Read CHUYA QELLQA La Biblia en Quechua de Ayacucho 2012 Números 9 Bible Online

Números 9 - CHUYA QELLQA La Biblia en Quechua de Ayacucho 2012 bible

Números 9

¹Egipto nacionmanta iskay wataña lloqsiramusqanku hawam, chay iskay watapa punta kaq killanpi Sinaí sutiyuq chunniqpi Moisesta Tayta Dios nirqa:

²Israelpa mirayninkunam tiempollanpi Pascua fiestata ruwanqaku.

³Kay punta kaq killapa chunka tawayuq punchawninpim inti seqaykuymanta ruwanqaku. Ruwanqakuqa llapallan yachachikuyniykunaman hinaspa llapallan kamachikuyniykunaman hinam, nispa.

⁴Moisesmi Israelpa mirayninkunata Pascua fiestata ruwanankupaq nirqa.

⁵Chaymi paykuna punta kaq killapa chunka tawayuq punchawnin tardeykuyta Pascua fiestata ruwarqaku, ruwarqakuqa Sinaí chunniqpim. Israelpa mirayninkunaqa ruwarqaku Moisesman Tayta Diospa nisqankunaman hinam.

⁶Wakin runakunañataqmi wañuqpa ayanman asuykusqankurayku millakuypaq kachkarqaku, chayraykum chay punchawqa Pascua fiesta ruwaytaqa mana atirqakuchu, hinaspam Moisesmanwan Aaronman asuykuspanku

⁷kaynata nirqaku: Ñoqaykuqa wañuqpa ayanman asuykusqaykuraykum millakuypaq kachkaniku. ¿Yaqachu Israelpa mirayninkunawan kuska Tayta Diosman ofrendaykuta ofreceyta atiymanku? nispa.

⁸Chaymi Moisés nirqa: Suyaykuychik, imatas qamkunamanta Tayta Dios kamachiwanqa, nispa.

⁹Hinaptinmi Israelpa mirayninkunaman ninanpaq Moisesta Tayta Dios kaynata nirqa: Qamkunamanta otaq miraynikichikmanta wañuqpa ayanman asuykuq runaqa millakuypaqña kachkaspapas Pascua fiestaytaqa ruwanmanmi, ruwanmantaqmi illaruspan karupi tarikuq runapas.

¹¹Ruwanqakuqa iskay kaq killapa chunka tawayuq punchawninpi inti seqaykuytam. Chay fiestapim aychata qatqe qorayuqkunata hinaspa mana levadurayuq tantayuqta mikunqaku.

¹²Ofrecesqanku animalpa aychantaqa amam paqarinnintin punchawkamaqa puchunqakuchu, nitaqmi tulluntapas pakinqakuchu. Pascua fiestataqa kamachikuyniykunaman hinam ruwankichik.

¹³Pascua fiestata ruwananpaq hina kachkaspan otaq mana illaruchkaspan Pascua fiestayta mana ruwaqqa llaqtamanta chinkachisqam kanqa. Ofrendakunata ñoqa Tayta Diosman imam tiempollanpi mana ofrecewasqanraykum chay runaqa huchanmanta castigasqa kanqa.

¹⁴Qamkunawan yachaq huklaw llaqtayuqkunapas ñoqa Tayta Diospaqmi Pascua fiestayta ruwanqaku, ruwanqakuqa Pascua fiestapaq kamachikuykunaman hinaspa yachachikuykunaman hinam. Chay kamachikuyllam nacionnikichikpi naceqkunapaqpas chaynataq huklaw llaqtayuqkunapaqpas kanqa, nispa.

¹⁵Diospa yachanan carpata otaq chunkantin kamachikuy waqaychana carpata sayarirachiptinkum chay carpata puyu tapaykurqa. Tutaykuqmanta achikyaqkamañataqmi nina hina kancharqa.

¹⁶Chaynallam sapa punchaw karqa: Punchawmi carpata puyu tapaykuq, tutanñataqmi nina hina kanchaykuq.

¹⁷Carpapa hawanmanta altoman puyu hoqarikuruptinmi Israelpa mirayninkuna ñawpaqman riqku, maypipas puyu sayaruptinñataqmi chaypi samaruqku.

¹⁸Tayta Dios kamachiptinmi Israelpa mirayninkunaqa lloqsiqkupas otaq samaq-kupas; Diospa yachanan carpapa ha-wanpi puyusapa punchaw puyu kanankamam samaqku.

¹⁹Diospa yachanan carpapa hawanpi chay puyu achka punchawkuna hinalla kaptinqa Israelpa mirayninkunapas hinallapim kaqku Tayta Diosta kasukuspanku.

²⁰Sichum chay puyu Diospa yachanan carpapa hawanpi pisi punchawlla sayaruptinqa Tayta Diospa kamachisqanman hinam samaruqkupas otaq ñawpaqmanpas riqku.

²¹Wakin kutipiqa chay puyum huk tutalla sayaruspan achikyaqtaqa hoqarikuruqña, hinaptinmi paykunapas ñawpaqman riqku. Wakin kutipiñataqmi huk punchawlla sayaruspan tutaykuqtaqa hoqarikuruqña hinaptinmi paykunapas ñawpaqman riqku.

²²Sichum chay puyu Diospa yachanan carpapa hawanpi iskay punchawpas, huk killapas otaq huk watapas hina-llapi kaptinqa, Israelpa mirayninkunapas maymi samasqallankupim kaqku. Hoqarikuruptinmi ichaqa paykunapas chaylla pasaqku.

²³Tayta Dios kamachiptinmi samaruqkupas otaq ñawpaqmanpas riqku. Paykunaqa imatapas ruwaqku Moisesman Tayta Diospa kamachisqanman hinam.