Read CHUYA QELLQA La Biblia en Quechua de Ayacucho 2012 Miqueas 2 Bible Online

Miqueas 2 - CHUYA QELLQA La Biblia en Quechua de Ayacucho 2012 bible

Miqueas 2

¹¡Ay, imallapiraq rikukunqaku! Puñusqankupi mana allinta tantearuspa achikyaramuptinñataq kamachikuq kasqankurayku chay mana allin tanteasqankuta ruwayman churaqkuna.

²Paykunam hukpa chakranta otaq wasintapas munaruspaqa suwaypawan qechuruspa hapikuykunku, dueñontapas aylluntinta ñakarichispam lliw herencianta qechurunku, nispa.

³Chayraykum Tayta Dios kaynata nin: Ñoqapas qamkunapa contraykichikpim mana allinnikichikta tanteachkani, chaymantaqa manam lluptinkichikchu, ñakarinaykichik punchaw chayamuptinmi uchuychallaña purinkichik.

⁴Chay punchawkunapim qamkunata asipayaspa kaynata takipayasunkichik: “Pasaypaq tuñichisqam rikurirunchik, Diosninchikpa munaychakunan llaqtanchikmi mana pipa nanachikusqan hukpa makinman chayarun, chakranchikunatapas enemigonchikunam partenakurun”, nispanku.

⁵Chayraykum Tayta Diospa llaqtan ukupiqa manaña allpaykichikpas kanqañachu.

⁶Profeta tukuqkunam Diospa profetankunata ninku: Ama yanqakunata willawaykuchu, manam ima sasachakuypas pasawanqakuchu, nispanku.

⁷Jacob castakuna, qamkunam kaynata tanteanakunkichik: ¿Tayta Diospa espiritunchu pisiparun? ¿Kaykunachu ruwayninkuna? ¿Manachum Tayta Diosqa allin ruwaq runata yanapaykun? nispaykichik.

⁸Qayna punchawmi llaqtay karqankichik, kunanqa enemigoyñam rikurirunkichik. Guerramanta hawkalla kutimuqkunapatapas enemigoykichikmanta hinaraqmi allin pachallantapas qechunkichik.

⁹Llaqtaypi warmikunatam wasinkumanta qarqonkichik, uña wawankumantapas ñoqapa qosqay honorninkutam qechurunkichik.

¹⁰Hatarispa kaymanta pasaychik, kayqa manam samana lugarñachu; anchata qanrachakurusqanraykum pasaypaq chinkachisqa kanqa.

¹¹Sichum huk runa llullakuspan kaynata ninqa: “Vinoraykum, aqaraykum qampaq profetizasaq”, nispa, chayna runam qamkunapa profetaykichik kanqa.

¹²Jacobpa mirayninkuna cheqaptapunim huñunasqaykichik, Israelmanta puchuqkunatam huñumusaq. Ovejakunata corralman huñuchkaq hinam huñusqaykichik, pastokunapi huñuchkaq hinam huñusqaykichik, hinaptinmi waranqantin-waranqantin runakuna hinaraq qaparinkichik.

¹³Ñanta kichaqmi ñawpaqninkuta rinqa, paykunañataqmi ñanta kicharuspa llaqtapa punkunta lloqsinqaku. Reyninku Tayta Diosñataqmi paykunapa ñawpaqninta rinqa.