninkuna apanqaku.

¹⁶Sacerdote Aaronpa churin Eleazarmi cuentallikunqa candelabro ratachinapaq aceitemanta, miski asnaq inciensomanta, sapa punchaw ofrecewanaykichik kawsay ofrendakunamanta, ñoqapaq sapaqchaspa tallinapaq kaq aceitemanta. Nanachikunqataqmi asuykamuwananku carpatapas chaynataq tukuy ima servicionkunatapas, nispa.

¹⁷Moisestawan Aarontam Tayta Dios kaynata nirqa:

¹⁸Leví ayllumanta kaq Coatpa mirayninkunataqa amam qollurachinkichikchu.

¹⁹Santuariopa imankunatapas llapcharuspanku mana wañunankupaqmi kaynata ruwankichik: Aaronmi churinkunapiwan santuarioman yaykuspa paykunaman willanqaku imam ruwanankuta chaynataq imakunam apanankutapas.

²⁰Chaynapim Coatpa mirayninkunaqa santuarioman yaykuspapas chaypi kaqkunataqa mana qawayllapas qawanqakuchu mana wañurunankupaq nispa.

²¹Chaymantam Moisesta Tayta Dios nirqa:

²²Gersonpa mirayninkunatapas tayta-mamanpa ayllunman hina yupay,

²³kimsa chunka watayuqmanta pichqa chunka watayuqkama, chay yupasqayki kaqkunam asuykamuwanaykichik carpapi servikunqaku.

²⁴Gersonpa mirayninkunapa ruwanankuna hinaspa apanankunam kaykuna.

²⁵Paykunam apanqaku: Santuariopa cortinankunata, asuykuwanaykichik carpata, carpapa qatankunata, fino qalasmanta qatakunata, carpapa punkunpi telata,

²⁶patiopa cortinankunata, patiopa punkunpi telakunata. Chaykunam kachkan carpapa muyuriqninpi chaynataq altarpa muyuriqninpi. Hina paykunataqmi tukuy chaykunapa waskankunatapas apanqaku chaynataq ruwanankupaq tukuy ima serviciokunatapas. Chaynaqa, Gersonpa mirayninkunam tukuy chay-kunata ruwanqaku.

²⁷Aaronwan churinkunam Gersonpa mirayninkunata kamachinqaku imakunam ruwanankuta chaynataq imakunam apanankutapas. Paykunam tukuy chaykunata apas-panku nanachikunqaku.

²⁸Asuyka-muwanaykichik carpapim Gersonpa mirayninkuna chaykunata ruwanqaku, Aaronpa churin sacerdote Itamarñataqmi paykunata kamachinqa.

²⁹Meraripa mirayninkunatapas ayllunman hinam yupanki.

³⁰Kimsa chunka watayuqmanta pichqa chunka watayuqkamam yupanki. Yupasqayki kaqkunam asuykuwanaykichik carpapi servikunqaku.

³¹Paykunam asuykuwanaykichik carpapa marconkunata, varillankunata, pilarninkunata, pilarpa toqoyuq tiyanankunata,

³²patiopa muyuriqninpi pilarkunata tiyanantintakama, estacankunata, waskankunata hinaspa servichikunapaq tukuy ima kaqkunatapas apanqaku. Sapakamamanmi imakunam apanankutapas ninki.

³³Asuykamuwanaykichik carpapim Meraripa mirayninkuna chaykunata ruwanqaku, Aaronpa churin sacerdote Itamarñataqmi paykunata kamachinqa, nispa.

³⁴Moiseswan Aaronmi Israelpa mirayninkunapi kamachikuqkunapiwan Coatpa mirayninkunata ayllunkuman hina yuparqaku.

³⁵Kimsa chunka watayuqmanta pichqa chunka watayuqkamam, Diosman asuykuna carpapi servikunankupaq yupasqa karqaku.

³⁶Ayllunman hina yuparuptinkum, iskay waranqa qanchis pachak pichqa chunka qarikuna karqaku.

³⁷Paykunam karqaku Coatpa mirayninkuna, Diosman asuykuna carpapi servikuqkuna. Paykunatam Moisesman Tayta Diospa kamachisqanman hina Moiseswan Aarón yuparqaku.

³⁸Gersonpa mirayninkunatapas ayllunkuman hinam yuparqaku.

³⁹Kimsa chunka watayuqmanta pichqa chunka watayuqkamam Diosman asuykuna carpapi servikunankupaq yupasqa karqaku.

⁴⁰Iskay waranqa soqta pachak kimsa chunka qarikunam karqaku.

⁴¹Paykunam ayllunkuman hina Gersonpa mirayninkuna karqaku Diosman asuykuna carpapi servikuqkuna. Paykunatam Tayta Diospa kamachisqanman hina Moiseswan Aarón yuparqaku.

⁴²Meraripa mirayninkunatapas ayllunkuman hinam yuparqaku.

⁴³Kimsa chunka watayuqmanta pichqa chunka watayuqkamam Diosman asuykuna carpapi servikunankupaq yupasqa karqaku.

⁴⁴Yuparuptinkum kimsa waranqa iskay pachaknin qarikuna karqaku.

⁴⁵Chaynam karqa Meraripa mirayninkuna ayllunkuman hina yuparuptinku. Paykunatam Moisesman Tayta Dios kamachisqanman hina, Moiseswan Aarón yuparqaku.

⁴⁶Moiseswan Aaronmi Israelpa mirayninkunapi kamachikuqkunapiwan Leví aylluta yuparqaku. Ayllunkuman hinam sapakamata yuparqaku.

⁴⁷Kimsa chunka watayuqmanta pichqa chunka watayuqkamam yuparqaku, yuparqakuqa Diosman asuykuna carpapi servikunankupaq kaqkunatam.

⁴⁸Leví ayllumanta kaqkunata yuparuptinkum pusaq waranqa pichqa pachak pusaq chunka qarikuna karqaku.

⁴⁹Moisesman Tayta Diospa nisqanman hinam yuparqaku, hinaspam sapakamaman imam ruwanankuta chaynataq imam apanankutapas kamachirqaku. Chaynataqa ruwarqaku Moisesman Tayta Diospa kamachisqanman hinam.