Read CHUYA QELLQA La Biblia en Quechua de Ayacucho 2012 Números 6 Bible Online

Números 6 - CHUYA QELLQA La Biblia en Quechua de Ayacucho 2012 bible

Números 6

¹Israelpa mirayninkunaman ninanpaqmi Moisesta Tayta Dios kaynata nirqa: Qaripas otaq warmipas ñoqa Tayta Diosllataña serviwananpaq sapaqchakuspaqa,

³amam vinota, poqosqa aqata, uvasmanta ruwasqa vinagreta, aqamanta ruwasqa vinagreta nitaq uvasmanta ruwasqa upitapas tomanqachu. Amataqmi uvastapas nitaq uvasmanta pasastapas mikunqachu.

⁴Chaynaqa, ñoqapaq sapaqchakusqan punchawkamam ama uvasmanta ima mikuytapas nitaq uvasmanta ima ruwasqatapas mikunqachu.

⁵Ñoqapaq rakisqa kanankamaqa amam chukchanta rutuchikunqachu. Ñoqa Tayta Diospaq sapaqchakusqan punchawkamam ñoqallapaqña kanqa, hinaspam chukchantapas wiñachinqa.

⁶Ñoqa Tayta Diospaq rakisqa kasqan punchawkamataqmi wañuqpa ayanmanpas ama asuykunqachu.

⁷Tayta-mamanña otaq wawqe-paninña wañukuptinpas amam asuykunqachu, mana chayqa millakuypaqmi kanman. Payqa ñoqallapaqñam sapaqchasqa kachkan.

⁸Tukuy tiempo sapaqchasqa kanankamaqa ñoqa Tayta Diospaq sapaqchasqam kanqa.

⁹Paypa qayllanpi qonqaymanta pipas wañukuptinqa chay ñoqapaq sapaqchasqa runapa chukchanmi millakuypaq kanqa. Chaynaqa, chuyanchakuspanmi qanchis kaq punchawpi chukchanta kachiy-kachiyta rutuchikunqa.

¹⁰Pusaq kaq pun-chawpiñataqmi iskay qoqñuta otaq iskay mallqo palomata asuykuwanaykichik carpapa punkunman apamuspa sacerdoteman qonqa.

¹¹Hinaptinmi sacerdoteñataq hukninta hucharayku ofrendata hina ofrecemuwanqa, huknintañataq lliw kañana ofrendata hina ofrecemuwanqa. Chaynapim wañuqpa ayan hapirusqanmanta chay ñoqapaq sapaqchakuq runapa huchan pampachasqa kanqa. Chay punchawmantam chukchanta sapaqchapuwanqa.

¹²Chaymantam musoqmanta qallarinqa ñoqallapaqña sapaqchakuyta. Watayuq carnerotam huchanmanta ofrecewananpaq apamuwanqa. Punta sapaqchakusqanqa yanqapaqmi kanqa, ñoqapaq sapaqchakuchkaspa millarikuypaq kaqta ruwarusqanraykum.

¹³Ñoqapaq sapaqchakusqan punchaw tukuruptinqa kay yachachikuyman hinam ruwanqa: Asuykuwanaykichik carpapa punkunmanmi pusasqa kanqa.

¹⁴Chaypim ñoqa Tayta Diosman lliw kañana huk watayuq sano carnerota ofrecemuwanqa, huk watayuq sano ovejatañataqmi huchamanta ofrendata ofrecemuwanqa. Ofrecemuwanqataqmi ñoqawan allinlla kasqanmanta carnero ofrendatapas.

¹⁵Canastillapim ofrecemuwanqa fino harinamanta aceitewan masa ruwasqa mana levadurayuq tantakunatapas chaynataq aceitewan chapusqa mana levadurayuq tortillakunatapas, chaykunatawan kuskatam ofrecemuwanqa kawsaykunamanta ofrendatapas chaynataq tallinapaq vino ofrendatapas.

¹⁶Tukuy chaykunataqa sacerdotem ñoqa Tayta Diospa qayllayman apamuspan hucharayku ofrendapaq ofrecewanqa, ofrecewanqataqmi lliw kañana ofrendatapas chaynataq huknin carnerotapas.

¹⁷Chaymantam ofrecewanqa chay ofrecewaqniy runa ñoqa Tayta Dioswan allinlla kasqanmanta carnero ofrendata canastillapi mana levadurayuq tantatawan kuskata. Ofrecewanqataqmi kawsay ofrendatawan tallinapaq vino ofrendatapas.

¹⁸Hinaspam chay ñoqapaq sapaqchakuq runa, asuykuwanaykichik carpapa punkunpi ñoqapaq sapaqchasqan chukchanta kachiy-kachiyta rutuchikuspan ninaman wischuykunqa, ñoqawan allinlla kasqanmanta rupaq ofrendapa ukunman.

¹⁹Sacerdoteñataqmi chay ñoqapaq sapaqchakuq runaman hapichinqa carneropa yanusqa brazonta chaynataq canastillapi kaq mana levadurayuq tantatawan mana levadurayuq tortillatapas. Chaykunataqa hapichinqa ñoqapaq sapaqchasqan chukchanta ruturachikuptinñam.

²⁰Chaymantam sacerdoteqa kuyuchisqa ofrendata hina ñoqa Tayta Diosman ofrecemuwanqa. Ofrecemuwasqan animalpa qasqonwan piernanqa ñoqallapaqña sapaqchasqa kasqanraykum sacerdotepaq kanqa. Chaynata sacerdote ruwaruptinñam chay runaqa vinota tomanman.

²¹Kay yachachikuykunaman hinam ñoqa Tayta Diospaq sapaqchakuq runaqa ruwanqa, atisqanman hinam imatapas ruwanqa. Chaytaqa ruwanqa ñoqallapaqña sapaqchakuqkunapaq yachachikuyman hinam, nispa.

²²Aaronman chaynataq churinkunaman ninanpaqmi Moisesta Tayta Dios kaynata nirqa: Israelpa mirayninkunata bendecispaykichikqa kaynatam ninkichik:

²⁴“Tayta Diosyá bendecisuspayki waqaychasunki.

²⁵Tayta Diosyá allin ñawinwan qawarisuspayki llakipayasunki.

²⁶Tayta Diosyá kuyakuywan qawariykususpayki hawkayayta qosunki”, nispa.

²⁷Chaynatam Israelpa mirayninkunapa favorninpi sutiyta rimarinkichik, hinaptinmi paykunata bendecisaq.