Read CHUYA QELLQA La Biblia en Quechua de Ayacucho 2012 Números 7 Bible Online

Números 7 - CHUYA QELLQA La Biblia en Quechua de Ayacucho 2012 bible

Números 7

¹Santuariota Moisés sayachiyta tukuruspanmi llapa servicionkunatawan chaynataq altartapas llapa servicionkunatawan aceitewan tallispa Diospaq sapaqcharqa.

²Hinaptinmi Israelpi sapa ayllupa kamachiqninkuna, runa yupaypi Moisesta yanapaqkuna hamuspanku,

³Tayta Diospa qayllanman ofrendankuta apamurqaku. Chay ofrendakunam karqa toldosqa soqta carretakuna chaynataq chunka iskayniyuq torokuna. Sapa iskay kamachikuqkunam huk carretata apaykurqaku, sapakamañataqmi huk torota apaykurqaku. Chaykunatam Diosman asuykuna carpapa ñawpaqninman apaykurqaku.

⁴Hinaptinmi Moisesta Tayta Dios nirqa:

⁵Carretakunatawan torokunata paykunamanta chaskiy, asuykuwanaykichik carpapi servikunanpaq hinaspa Leví aylluman qoy, chaynapi imam ruwayninkupi sapakama servichikunankupaq, nispa.

⁶Moisesmi carretakunatawan torokunata chaskispa Leví aylluman qorqa.

⁷Iskay carretakunatawan tawa torokunatam Gersón aylluman qorqa imam ruwanankupi servichikunankupaq.

⁸Tawa carretakunatawan pusaq torokunatam Merari aylluman qorqa, chaynapi imam ruwanankupi servichikunankupaq. Paykunaqa tukuy imakunatapas ruwarqaku sacerdote Aaronpa churin Itamarpa kamachisqanman hinam.

⁹Coat ayllumanmi ichaqa carretakunatapas nitaq torokunatapas mana qorqachu, paykunaqa Diospaq sapaqchasqa kaqkunataqa hombrollapi apananku kasqanrayku.

¹⁰Altarta aceitewan tallispa Diospaq sapaqchaptinkum sapa ayllupa kamachiqninkuna ofrendankuta aparqaku, hinaspam altarpa ñawpaqninman churarqaku.

¹¹Hinaptinmi Moisesta Tayta Dios nirqa: Altarta sapaqchaptinkuqa, sapa punchawmi tupasqanman hina huk ayllupa kamachiqnin ofrendata ofrecemuwanqa, nispa.

¹²Chaynapim punta kaq punchawpi ofrecerqa Judá ayllumanta Aminadabpa churin Naasón.

¹³Paypa ofrendankunam karqa: Yaqa kilo parten llasaq qollqemanta bandeja hinaspa parte kilo masnin llasaq qollqemanta taza. Chaykunatam santuariopi pesoman hina qorqa. Chay iskayninpim fino harina aceitewan chapusqa masa huntay-huntay karqa, chayqa kawsaykunamanta ofrendapaqmi karqa.

¹⁴Ofrecerqataqmi yaqa tawa onza llasaq qorimanta wisllatapas incienso huntayuqta,

¹⁵chaynataq malta torotapas, carnerotapas hinaspa lliw kañanapaq watayuq carnerotapas,

¹⁶hucha pampachana ofrendapaq chivatotapas.

¹⁷Dioswan allinlla kasqankumantam ofrecerqa iskay torokunata, pichqa chivatokunata hinaspa huk watayuq pichqa carnerokunata. Tukuy chaykunam karqa Aminadabpa churin Naasonpa ofrendankuna.

¹⁸Iskay kaq punchawpim ofrecerqa Isacar ayllumanta Zuarpa churin Natanael.

¹⁹Natanaelqa ofrecerqa Naasonpa ofrecesqanta hinallam.

²⁴Kimsa kaq punchawpim ofrecerqa Zabulón ayllumanta Helonpa churin Eliab.

²⁵Paypas ofrecerqa punta ofreceqkunapa ofrendanta hinallam.

³⁰Tawa kaq punchawpim ofrecerqa Rubén ayllumanta Sedeurpa churin Elisur.

³¹Paypas ofrecerqa punta ofreceqkunapa ofrendanta hinallam.

³⁶Pichqa kaq punchawpim ofrecerqa Simeón ayllumanta Zurisadaipa churin Selumiel.

³⁷Paypas ofrecerqa punta ofreceqkunapa ofrendanta hinallam.

⁴²Soqta kaq punchawpim ofrecerqa Gad ayllumanta Deuelpa churin Eliasaf.

⁴³Paypas ofrecerqa punta ofreceqkunapa ofrendanta hinallam.

⁴⁸Qanchis kaq punchawpim ofrecerqa Efraín ayllumanta Amiudpa churin Elisama.

⁴⁹Paypas ofrecerqa punta ofreceqkunapa ofrendanta hinallam.

⁵⁴Pusaq kaq punchawpim ofrecerqa Manasés ayllumanta Pedasurpa churin Gamaliel.

⁵⁵Paypas ofrecerqa punta ofreceqkunapa ofrendanta hinallam.

⁶⁰Isqon kaq punchawpim ofrecerqa Benjamín ayllumanta Gedeonipa churin Abidán.

⁶¹Paypas ofrecerqa punta ofreceqkunapa ofrendanta hinallam.

⁶⁶Chunka kaq punchawpim ofrecerqa Dan ayllumanta Amisadaipa churin Ahiezer.

⁶⁷Paypas ofrecerqa punta ofreceqkunapa ofrendanta hinallam.

⁷²Chunka hukniyuq punchawpim ofrecerqa Aser ayllumanta Ocranpa churin Pagiel.

⁷³Paypas ofrecerqa punta ofreceqkunapa ofrendanta hinallam.

⁷⁸Chunka iskayniyuq punchawpim ofrecerqa Neftalí ayllumanta Enanpa churin Ahira.

⁷⁹Paypas ofrecerqa punta ofreceqkunapa ofrendanta hinallam.

⁸⁴Altarta Diosllapaqña sapaqchaptin-kum Israel ayllukunapa kamachiqninkuna tukuy kay ofrendakunata ofrecerqaku: Qollqemanta chunka iskayniyuq tazonkunata, qollqemanta chunka iskayniyuq aysakukunata hinaspa qorimanta chunka iskayniyuq wisllakunata.

⁸⁵Sapa tazonmi yaqa kilo partenta llasarqa, sapa aysakuñataqmi parte kilo masninta llasarqa. Chaynaqa, chay tazonkunapa hinaspa aysakukunapa llasayninmi karqa iskay chunka soqtayuq kilo tumpa masnin. Tukuy chaykunapa llasayninqa karqa santuariopi pesoman hinam.

⁸⁶Incienso huntayuq qorimanta chunka iskayniyuq wisllakunañataqmi sapakama yaqa tawa onzatakama llasarqa. Chaynaqa, qorimanta llapallan wisllakunapa llasayninqa karqa yaqa kilo cuartonmi.

⁸⁷Lliw kañana ofrendakunapas kaykunam karqa: Chunka iskayniyuq malta torokuna, chunka iskayniyuq carnerokuna, watayuq carnerokunapas chunka iskayniyuqmi karqa. Chay animalkunatawan kuskatam kawsaykunamanta ofrendakunatapas ofrecerqaku. Ofrecerqakutaqmi hucharayku ofrendapaqpas chunka iskayniyuq chivatokunata.

⁸⁸Dioswan allinlla kasqankumanta ofrendapaq animalkunam karqa: Iskay chunka tawayuq malta torokuna, soqta chunka carnerokuna, soqta chunka chivatokuna hinaspa watayuq soqta chunka carnerokuna. Tukuy chaykunam karqa aceitewan tallispa altarta Diospaq sapaqchanapaq ofrendakuna.

⁸⁹Diosman asuykuna carpamanmi Moisés yaykurqa Dioswan rimananpaq, hinaptinmi chunkantin kamachikuykuna waqaychana Arcapa tapanmanta otaq querubinkunapa chawpinmanta Moisesta Tayta Dios rimapayamuq. Chaynatam Moiseswan Tayta Dios rimaq.